Oloneke Vitatu Vioku li Pamisa Kespiritu
1. Nye tu lavoka oku tambula kohongele yofeka yunyamo ulo?
1 Ndaño oluali lulo lua Satana lua hongua kespiritu, Yehova o kasi oku amamako oku pamisa afendeli vaye. (Isa. 58:11) Eliangiliyo limue Yehova a tu kolisa lalio, olohongele viofeka vi lingaiwa unyamo lunyamo. Osimbu tu lavoka ohongele yofeka yunyamo ulo, ndamupi tu lipongiya oco tu pamisiwe loku pamisavo vakuetu kespiritu?—Olosap. 21:5.
2. Ovina vipi tu sukila oku pongiya?
2 Nda handi kua lipongiyile, linga esokiyo liove kuenda pinga kupange oco o kale kohongele yofeka oloneke viosi vitatu. Wa kũlĩhĩsa ale otembo ambata poku enda kocitumãlo cohongele yofeka eteke leteke oco o sange omangu osimbu ovipama ka via fetikile? Ka tu yongola oku pumba okulia kuespiritu ku pamisa kuna Yehova a tu pongiyila! (Isa. 65:13, 14) Wa sokiya ale oku o ka sikila kuenda ocendelo?
3. Olonumbi vipi vi ka tu kuatisa kumue lepata lietu oku upa esilivilo kovipama viohongele?
3 Nye ci ka ku kuatisa oku yevelela lutate ovipama viosi? Vokuenda kuoloneke viohongele, puyuka ciwa koñolosi. Luluvalela ku manji o linga ohundo. Kuama ovisonehua viosi Vembimbiliya liove. Soneha ño atosi a velapo. Apata a sukila oku tumãla pamosi oco olonjali vi kuatise omãla oku yevelela lutate. (Olosap. 29:15) Citava oku sapela lepata catiamẽla kulandu wohongele eteke leteke koñolosi. Oco epata liove li amameko oku pamisiwa ndaño muẽle noke yohongele, citava okuti vu pesela akukutu amue vokuenda Kuefendelo Liepata koñolosi oco vu konomuisi atosi vu sukila oku kapako.
4. Tu kuatisa ndati vamanji vekongelo lietu oku pamisiwa kespiritu?
4 Kuatisa Vakuene Oku Pamisiwa: Tu yongola okuti vakuetu va pamisiwavo konepa yespiritu. Vekongelo liene muli hẽ akulu vendamba kuenda omanu vakuavo va sukila ekuatiso oco va ende kohongele yofeka? O pondola hẽ oku va kuatisa? (1 Yoa. 3:17, 18) Akulu vekongelo va kuete ocikele coku kũlĩhĩsa nda vamanji vaco va tambula ekuatiso va sukila.
5. Tu ka eca ndati otuikanda tuelaleko pocitumãlo cohongele yofeka? (Talavo okakasia ka sangiwa konano.)
5 Ndeci ca lingiwa kanyamo a pita, eci ku kamba olosemana vitatu, tu ka eca otuikanda tuoku laleka omanu oku enda kohongele yofeka. Akongelo te a kuata ocimãho coku eca otuikanda tuavo tuosi, kuenda oku tokeka ocikanjo cavo. Nda toke kesulilo lioku ava otuikanda tuoku laleka handi vepata wa supisipo tumue, tu ambati kohongele yofeka, oco tu aviwe poku eca uvangi ka wa sokiyiwile. Esapulo liatiamẽla koku talavaya lotuikanda tuaco, li ka eciwa kohongele Votãlo. Nda vepata handi wa supisipo vali otuikanda tukuavo, tu eciwe ku manji ukuakutumãlisa eci vu pitĩla pocitumãlo cohongele. Siapo okokanda kamue oco o ka kuame vokuenda kuohundo ya sulako Calumingu.
6. Tu lekisa ndati ovituwa viwa kohongele yofeka?
6 Ovituwa Viwa vi Pamisa: Osimbu “omanu va linga vakuakulisola,” kuenda ka va kapeleko ovisimĩlo via vakuavo, oku kala pokati Kakristão va likolisilako oku lekisa ovituwa viwa, ci pamisa calua! (2 Tim. 3:2) Tu lekisa ovituwa viwa poku iñila levando pocitumãlo lesumbilo eci olombundi vi yikuiwa kelivala 6:00 poku selekela olomangu vana tu endela lavo vocendelo cimuamue, vana tu kasi konjo yimuamue, ale olondonge vietu. Eci usongui wovipama a pinga oco tu tumãle kolomangu vietu osimbu ku yeviwa ovisikilo vioku fetika, tu sukila oku kuama olonumbi viaco. Tu lekisa ovituwa viwa poku yika olotelefone vietu oco ka vi ka tateke vakuetu oku yevelela lutate. Tu lekisavo ovituwa viwa poku yuvula oku vangula, oku tuma ovikanda votelefone, oku lia, loku ñuala ñuala volokololo vokuenda kuovipama.
7. Ndamupi tu li pamisa pokati osimbu tu kala la vamanji?
7 Ukamba u Pamisa: Olohongele viofeka, vi tu ĩha apuluvi oku pamisa omunga lukamba tu likuetele la vamanji. (Osa. 133:1-3) Momo lie ku ‘lianjela’ poku sandiliya vamanji va tunda kakongelo akuavo? (2 Va Kor. 6:13) Vokuenda kuoloneke viaco, kuata ocimãho coku kũlĩha omunu umue ale epata limue. Elivala lionanya li tu ĩha epuluvi lioku ci linga. Ambata okulia kumue kua lela oco o lie kumue la vamanji okuti ku tundi vali kosamua oku ka landa okulia ale oku lila vo bare. Eci ci tu kuatisa oku sanga akamba vokaliye hao a kala otembo yosi.
8. Momo lie ci kuetele esilivilo oku lieca olumue koku talavaya kohongele yofeka, kuenda tu ci linga ndati?
8 Eci tu linga upange u kola kumue la vamanji, tu pamisiwa calua! O pondola hẽ oku lieca olumue koku kuatisa oseketa yimue ale oku kuatisa ekongelo liene koku yelisa ocitumãlo? (Osa. 110:3) Nda ku kuete ocikele lacimue, pinga Koseketa Yupange Woku Lieca Olumue kohongele. Nda omanu valua va talavayela kumosi, upange u lingiwa lesanju kuenda u leluka.
9. Momo lie tu sukilila oku lekisa ovilinga viwa kuenda oku wala ciwa vokuenda kuohongele yofeka?
9 Ovilinga Vietu vi Pamisa Vana va tu Lete: Tu sukila oku lekisa ovilinga viwa oloneke vitatu viohongele, okuti ka tu vi lekisa lika vokuenda kuovipama. Vana va tu lete osimbu tu kasi pocitumãlo cohongele, va pondola oku pamisiwa poku limbuka oku litepa ku kasi pokati ketu la vana okuti Halombangiko via Yehova. (1 Pet. 2:12) Oku wala ciwa loku liposuisa kuetu eci tu kasi pocitumãlo cohongele yofeka, oku tua sikila, kuenda vo bare, ku sivaya Yehova. (1 Tim. 2:9, 10) Nda tua wala otuikanda tuetu tuvangi tuohongele yofeka, omanu va ka limbuka okuti Tulombangi via Yehova. Eci ci tu ĩha epuluvi lioku va lomboluila ovina viatiamẽla kohongele kuenda oku va kundila.
10. Ovolandu api a lekisa onima iyilila koku lekisa ovituwa viwa Viakristão?
10 Ovilinga vietu viwa vi vetiya ndati vakuetu vokuenda kuohongele yofeka? Ukanda umue wasapulo wa lombolola okuti usongui wo pocitumãlo cimue pa lingiwila ohongele yofeka wa popia hati: “Omanu va lekisa ovituwa viwa. Tu yongola okuti ovo va kala kulo anyamo osi.” Unyamo wa pita omunu umue okuti Hambangiko ya Yehova wa nyelisa ocipete caye vowotele, muna mua sikilile ava va endele kohongele yofeka. Eci va tiula ocipete caco kusongui wo wotele lovina viosi via kalamo, usongui wa sapuila muẽle ukuacipete hati: “Ocipete cove ca moleha omo Olombangi via Yehova via lingila ohongele yavo palo posongo, kuenda valua pokati kavo va sikĩlile mulo vowotele. Nda ka ca kaile ovo, ocipete cove nda ka ca molehele.”
11. Osimbu tu lavoka ohongele yofeka, ocimãho cipi tu sukila oku kuata, kuenda momo lie?
11 Olohongele viofeka viunyamo ulo, ndopo vi fetika. Vamanji va pesela otembo yalua kuenda va likolisilako koku pongiya ovipama via sunguluka haivio vi pamisa. Kuata ocimãho coku enda kohongele yofeka oloneke viaco vitatu, loku lipongiyila oku tambula ovina Yehova kuenda ocisoko caye va ku sokiyila. Nõlapo oku pamisa vakuene, lovituwa viove viwa, kuenda oku linga akamba vokaliye, loku lekisa ovilinga viwa. Pamue ove kuenda vakuene vu liyeva ndeci umue wa kalavo kohongele unyamo wa pita wa soneha hati: “Si tẽla oku lombolola esanju nda yeva!”
[Etosi lia velapo kemẽla 4]
Ndeci ca lingiwa kanyamo a pita, eci ku kamba olosemana vitatu, tu ka eca otuikanda tuoku laleka omanu oku enda kohongele yofeka
[Etosi lia velapo kemẽla 5]
Tu Eca Ndati Otuikanda Tuoku Laleka Omanu?
Oco tu tokeke ocikanjo cetu, tu sukila oku teta onimbu. Tu pondola oku popia ndoco: “Kalunga. Tu kasi oku laleka omanu kocipito cimue ci kuete esilivilo ci ka lingiwa koluali luosi. Okokanda aka kove. O pondola oku sangamo olonumbi viatiamẽla kocipito caco.” Okokanda kaco ka sandekiwa locimãho coku vetiya onjongole yomanu, omo liaco ka eca ku muẽleanjo oco a ka tange. Lekisa esanju. Kesulilo liosemana poku eca otuikanda tuaco, citava oku ecavo Utala Wondavululi kuenda o Despertai!.
[Etosi lia velapo kemẽla 6]
Oku wala ciwa loku liposuisa kuetu pocitumãlo cohongele yofeka, oku tua sikila, kuenda vo bare, ku sivaya Yehova
[Etosi lia velapo kemẽla 7]
Nõlapo oku pamisa vakuene, lovituwa viove viwa, kuenda oku linga akamba vokaliye, loku lekisa ovilinga viwa
[Okakasia kemẽla 4-7]
Olonumbi Viohongele Yofeka Yunyamo wo 2011
◼ Elivala Lioku Fetika Ovipama: Vokuenda kuoloneke vitatu, ovipama viohongele yofeka vi ka fetika kelivala 8:20. Apito a ka yuluiwa kelivala 6 komẽle. Eci manji o songola ovipama a tukula ovisikilo vioku fetika, vosi tu sukila oku tumãla polomangu vietu, oco tu fetike ciwa ohongele. Votãlo kuenda Casapalo, ohongele yi ka malusuiwa kelivala 15:55, pole, Calumingu yi ka malusuiwa kelivala 14:40.
◼ Ovitumãlo Vioku Yeka Oviendelo: Kolohongele viofeka, ku sangiwa ocitumãlo cimue coku yeka oviendelo okuti, ka ci sukila oku feta. Pole, oviendelo vi ka kapiwa loku kuama otembo omunu a pitila. Oviendelo via vana va lemãla, ovio lika vi kuete ovitumãlo via selekiwa. Omo okuti ovitumãlo vioku yeka akãlu vitito, nda citava, vamanji vamue poku enda kohongele, va sukila oku linga eliangiliyo lioku li kongela vakãlu amue.
◼ Oku Seleka Olomangu: Citava lika oku selekela olomangu vana wendeli vocendelo cimuamue ale, vana u kasi lavo konjo yimuamue, kuenda vana va kasi oku lilongisa love Embimbiliya.—1 Va Kor. 13:5.
◼ Onanya: Nena okulia kuove oco ku ka tunde pocitumãlo cohongele oku ka landa okulia kelivala lionanya. Ku ka ambate ekualu lina okuti ka li iñila vemehi liomangu. Ka ca sungulukile oku nena ekualu linene lioku ambata okulia, kuenda olokopo, ale ovikuata vikuavo vi tetuka lonjanga.
◼ Olombanjaile: Tu lekisa olopandu keliangiyo lia lingiwa poku eca olombanjaile vietu kohongele yofeka, oco vi kuatise kupange woku kunda u kasi oku lingiwa voluali luosi. Nda umue wa eca ombanjaile yopapelo yoku tambula olombongo kombango, ku sonehiwe hati, ya loña ko “Associação das Testemunhas de Jeová.”
◼ Oku Lemehiwa Kuenda Oku Sakuiwa Kuonjanga: Nda kua moleha umue o sukila oku sakuiwa lonjanga, citava oku vangula la manji umue ukuakutumãlisa o kasi ocipepi laye. Noke, eye o ka tuala ocitangi caco Koseketa Yoku Sakula, kuenda vamanji vaco va ka eca ekuatiso li sukiliwa. Kuenje nda kua moleha ocitangi cimue conjanga vamanji va talavaya koseketa yoku sakula va ka telefonalela kosipitali oku pinga ekuatiso nda ci sukiliwa.
◼ Ovihemba: Nda kosipitali va ku kisika oku nyua ovihemba vimue, ciwa oku ambata evi vi tẽla, momo kocitumãlo cohongele ka ku ka kala ovihemba viosi.
◼ Olosapato: Unyamo lunyamo kua siata oku kala omanu valua va li lemẽha omo liolosapato. Omo liaco, wala olosapato via sunguluka, vina vi kusua ciwa okuti vi ku ecelela oku liatela ciwa posi ndaño pana pa sielena.
◼ Ovisitatũi: Pokati kolohongele viofeka vi ka lingiwila Konjango yo ko Viana, ku ka kala eliangiliyo lioku pongoluila ulandu wovipama Velimi Lioku Ilaika.
◼ Otuakãlu Tuoku Ambata Oloñaña: Otuakãlu tuoku ambatela oloñaña, ka citava okuti, tu ambatiwa kohongele yofeka. Pole, citava lika oku ambata uhamba woloñaña okuti wecelela oku u kapa ponele yomangu yolonjali.
◼ Ulela Welemba: Olohongele vialua viofeka via siata oku lingiwila vocitumãlo cimue okuti, ka mu piti ofela yalua. Omo liaco, ciwa okuti, poku liwaveka ulela u kuete elemba, tu likapa ño katito oco ka ci ka pange lãvi vamanji vana va kuete uvei wesuka ale uvei ukuavo.—1 Va Kor. 10:24.
◼ Oloformulariu (S-43) Queira Visitar: Vo formulariu losapi hati, Queira Visitar, mu sonehiwe olonumbi viatiamẽla komanu vana va lekisa onjongole eci va tambula uvangi kepuluvi liohongele yofeka. Akundi va sukila oku nena kohongele o formulariu yimosi ale vivali. Noke yoku soneha vo formulariu yaco olonumbi vi sukiliwa, citava oku yeca kukulu wekongelo usonehi.—Tala Upange Wetu Wusoma wa Kuvala wo 2009, kemẽla 4.
◼ Upange Woku Lieca Olumue: Tu pondola oku kuata esanju lialua nda tua lieca olumue kovopange a sukiliwa kohongele yofeka. (Ovil. 20:35) Nda umue o yongola oku lieca olumue, citava oku sapela la vamanji va talavaya Voseketa Yupange Woku Lieca Olumue kohongele yofeka. Omãla vana va kuete 16 kanyamo, va pondolavo oku ci linga, poku kuama olonjali viavo, ale omunu ukuavo ukulu okuti, wa taviwa lolonjali viavo.