Ku ka Eciwa Uvangi Umue wa Velapo
1. Nye vali ci pondola oku komõhisa omanu va lalekiwa, okuti ohundo Yonjivaluko hayoko lika? Ci lombolola.
1 Eteke lipi? Kuteke Wonjivaluko. Kua siata oku lingiwa alikolisilo alua oku laleka omanu oco va liongolole kumosi letu. Omanu vana va lalekiwa ka va komõhela lika ovina va yeva. Ukãi umue wa kala Konjivaluko, wa lombolola ovina a mola ndeci, ukamba omanu vosi va likuetele, eposo liocitumãlo kuenda ndomo ca tungiwa loku yelisiwa, la vamanji va lieca olumue. Omo liaco, vosi yetu oku kongelamo manji o linga ohundo, tu sukila oku kuatisa oku eca uvangi keteke eli lia velapo vunyamo.—Va Efe. 4:16.
2. Omunu lomunu pokati ketu o pondola ndati oku eca uvangi ku vana va lalekiwa?
2 Oku Lama Akombe Lesanju: Oku yolela kuetu akombe locisola, ku ka eca uvangi uwa. (Yoa. 13:35) Ndaño ku pondola oku sapela lomanu vosi, pole citava oku lama omunu o lisungue love loku u sapuila onduko yove. (Va Hev. 13:1, 2) Sandiliya vana veya onjanja yatete okuti ka va kũlĩhĩle omunu laumue. Pamue ovo va tambulavo ukanda umue welaleko. Citava okuti o va pula ndoco: “Anga eyi oyo onjanja yatete oku iya kulo?” Va laleka oku tumãla ponele yove, kuenda va tambulula ciwa eci va ku pulisa. Nda ekongelo liene li sukila oku tunda lonjanga oco likuavo li iñile, o pondola oku popia ndoco: “Ndi yongola oku kũlĩha ocisimĩlo cove catiamẽla kohongele yilo. Ndi pondola oku ku sandiliya ndati?”
3. Tu yolela ndati vana va liwekapo oku kunda?
3 Yolela Vana va Liwekapo Oku Kunda: Ocili okuti akundi vana va liwekapo va ka kala kocipito caco, oku kongelamo vana va endaenda ño kocipito Conjivaluko unyamo lunyamo. Va yolela loku ecelela oku limbuka okuti ove wa sanjukila oku kala lavo kohongele. (Va Rom. 15:7) Akulu vekongelo va pondola oku enda konjo yavo loku va vetiya oku amamako oku likongela lekongelo. Tu likutilila okuti olonjeveleli viosi vi vetiyiwa oku sivaya Suku okuti ka va ci lingi lika omo liovina va yeva, pole va ci lingila omo liovina va mola, ‘ndonima yovilinga vietu viwa’.—1 Pet. 2:12.