Otembo Yipi wa Talavayele Ndukundi wa Velapo?
1. Asumũlũho api omanu valua va siata oku kuata, kuenda nye vamue va sukila oku linga?
1 Vokuenda kuanyamo, omanu valua va siata oku kuata asumũlũho oku ‘kunda kuenda oku longisa olondaka viwa’ poku talavaya ndakundi votembo yosi. (Ovil. 5:42) Pole vamue va siata oku liwekapo kupange waco omo liovina viñi viñi. Nda wa talavayele ale ndukundi wa velapo, anga hẽ o pondola oku konomuisa ekalo liove oco o li tumbike vali kupange waco?
2. Momo lie vana va talavayele ale ndakundi va velapo va sukilila oku konomuisa ekalo liavo cilo?
2 Ekalo li Pongoloka: Citava okuti ocitangi ca ku tatekele oku amamako ndukundi wa velapo, ca potoluiwa. Nda wa liwekelepo oku talavaya ndukundi wa velapo omo kua kuatele epondolo lioku tẽlisa otembo ya kisikiwa ya 90 kolowola vosãi, citava hẽ oku fetika vali upange waco, omo okuti cilo ku kisikiwa lika 70 kolowola? Anga hẽ tunde eci wa liwekelepo kupange wakundi va velapo, ovikele viove kupange ale viepata, via tepuluka? Manji umue ukãi wa liwekelepo upange wakundi va velapo omo lioku vela, eci a tẽlisa 89 kanyamo wa litumbika vali kupange waco. Omo okuti unyamo waco ka kaile kosipitali, wa limbuka okuti cecelela oku kala vali ukundi wa velapo!
3. Vakuepata va kuatisa ndati umue vepata oco a talavaye ndukundi wa velapo?
3 Citava okuti, kua la talavaya ndukundi wa velapo, pole umue ukuepata liove wa liwekelepo kupange waco omo lioku tata umue vepata wa kuka. (1 Tim. 5:4, 8) Anga hẽ ove ale vakuene vepata va pondola oku kuatisa una wa silepo upange wakundi va velapo? Momo lie ka vu sapelela ovina viaco kumosi lepata? (Olosap. 15:22) Nda vamue vepata va kuatisa umue oco a talavaye ndukundi wa velapo, vosi va ka kuata esanju omo lioku ci linga.
4. Nye o sukila oku linga nda ku tẽla vali oku litumbika kupange wakundi va velapo?
4 Nda ekalo liove cilo, ka li ku ecelela oku talavaya vali ndukundi wa velapo, ku ka sumue. Onjongole yove yoku ci linga yi sanjuisa Yehova. (2 Va Kor. 8:12) Uloño wa kuata eci wa kala ukundi wa velapo, amamako lawo kupange wove woku kunda cilo. Likutilila ku Yehova catiamẽla konjongole yove, kuenda sanda apuluvi oku linga apongoloko kekalo liove. (1 Yoa. 5:14) Vokuenda kuotembo, Yehova o ka ku yuluila “epito linene lioku linga upange wa lua,” oco o kuate esumũlũho lioku litumbika vali kupange wakundi va velapo!—1 Va Kor. 16:9.