‘Okulia Kotembo ya Tukuiwa’
1 Noke yoku enda kohongele yilikasi pamue tu popia ndoco: “Olonumbi tua yeva kohongele, via tu kuatisa calua!” Manji umue ukuakunyula akongelo wa lombolola okuti, vamue noke yoku yeva ovipama viohongele, va lekisa onjongole yoku vokiya upange wavo woku kunda. Manji ukuavo onyula akongelo wa popiavo hati: “Ohongele yaco ya tu kuatisa oku sokolola otembo tu kasi, osimbu tu konomuisa onjila yomuenyo tua nõla.” Handi vali, manji ukuavo wa popiavo hati: “Akundi vamue va lombolola okuti, ohongele yilikasi ya va ivaluisa oku limbuka okuti, upange woku kunda owo wa velapo.” Wa kuatisiwa ndati lohongele yilikasi?
2 Ovipama viohongele yilikasi yunyamo wiya vi ka tu kuatisavo. Osapi yaco ya linga hati: “Sanda Ocivundilo ku Yehova,” yopiwa Vosamo 118:8, 9. Ku ka lomboluiwa olosapi vikuavo ndeci: “Ndomo Yehova a tu Teyuila Kotembo Yohali,” “Kuatisa Vakuene Oku Sanga Ocivundilo Vavava a Yehova,” “Kuama Ongangu ya Yehova Yoku Eca Ocivundilo,” “Ene Amalẽhe, Koleli ku Yehova!” kuenda “Ombembua Yetu Kespiritu, Ocivundilo ca Eciwa la Yehova.”
3 Ndomo tu Kuatisiwa Lovipama: Noke lioku yeva esapulo lieteke liohongele yilikasi, linga eliangiliyo lioku kala kohongele yaco, kuenda laleka vana o longisa Embimbiliya oco va ende love. Oco ‘tu ime apako,’ tu sukila oku kapako ovina tua yeva. (Luka 8:15) Omo liaco, yevelela lutate ovipama, loku soneha lika atosi avelapo, olonumbi o yongola oku kapako komuenyo wove, kuenda kupange woku kunda. Noke liohongele, sokiya otembo yoku sapela lepata liove catiamẽla kolonumbi wa yevi, kuenda kũlĩhĩsi ovina u sukila oku kapako.
4 Ndeci okulia kupepa ku tekula etimba, haico ci pita lovipama viohongele yilikasi okuti, via pongiyiwa locisola. Yehova a sumũlũise alikolisilo ove oku enda kohongele yilikasi, loku upa esilivilo ‘kokulia kuespiritu kueciwa votembo ya tukuiwa,’ oco ku kuatise Akristão.—Mat. 24:45.
[Apulilo Elilongiso]
1. Ohongele yilikasi ya ku kuatisa ndati ove la vakuene?
2. Ovipama vipi viohongele yilikasi tu ka konomuisa kunyamo wiya wupange?
3. Tu pondola oku kuatisiwa ndati lovipama tu yeva kohongele yilikasi?
4. Momo lie tu lavokaila lesanju ohongele yilikasi?