Ovituwa vi Sivaya Suku
1. Ovituwa vipi Olombangi Via Yehova via siata oku lekisa poku enda kolohongele viofeka?
1 Poku enda kolohongele viofeka, tu limbukiwa lonjanga. Kolonepa vimue, kua siata oku lingiwila olohongele, ovingungu viasapulo kuenda vi yevalisa esapulo liaco oco omanu va kũlĩhe oku tu liongoluila. Volowotele kuenda vo lo bare, mua siata oku yuka vamanji veya kohongele, kuenje omanu valua va limbuka ndomo va wala ciwa lotuvikanda tuohongele. Omo liaco, olonumbi vi kuãimo vi tu kuatisa oku sivaya Suku poku lekisa ovituwa viwa, eci tu enda kohongele yofeka.—1 Pet. 2:12.
2. Uwalo wetu poku enda kohongele weca ndati esivayo ku Suku?
2 Uwalo wa Sunguluka: Tu sukila oku wala ciwa poku enda kohongele yofeka. Omo liaco, otembo yosi tu sukila oku wala loku liposuiwa ciwa, ci kale eci tu sandiliya oku tu sikĩla, leci tu enda vo bare, ale poku landa ovina vimue vovenda, kuenda poku linga ovina vikuavo, ovituwa vietu viwa vi ka vetiya omanu. Ndaño okuti olonjanja vimue ka tu wala olofatu, haimo lumue, tu sukila oku wala uwalo wa sunguluka una ka u kutisa osõi. Kuenje, omanu va ka limbuka okuti tu kuete ovituwa via litepa lomanu vakuavo. (Va Rom. 12:2) Handi vali, tu sukila oku wala okokanda kohongele, oco tu ece uvangi komanu loku limbukiwa la vamanji vakuavo.
3. Tu lekisa ndati epandi lesumbilo?
3 Epandi Lesumbilo: Omo voluali lulo, omanu va linga vakuakulisola, haivo vakualutukãi, oku kala vakuepandi loku lekisa esumbilo ku ka vetiya olonalavayi vio violowotele lo vo lo bare oku tu sanjukila! (2 Tim. 3:2) Omo liaco, eci epuluvi li pitĩlapo, tu sukila oku tumãla, kuenda poku tambula alivulu tu kala kulala okuti, ka tu litendi lika etu muẽle, pole, tu sukilavo oku kapako omanu vakuavo. (1 Va Kor. 10:23, 24) Omunu umue noke yoku kala kohongele yofeka, wa popia hati: “Si ivaluka olohundo via lingiwa keteke liaco, pole, eci ca ndi komõhisa calua ovituwa viwa Violombangi Via Yehova.”
4. Momo lie tu sukilila oku lieca olumue kovopange ohongele yofeka nda ekalo lietu li ecelela?
4 Oku Lieca Olumue: Ocituwa coku lieca olumue ondimbukiso Yakristão vocili. (Osa. 110:3) O pondola hẽ oku lieca olumue oco o kuatise kovopange a ka lingiwa kohongele yofeka? Kohongele yimue yofeka, vamanji va soka 600 okuti, alume lakãi, va liecele olumue oku yelisa ocitumãlo, osimbu ovipama ka via fetikile. Noke, omunu vamue va talavaya pocitumãlo caco va popia vati: “Ka tua la mola ocina cimue ci komõhisa ndeci! Ka ca lelukile oku tava okuti, omanu vosi ava va lieca olumue.” Omo liaco, tu lavoka okuti ohongele yofeka yi ka lingiwa unyamo ulo wo 2013, yi tu ĩha epuluvi lioku yevelela ovilongua vi tunda ku Suku, kuenda oku u sivaya.
[Okakasia on pages 3-6]
Olonumbi Viohongele Yofeka Yunyamo wo 2013
◼ Elivala Lioku Fetika: Apito a ka yuluiwa kelivala 6 komẽle. Vokuenda kuoloneke vitatu, ovipama viohongele yofeka vi ka fetika kelivala 8:20. Eci usongui wovipama a tukula ovisikilo vioku fetika, vosi tu sukila oku tumãla kolomangu, oco tu yevelele ciwa ulandu wohongele. Votãlo kuenda Casapalo, ohongele yi ka malusuiwa kelivala 15: 55, pole, Calumingu yi ka malusuiwa kelivala 14:40.
◼ Oku Yeka Oviendelo: Kolohongele viofeka, ku sangiwa ocitumãlo cimue coku yeka oviendelo okuti, ka ci sukila oku feta. Pole, oviendelo vi ka kapiwa kulala loku kuama otembo omunu a pitĩla. Kuli ocitumãlo cimue ca sokiyiwila lika oviendelo via vana va lemãla. Omo okuti ovitumãlo vioku yeka akãlu vitito, vamanji vamue poku enda kohongele, va endela lika vekãlu limosi.
◼ Oku Seleka Olomangu: Citava lika oku selekela olomangu vana wendeli vocendelo cimuamue, ale vana vu kasi lavo konjo yimuamue, kuenda vana o longisa Embimbiliya. Vamanji vana va kuka lava va vela, citava okuti ka va pondola oku tumãla kumue lepata liavo. Omo liaco, tu pinga okuti, vu va sokiyila olomangu viavo kuenda vana va kasi oku va tata.—1 Va Kor. 13:5.
◼ Onanya: Ambata okulia kuove oco ku ka tunde pocitumãlo cohongele oku ka landa okulia kelivala lionanya. Ku ka ambate ekualu lina okuti ka li iñila vemehi liomangu. Ka ca sungulukile oku nena ekualu linene lioku ambata okulia, kuenda olokopo, lovikuata vina vi tetuka lonjanga.
◼ Olombanjaile: Tu lekisa olopandu keliangiliyo lia lingiwa poku eca olombanjaile vietu kohongele yofeka, oco vi kuatise kupange woku kunda u kasi oku lingiwa voluali luosi. Nda umue wa eca ombanjaile yopapelo yoku tambula olombongo kombango, ku sonehiwe hati, ya loña ko “Associação das Testemunhas de Jeová.”
◼ Ovihemba: Nda wa tambula ovihemba vimue kosipitali, ciwa oku ambata evi vi tẽla, momo kocitumãlo cohongele ka ku ka kala ovihemba viosi. Oloseringa, lolonguya via vana va kuete uveyi wodiabete ka citava oku vi kapa vekualu liovinene pocitumãlo cohongele ale kowotele.
◼ Olosapato: Unyamo lunyamo kua siata oku kala omanu valua va li lemẽha omo liolosapato. Omo liaco, wala olosapato via sunguluka, vina via soka okuti, o liatela ciwa posi, ndaño pana pa sielena.
◼ Otuakãlu Tuoku Ambata Oloñaña: Otuakãlu tuoku ambatela oloñaña, ka citava okuti, tu kapiwa apa o ka tumãla kohongele yofeka. Citava lika oku ambata uhamba woloñaña okuti wecelela oku u kapa ponele yomangu yolonjali.
◼ Ulela Welemba Liwa: Olohongele vialua viofeka via siata oku lingiwila vocitumãlo cimue okuti, ka mu piti ofela yalua. Omo liaco, ciwa okuti, poku liwaveka ulela u kuete elemba liwa, tu likapa ño katito oco ka ci ka pange lãvi vamanji vana va kuete esuka lovovei akuavo.—1 Va Kor. 10:24.
◼ Oloformulariu (S-43) Queira Visitar: Vo formulariu losapi hati, Queira Visitar, mu sonehiwe olonumbi viatiamẽla komanu vana va lekisa onjongole eci va tambula uvangi kepuluvi liohongele yofeka. Akundi va ambate kohongele o formulariu yimosi ale vivali. Noke yoku soneha vo formulariu yaco olonumbi vi sukiliwa, citava oku yeca kukulu wekongelo usonehi.
◼ Upange Woku Lieca Olumue: Nda umue o yongola oku lieca olumue, citava oku sapela la vamanji va talavaya Voseketa Yupange Woku Lieca Olumue kohongele yofeka. Amalẽhe vana va kuete 16 kanyamo, va pondolavo oku ci linga, poku kuama olonjali viavo, ale omunu ukuavo ukulu okuti, wa taviwa lolonjali viavo.
◼ Ohongele Yofeka Kelimi Lioku Ilaika Lio Vongola. Ku kasi oku sokiyiwa ohongele yofeka kelimi lioku ilaika lia mulo Vongola (ELV) Konjango Yolohongele ko Ex-Seart, yi ka lingiwa oku upisa keteke 11-13/10/2013.