Anga hẽ, o ka Fetika Elilongiso Liembimbiliya Kosãi ya Mbalavipembe?
1. Nye tu ka eca kosãi ya Mbalavipembe kupange woku kunda?
1 Kosãi ya Mbalavipembe, tu ka eca Utala Wondavululi kuenda o Despertai! kupange woku kunda. Poku pasuisa vana va lekisa onjongole, tu vetiyiwa oku eca kokuavo otratadu losapi hati, Ove hẽ o Yongola Oku Kũlĩha Ocili?, kuenda oku likolisilako oku fetika lavo elilongiso Liembimbiliya. Tu ci linga ndati poku va pasuisa?
2. Tu pondola oku kuama ndati otratadu losapi hati, Ove hẽ o Yongola Oku Kũlĩha Ocili?, poku fetika elilongiso Liembimbiliya eci tu pasuisa umue wa tambuile olorevista?
2 Ndomo tu Talavaya Lotratadu: Tu pondola oku popia ndoco: “Olorevista nda ku sila, vi vetiya omanu vakuavisoko viosi, kuenda vakuetavo oku tanga Embimbiliya. [Eca otratadu yaco komunu wa sanga, kuenda lekisa apulilo a sangiwa koñoño.] Lombolola okuti, apulilo aco a tambuluiwa lika lekuatiso Liembimbiliya. Noke pula ndoco: Anga hẽ wa li pulile ale ndoco?” Noke lietambululo liaye, lekisa kokuaye limue pokati katambululo a sangiwa votratadu yaco, kuenda tanga laye ocinimbu cimue Cembimbiliya ca tukuiwa. Lombolola okuti, ulandu tua konomuisa ndeti, umue pokati kovina Embimbiliya li longisa, kuenda eca kokuaye elivulu Embimbiliya li Longisa Nye? Citava okuti tu konomuisa lomunu waco ocinimbu catete vocipama a nõla. Ale tu lombolola ulandu u likuata lepulilo tua konomuisa votratadu. Tu pondola oku kuama olonumbi vi kuãimo:
● Anga Suku wa tu kapako muẽle? (kem. 9-11, ovin. 6-10)
● Anga hẽ ovoyaki kuenda ohali eteke limue vika pua? (kem. 12, ovin. 12-13)
● Nye ci pita letu eci tu fa? (kem. 59-60, ovin. 7-8)
● Ava va fa va kuete elavoko lipi? (kem. 71, ovin. 13-15)
● Ndi pondola oku linga ndati olohutililo vi yeviwa la Suku? (kem. 166-167, ovin. 5-8)
● Ndi kuata ndati esanju komuenyo? (kem. 9, ovin. 4-5)
3. Tu kuama ndati olonjila via litepa poku sapela lomanu tu sanga kupange woku kunda?
3 Nda omunu tua sanga kepasu liatete ka kuete otembo yoku sapela oco tu lekise ndomo tu fetika laye elilongiso Liembimbiliya lekuatiso lielivulu Embimbiliya li Longisa Nye, tu pondola oku sokiya oku tiuka eteke likuavo, oco tu amameko lombangulo yetu. Nda ka lekisa onjongole, tu pondola oku konomuisa laye apulilo amue a sangiwa votratadu yaco, osimbu ka tua ecele kokuaye elivulu. Omo liaco tu talavayi ciwa lotratadu yilo vokuenda kuosãi ya Mbalavipembe, locimãho coku fetika elilongiso Liembimbiliya, oco tu kuatise vana va kuete onjongole yoku “kũlĩha ocili.”—Yoa. 8:31, 32.