O Pondola Oku Eca Uvangi ka wa Sokiyiwile!
1. (a) Oku eca uvangi ka wa sokiyiwile ci lomboloka nye? (b) Vamanji vañami va kasi mulo vekongelo okuti va iñila vocisoko ca Yehova lekuatiso liuvangi ka wa sokiyiwile?
1 Vekongelo liene muli vamanji vañami va iñila vocisoko ca Yehova lekuatiso liuvangi ka wa sokiyiwile? Pamue o komoha eci o yeva etambululo. Voku eca uvangi ka wa sokiyiwile mua kongela oku kundila olondaka viwa komanu vana tu sanga eteke leteke poku linga ungende, poku pasuisa epata lietu, vana tu lisungue lavo, povitanda, kosikola, kupange woku sanda eteku, kuenda kovitumãlo vikuavo. Ocimunga cimue okuti ci kuete ci pitahãla 200 Kolombangi Via Yehova, valua pokati kavo, va yeva esapulo liusoma lekuatiso liuvangi ka wa sokiyiwile! Oku kuama onjila eyi yoku kunda, ca siata oku nena onima yiwa.
2. Ovolandu api atiamẽla koku eca uvangi ka wa sokiyiwile a lomboluiwa Vovisonehua?
2 Kocita catete, akundi vondaka yiwa, va kuatele ocituwa coku eca uvangi ka wa sokiyiwile. Yesu eci a linga ungende woku enda ko Samaria, wa kundila ukãi umue wa kala oku tapa ovava pocisimo ca Yakoba. (Yoa. 4:6-26) Filipu wa fetika ombangulo la umue kaleyi wo ko Etiopia, wa kala oku tanga elivulu lia Isaya, poku u pulisa ndoco: “Eci o kasi loku tanga hẽ, ca ku lomboloka?” (Ovil. 8:26-38) Eci upostolo Paulu a kala vokayike ko Filipoi, wa kundila umue kalei wo vokayike. (Ovil. 16:23-34) Noke, eci Paulu a kapiwile onjanja yikuavo vokayike, “wa tambola vosi veya kokuaye. Wa kunda kunda usoma wa Suku, kuenje wa longisa ovina via Ñala Yesu Kristu lutõi.” (Ovil. 28:30, 31) Ove o pondolavo oku eca uvangi ka wa sokiyiwile, ndaño o kuete osõi. O ci linga ndati?
3. Nye ci pondola oku tu kuatisa oco ka tu ka kuate osõi?
3 Ndomo o Fetika Ombangulo: Valua pokati ketu, tua siata oku kuata ocitangi coku fetika ombangulo lomanu ka tua kũlĩhĩle. Pamue tu kuatavo ocitangi caco la vana tua kũlĩha ale vana okuti, Halombangiko Via Yehova. Tu vetiyiwa lika oku fetika ombangulo, eci tu sokolola ohenda ya Yehova, ovina viespiritu a siata oku situluila kafendeli vaye, kuenda ekalo lĩvi liomanu va sangiwa voluali. (Yona 4:11; Osa. 40:5; Mat. 13:52) Handi vali, tu sukila oku pinga ekuatiso ku Yehova oco tu ‘kuate utõi.’ (1 Va Tes. 2:2) Manji umue ulume wa pindisiwa kosikola yo Gileada wa popia hati: “Nda limbuka okuti, ohutililo yi pondola oku tu kuatisa nda tu kuete osõi yoku sapela lomanu.” Nda o kuete ocitangi caco, linga ohutililo yo vutima haiyo yi teta onimbu.—Neh. 2:4.
4. Ocimãho cipi tu sukila oku kuata, kuenda momo lie?
4 Onumbi yoku eca uvangi ka wa sokiyiwile yi lekisa okuti, ka tu sukila oku fetika ombangulo lolondaka vimue tua sokiya, ale oku tanga ocinimbu cimue Cembimbiliya. Tu pondola oku sanga ekuatiso poku kuata ocimãho cokuti, eci tu fetika ombangulo ka tu simi okuti, tu sukila oku eca uvangi. Akundi valua va lombolola hati, oku ci linga, ci va kuatisa oku limbuka okuti, va sukila oku kunda olondaka viwa kapuluvi osi. Nda omunu ka lekisa onjongole yoku sapela, tu sukila oku yuvula oku u kisika oku vangula letu. Pole, tu sandiliya onjila yoku liwekapo ombangulo.
5. Nye ca siata oku kuatisa manji umue o kuete osõi oco a ece uvangi ka wa sokiyiwile?
5 Manji umue o kuete osõi yoku sapela lomanu, eci a enda vovenda, wa siata oku tulukila komunu wosi a mola, kuenje o memenako lesanju. Nda omunu a tulukila wa memenakovo, o fetika laye ombangulo yimue yi teta onimbu. Nda wa tava oku yevelela, o kuata epuluvi lioku u kundila. Eye wa siata oku yevelela lutate, loku kũlĩhĩsa etosi a sukila oku sapuila komunu waco catiamẽla kolondaka viwa. Loku kuama onjila eyi, wa siata oku eca alivulu alua komanu, loku fetika elilongiso Liembimbiliya.
6. Tu fetika ndati ombangulo poku eca uvangi ka wa sokiyiwile?
6 Ombangulo Yoku Fetika: Nye tu sukila oku popia oco tu fetike ombangulo? Eci Yesu a sapela lukãi umue pocisimo covava, wa fetika ombangulo poku u pinga ovava. (Yoa. 4:7) Tu pondola oku fetika ombangulo, poku lama lukamba omunu tua sanga, ale oku u linga epulilo limue. Osimbu o sapela lomunu waco, o pondola oku sanga epuluvi lioku tukula ocisonehua cimue Cembimbiliya, kuenda oku waya ombuto yocili condaka ya Suku. (Uku. 11:6) Vamue va siata oku kuata onima yiwa poku fetika ombangulo loku tukula ulandu umue u vetiya omunu oku linga apulilo. Osimbu o kevelela ndotolo kosipitali, o pondola oku fetika ombangulo loku popia ndoco: “Ndi ka sanjuka calua eci ku keya otembo okuti si ka vela vali.”
7. Oku kũlĩhĩsa ekalo liomanu, ci tu kuatisa ndati oku eca uvangi ka wa sokiyiwile?
7 Oku kũlĩhĩsa ekalo liomanu, ci tu kuatisavo oku fetika ombangulo. Nda tua mola onjali yimue yi kasi lomãla vakuavituwa viwa, tu sukila oku u pandiya loku u pula ndoco: “Nye ca siata oku ku kuatisa oco omãla vove va lekise ovituwa viwa?” Manji umue ukãi eci a limbuka okuti vakuavo va talavayela kumosi kupange woku sanda eteku va kasi oku sapela, eye wa li kongela vombangulo yaco, loku tukula etosi limue liatiamẽla kovina va kala oku sapela. Eci a limbuka okuti ukãi umue kupange wa kala oku lipongiya oco a kuele, eye wo wĩha o Despertai! yi lombolola ndomo omunu a pondola oku liangiliyila ocipito cuvala. Kuenje, ca yulula onjila yoku sapela ovina viatiamẽla Kembimbiliya.
8. Alivulu etu a pondola oku tu kuatisa ndati oku fetika ombangulo?
8 Onjila yikuavo yoku fetika ombangulo, oku tangela alivulu vetu povitumãlo vina okuti omanu va pondola oku tu mola. Manji umue, wa siata oku yulula Utala Wondavululi ale o Despertai!, pocipama cimue ci vetiya, kuenje o fetika oku ci tanga. Nda wa limbuka okuti omunu umue o kasi oku lengelela vo revista yaco, u linga epulilo, ale o lombolola etosi limue liatiamẽla kocipama caco. Oku kuama onjila eyi, ca siata oku u kuatisa oku fetika ombangulo, kuenda oku eca uvangi ka wa sokiyiwile. Oku kapa alivulu etu pocitumãlo cimue okuti a muiwa la vakuetu kupange, ale kosikola, ci pondola oku va vetiya oku pula catiamẽla kalivulu aco.
9, 10. (a) Tu sanda ndati epuluvi lioku eca uvangi ka wa sokiyiwile? (b) Wa siata oku ci linga ndati?
9 Sanda Epuluvi Lioku Kunda: Omo okuti upange woku kunda u sukila oku lingiwa lonjanga, ka tu sukila oku tenda uvangi ka wa sokiyiwile ndocina cimue ka ci kasi vesokiyo lietu. Pole, tu sukila oku sanda epuluvi lioku eca uvangi ka wa sokiyiwile, osimbu tu amamako lovopange etu veteke leteke. Sokolola eci catiamẽla komanu o ka li sanga lavo, kuenda kũlĩhĩsa ndomo o ka fetika lavo ombangulo yimue yukamba. Kuata ocituwa coku ambata Embimbiliya kumue lalivulu akuavo, oco o kuatise vana va lekisa onjongole.—1 Pet. 3:15.
10 Omo okuti akundi vamue va kuete ocituwa coku sapela lomanu, va siata oku sanga epuluvi lioku eca uvangi ka wa sokiyiwile. Manji umue ukãi o kasi vosapalalo yi kuete olondavululi, wa siata oku kala pocitumãlo colomapalo ci kasi vosapalalo yaco. Kuenje, o linga omapalo yimue yi lekisa ovina via lulikiwa haivio via posoka vi sangiwa voluali. Eci omanu veya kokuaye loku komoha ovina viaco via posoka, eye o kuata epuluvi lioku fetika lavo ombangulo, kuenda o va sapuila ohuminyo Yembimbiliya yatiamẽla ‘kilu liokaliye, loluali luokaliye.’ (Esit. 21:1-4) Ove hẽ, o pondola oku sokolola olonjila vimue vi ku kuatisa oku eca uvangi ka wa sokiyiwile?
11. Tu linga ndati epasu komanu vana va lekisa onjongole poku eca uvangi ka wa sokiyiwile?
11 Pasuisa Vana va Lekisa Onjongole: Nda wa sanga omunu umue wa lekisa onjongole, sokiya otembo yoku u pasuisa. Citava okuti u sapuila ndoco: “Nda sola calua oku sapela love. Pi ndi pondola oku ku sanga oco tu amameko lombangulo yetu?” Akundi vamue va siata oku eca onumbi yonjo yavo, kuenda etendelo liavo liotelefone, kuenje va popia ndoco: “Nda sola calua ombangulo tua kuata. Nda o yongola oku kũlĩha ovina vikuavo viatiamẽla kueci tua sapela, tambula onumbi yonjo yange oco tu lisange vali.” Nda ku pondola oku pasuisa omunu wa lekisa onjongole, linga eliangiliyo oco ekongelo liocikanjo muna a sangiwa liece ekuatiso. Pole, o sukila oku soneha o formulariu losapi hati, Queira Revisitar (S-43) kuenje o yeca ku manji usonehi, wo vekongelo liene.
12. (a) Momo lie tu sukilila oku soneha otembo tua pesila koku eca uvangi ka wa sokiyiwile? (b) Onima yipi ya siata oku iyilila koku eca uvangi ka wa sokiyiwile? (Tala pokakasia losapi hati: “Uvangi ka wa Sokiyiwile, Weca Onima Yiwa!”)
12 Otembo tu pesila koku eca uvangi ka wa sokiyiwile, tu sukila oku yi kongela vorelatoriu yetu yupange woku kunda. O sukila oku soneha otembo yosi o pesila koku eca uvangi ka wa sokiyiwile, ndaño wa ci linga vakukutu amue vokuenda kueteke. Tu kũlĩhĩsi ndoco: Nda ukundi lukundi veteke limosi wa eca uvangi ka wa sokiyiwile vokuenda kuakukutu vatãlo, kesulilo liosãi yimosi, akundi voluali luosi, va pondola oku eca ci soka 17 kolohuluwa violowola!
13. Nye ci pondola oku tu vetiya oku eca uvangi ka wa sokiyiwile?
13 Tu kuete esunga lioku eca uvangi ka wa sokiyiwile, omo liocisola tu kuetele Suku, kuenda omanu. (Mat. 22:37-39) Esanju tu kuete, omo lioku sola ovituwa vi komohisa via Yehova, kuenda ocipango caye, vi tu vetiya oku kunda catiamẽla ‘kulamba weposo liuviali waye.’ (Osa. 145:7, 10-12) Esakalalo tu kuetele omanu li tu vetiya oku sandiliya otembo yoku kunda olondaka viwa, osimbu kuli epuluvi liaco. (Va Rom. 10:13, 14) Nda tua linga esokiyo liwa, loku lipongiya, vosi yetu tu pondola oku eca uvangi ka wa sokiyiwile, loku kuata esanju lioku sapula ocili condaka ya Suku komanu vakuavitima via sunguluka.
[Etondongolo kemẽla 4]
O pondola oku kuatisiwa locimaho coku sanga omanu kuenda oku fetika lavo ombangulo
[Etondongolo kemẽla 5]
Akundi valua omo lioku lekisa uloño woku fetika ombangulo, va siata oku kuama olonjila via litepa vioku eca uvangi ka wa sokiyiwile
[Okakasia kemẽla 5]
Olonumbi Vioku Fetika Ombangulo
◼ Likutilila oco o fetike ombangulo
◼ Nõla vana va lekisa ukamba, kuenda va ecelela oku sapela lavo
◼ Tulukila komunu wosi wa mola, loku memenako lesanju, kuenda tukula ondaka yimue yu vetiya
◼ Kala onjeveleli yiwa
[Okakasia kemẽla 6]
Uvangi ka wa Sokiyiwile Weca Onima Yiwa!
• Manji umue osimbu a talamela ekãlu liaye va kala oku semulula, wa kundila omanu vosi va kala ponele yaye, kuenje wa eca ukanda welaleko lioku yevelela ohundo yowiñi. Unyamo ukuavo eci a endele kohongele yofeka, manji umue wo lama lesanju, pole eye ko limbukile. Manji yaco wo lama, umue pokati kalume vana a ĩhile ukanda welaleko, osimbu a kala oku talamela ekãlu liaye lia kala oku semuluiwa! Ulume waco wa endele oku ka yevelela ohundo yowiñi, kuenje kesulilo liohongele, wa pinga elilongiso Liembimbiliya. Cilo eye kumue lukãi waye, va papatisiwa.
• Manji umue ukãi, wa lilongisa Embimbiliya lekuatiso liuvangi ka wa sokiyiwile, wa siata oku tenda akamba vomãla vaye vatatu ndocikanjo caye. Vocikanjo caco, mua kongela vana a lisungue lavo, olonjali a sanga kosikola, kuenda vana a sanga kohongele alongisi va siata oku linga lolonjali kosikola. Noke yoku lama omanu a sanga, o tukula olondaka vimue via leluka, pole, mua kongela ulandu umue watiamẽla Kembimbiliya okuti, wa siata oku u kuatisa oku tekula omãla vaye. Noke, o pongoluila ombangulo yaye kosapi yikuavo. Omo okuti o kuete ocituwa coku fetika ombangulo lomanu, ca siata oku u kuatisa oku lombolola ovina via lua viatiamẽla Kembimbiliya. Omo lioku kuama onjila yaco, wa kuatisa 12 komanu okuti cilo va papatisiwa.
• Manji umue ukãi, eci a nyuliwa lulume umue o talavaya kocisoko coku kuatisa vana va pesela ovina viavo, wa kuata epuluvi lioku u kundila. Noke, wo pulisa nda o yongola oku kuata uhayele wocili, esanju, kuenda omuenyo ko pui. Ulume waco wa tambulula hati, ndi yongola. Pole, wo pula ekalo liaco liwa manji a kala oku popia. Noke, manji wo lekisa olohuminyo vi sangiwa Vembimbiliya, kuenda wo wĩha limue pokati kalivulu etu, okuti wa li tanga lika eteke limosi kekumbi. Ulume waco wa fetika oku lilongisa Embimbiliya, loku endaenda kolohongele, kuenje, noke wa papatisiwa.
• Manji ukuavo ukãi, eci a linga ungende vombalãu, wa fetika oku sapela lukãi umue wa tumalẽle ponele yaye, kuenje, wa fetika oku u kundila. Eci va pitila, manji wa eca kokuaye onumbi yonjo yaye, letendelo liotelefone, noke wo vetiya okuti, nda umue Ombangi ya Yehova wa enda konjo yaye, citava oku pinga kokuaye elilongiso Liembimbiliya. Keteke likuavo, vamanji vavali akãi, va endele konjo yukãi waco. Kuenje, va fetika oku lilongisa laye Embimbiliya. Wa linga apongoloko lonjanga, noke wa papatisiwa, kuenda wa fetika oku songola alilongiso atatu Embimbiliya.
• Manji umue ulume okuti omeke o kuete 100 canyamo, haeye o kasi vonjo yoku tata vana va kuka, wa popia hati: “Tu sukila Usoma.” Ondaka eyi ya vetiya ovifumelu lolombeyi oku votola apulilo amue, kuenje manji wa kuata epuluvi lioku va lomboluila catiamẽla Kusoma. Umue ukãi o talavaya vonjo yaco, wa pula ku manji eci a ka linga Voluali Luokaliye. Manji wa tambulula hati: “Ovaso ange a ka patuluka, ndi ka enda ciwa, kuenda ndi ka timĩha osikaleta yange yovilema.” Omo okuti manji omeke, noke wa pinga kukãi waco oco o tangele o revista. Eci manji a nyuliwa lomõla waye ufeko, ukãi waco wa pinga komõla oco ambate orevista yaco konjo yaye. Noke, umue cifumela wa sapuila komõla wa manji hati: “Mulo vonjo yetu yoku tata vana va kuka, muli ombangulo yimue losapi yokaliye ya linga hati: ‘Tu sukila Usoma.’”
• Manji umue ukãi, eci a kala oku kevelela oco a iñile vonjo va landisa okulia kua pia, wa yeva alume vamue va kuka va kala oku li hoya catiamẽla kondaka yopulitika. Umue pokati kavo wa popia hati, olombiali ka vi tẽla oku tetulula ovitangi vietu. Noke manji wa popia hati: ‘Eli olio epuluvi lioku va kundila.’ Eye wa linga ohutililo yo vutima yi teta onimbu, kuenje wa amela ponele yavo. Noke yoku lama alume vaco, wa va sapuila eci catiamẽla Kusoma wa Suku okuti, owo u ka tetulula ovitangi viomanu, kuenje, wa eca ombrochura ya kala peka liaye. Noke, umue wamela ponele ya manji. Kuenje, manji wa sima okuti, u sapuila hati, kuende. Pole, onalavayi yo sapuila hati, wa yeva ombangulo yavo, kuenje, o yongolavo ombrochura. Onalavayi yikuavo ukãi, weyavo ponele yamanji loku lolula asuẽlela. Omo okuti wa lilongisile ale Embimbiliya, wa pinga ku manji oco a pitulule ovina a lilongisa.