Setukuli Ekolelo Liavo
1. Elivulu lipi tu ka kuama Kelilongiso Liembimbiliya Vekongelo oku upisa kosemana 19 ya Mbalavipembe?
1 Oku upisa kosemana 19 ya Mbalavipembe wo 2015, tu ka fetika Elilongiso Liembimbiliya Vekongelo velivulu losapi hati, Setukuli Ekolelo Liavo. Elivulu liaco li lombolola ovolandu alume lakãi vakuekolelo va soka 14 va tukuiwa Vembimbiliya. Olio lia sonehiwa lonjila yimue yi tu kuatisa oku sokolola omanu vaco kuenda ndomo va tẽla oku li yaka lovitangi omo lioku fendela Yehova. Li lombololavo ovolandu a tu kuatisa nda tua a kapako komuenyo koloneke vilo.—Va Hev. 6:12.
2. Lombolola ovina vimue vi sangiwa velivulu Setukuli Ekolelo Liavo.
2 Ceci ci Sangiwamo: Velivulu Setukuli Ekolelo Liavo, mua kongela anyamo kuenda omapa yi tu kuatisa oku limbuka otembo locitumãlo omunu lomunu a kala. Vocipama locipama mu sangiwa okakasia losapi hati, “Apulilo Oku Sokolola . . . ” okuti ka tu kuatisa oku sokolola kovolandu loku kapako ovina tua lilongisa. Velivulu liaco mu sangiwavo alitalatu a posoka, ovolandu, oviluvialuvia vi tu kuatisa oku sokolola ovolandu aco.
3. Nye tu sukila oku linga oco tu kuatisiwe lelilongiso lielivulu liaco?
3 Ndomo tu Pondola Oku Kuatisiwa: Ukanda Wosungu Yolombangi Via Yehova u tu vetiya lolondaka evi: “Li tanga levando, kuenda sokiya ciwa otembo yove. Sokolola lutate ovina wa tanga. Seteka oku limbuka eci omanu va tukuiwa Vembimbiliya va kala oku sima oco o mole ovina ovo va mola. Sokisa ndomo va kala eci va pita lovina viaco leci o yongola oku linga poku pita locitangi cimue.” Omo liaco, oku sokolola ovina viaco ka ci lomboloka oku vi tatãla, pole, ci lomboloka oku sokolola eci ulandu waco u popia kuenda oku kũlĩha omanu va tukuiwa vulandu waco. Tu sukila oku sanda otembo kuenda oku sokolola lutate kovina viaco. (Neh. 8:8) Nda elilongiso liaco li fetikila vokati kocipama, manji o songola o pitulula ovinimbu via pita vokuenda kuolosengundo 30 ale 60. Nda velilongiso liaco ka mua kongelele okakasia losapi hati, “Apulilo Oku Sokolola,” kesulilo liaco citavavo oku linga epulilo limosi ale avali oku pitulula. . . .
4. Momo lie tu sukilila oku lilongisa elivulu Setukuli Ekolelo Liavo?
4 Tu kasi voluali lumue okuti eteke leteke lu seteka oku honguisa ale oku nyõla ekolelo lietu. Elivulu eli kuenda ovipama vimuamue vi sangiwa Vutala Wondavululi, viosi olombanjaile via tunda ku Yehova oco vi tu kuatise oku pamisa ekolelo lietu. (Tia. 1:17) Tu ka kuatisiwa calua poku kala Kelilongiso Liembimbiliya Vekongelo olonjanja viosi, loku eca atambululo osimbu tu lilongisila kumosi elivulu liaco!