Ondaka ya Suku yi Kuete Unene

1. Yipi osapi yohongele yilikasi yunyamo wupange wo 2014?

¹ Ndaño ka tua lipuile, Embimbiliya likuete unene woku pongolola ovisimilo vietu, oco vi likuate locipango ca Yehova. Unene upi ondaka ya Suku yi kuete? Tu kuatisiwa ndati lunene waco? Tu talavaya ndati lunene waco poku kuatisa omanu? Tu kuete elavoko liokuti atosi aco a velapo a ka tambuluiwa vokuenda kuohongele yilikasi ya pongiyiwila unyamo wupange wo 2014 losapi hati: “Ondaka ya Suku yi Kuete Unene,” yopiwa kelivulu lia Va Heveru 4:12.

2. Apulilo api tu ka yevelela a tambululo haico?

² Sanga a Tambululo Apulilo a Kuãimo: Osimbu o yevelela ulandu wohongele, soneha a tambululo apulilo a kuãimo.

• Momo lie tu kolelela Kondaka ya Yehova? (Osa. 29:4)

• Tu seteka ndati unene Wondaka ya Suku komuenyo wetu? (Osa. 34:8)

• Tu yuvula ndati oku yapuisiwa lunene woluali lua Satana? (1 Yoa. 5:19)

• Ene amalẽhe, vu pamisa ndati ekolelo liene? (Yer. 17:7)

• Tu pamisiwa ndati nda tua hongua? (2 Va Kor. 12:10)

• Nye ci tu kuatisa oku amamako oku linga apongoloko ndaño tua kakatelele kovituwa vĩvi? (Va Efe. 4:23)

3. Ndaño tu sukila oku yevelela lutate ulandu waco, tu kuatisiwa ndati lovipama vieteke liohongele yilikasi?

³ Tu ka kuatisiwa calua poku yevelela ulandu owu! Keteke liohongele yilikasi, kohongele yimbo, kuenda kohongele yofeka, tu ka kuata epuluvi lioku li sanga la vamanji va kasi va kongelo akuavo. (Osa. 133:1-3; 2 Va Kor. 6:11-13) Tu ka li sanga lakamba vetu vosimbu kuenda tu ka kuata epuluvi lioku linga ukamba la vamanji vakuavo. Nda onumiwa yo filiale manji o nyula akongelo vofeka, ale wa tunda ko Betele oco o nyuli keteke liohongele yene yilikasi, momo lie ku sandela epuluvi lioku u lama ci kale okuti weya lukãi waye ale sio? Omo liaco, tu kuete esunga lioku lavoka lesanju eteke liohongele yilikasi!