Apulilo Vatambuluiwa

◼ Nye tu sukila oku linga oco ovipama violohongele viekongelo vi malusuiwe votembo ya sokiyiwa?

Eci tu linga ovina vimue viwa lakamba vetu, otembo yi pita lonjanga. Kuenje, ka ca lelukile oku malusula ovipama kohongele votembo ya sokiyiwa. Nye ci pondola oku tu kuatisa?

Fetika votembo ya sokiyiwa. Eci ku lingiwa ohongele lekongelo liosi, osimbu handi ka ya fetikile, ciwa oku laleka vamanji oku kala povitumãlo viavo eci ku kamba ekukutu limosi ale avali, oco ohongele yi fetike votembo ya sokiyiwa. (Uku. 3:1) Volohongele vina okuti mua kongela ovimunga vitito ndeci, olohongele viupange woku kunda, ka ci sukila oku kevelela omanu vana va cilua.

Lipongiya ciwa. Onjila yimue yi kuatisa oku linga ovina votembo ya sokiyiwa, oku lipongiya selo. Kũlĩhĩsa ciwa ocimãho cocipama wa tambula. Limbuka atosi a velapo a kasi vocipama caco kuenda a lombolola ciwa. Yuvula oku lombolola ovolandu ka a kuete esilivilo. Leluisa ulandu wove. Nda okuti vonepa yaco mua kongela oku linga ovindekaise ale apulilo, osimbu handi eteke liaco ka lia pitilile, lipongiyi selo. Nda citava, kũlĩhĩsa lutate otembo yonepa yove osimbu o kasi oku yi pongiya lolukandi.

Tepa tepa ocipama. Ci kale okuti onepa yove yohundo, ale yoku linga apulilo kolonjeveleli, ciwa okuti o tepa tepa ocipama volonepa vitito. Nõla otembo o ka pesela konepa lonepa, kuenda ci soneha konẽle yopapelo. Vokuenda kuocipama cove, lavulula ciwa otembo. Poku linga ocipama cimue ci kuete apulilo, yuvula oku vangula calua kefetikilo oco ci ku kuatise oku lombolola ciwa ovina vi kuete vali esilivilo poku malusula ocipama. Vamanji vakuakusongola elilongiso Liutala Wondavululi va sukila oku sokiya otembo yi tẽla yoku linga apulilo a sangiwa vokakasia koku pitulula. Ovo va sukilavo oku kuata utate oco ka va ka pesele otembo ya sokiyiwila ocisungo kuenda ohutililo.

Malusula votembo ya sokiyiwa. Nda okuti ohongele yimue yi kuete olonepa vialua ndeci Ohongele Yupange, ohundi lohundi yi kuete ocikele coku kũlĩha otembo yoku fetika onepa yaye kuenda yoku malusula. Nye ci lingiwa nda ohongele yi kasi oku pitãhala otembo ya sokiyiwila? Manji umue ale vakuavo va kuamamo citava okuti va teta onimbu poku lombolola ño atosi a velapo oco ohongele yi malusuiwe votembo ya sokiyiwa. Poku ci linga, ci lekisa okuti ove wulongisi umue wa loñoloha.

Olonjeveleli vi pondola oku kuatisa manji o songola poku eca atambululo a teta onimbu loku tukula lika atosi a velapo. Omo liaco, vosi yetu tu kuete epuluvi lioku eca ekuatiso kolohongele oco ‘ovina viosi vi sokiyiwe ciwa loku lingiwa lesumbilo.’—1 Va Kor.14:40.