Va Yoleli!
1. Ocipito cipi ci tu ĩha epuluvi lioku eca uvangi komanu, kuenda momo lie?
1 Ocipito Conjivaluko ci tu ĩha epuluvi lioku kundila omanu. Kapelako okuti, unyamo ulo, pamue Kocipito Conjivaluko ku ka kala eci ci pitahãla ekũi kolohuluwa viomanu va ka yevelela ovina vivali via velapo viatiamẽla kocisola ca lekisiwila vocisembi ca Yesu. (Yoa. 3:16; 15:13) Ovo va ka lilongisa eci catiamẽla kasumũlũho a tunda kombanjaile ya eciwa la Yehova. (Isa. 65:21-23) Manji o ka linga ohundo, hayeko lika o ka kuata ocikele coku eca uvangi Kocipito Conjivaluko. Pole, vamanji vosi va kuete epuluvi lioku eca uvangi komanu poku va yolela locisola.—Va Rom. 15:7.
2. Nye tu sukila oku linga poku yolela akombe?
2 Ku ka yuvule oku sapela lavakuene pole, osimbu ohundo ka ya fetikile, lianja lomanu va tumala ponẽle yove kuenda sapela lavo. Momo akombe pamue ka va lianji omo liosõi. Nda tua va lama lesanju ci va kuatisa oku lianja. Eci o mola okuti omunu umue wa lalekiwa weya, u pulisa nda oyo onjanja yatete eya kohongele yetu, kuenda nda wa kũlĩha ale manji umue vekongelo. tumãla ponele yaye loku u kuatisa oku sanga ovinimbu Viembimbiliya kuenda ovisungo vi imbiwa. Nda Vonjango Yusoma mu liongoluila ekongelo likuavo, citava oku u lomboluila esokiyo liaco. Kesulilo liohundo u sapuila okuti o yongola oku u kuatisa oku tambulula apulilo aye. Nda ekongelo liene li sukila oku tunda lonjanga oco mu iñile ekongelo likuavo, u sapuila ndoco: “Ndi yongola okuti o ndi sapuilako nda wa sola ovina wa yeva kohongele. Ndi pondola ndati oku li sanga love?” Noke, linga lonjanga esokiyo lioku pasuisa omunu wa lekisa onjongole. Akulu vekongelo va sukila oku kũlĩhĩsa vana veya Kocipito Conjivaluko okuti, va liwekapo oku kunda.
3. Momo lie oku tambula lesanju akombe vosi veya kocipito Conjivaluko ci kuetele esilivilo?
3 Kakombe valua, ci ka kala onjanja yatete oku mõla esanju, ombembua, kuenda ukamba u kasi pokati kafendeli va Yehova. (Osa. 29:11; Isa. 11:6-9; 65:13, 14) Nye akombe vaco va ka ivaluka noke yocipito caco? Ocisola tu lekisa poku va yolela.