Tu Sukila Oku Lekisa Epandi Kupange Woku Kunda
1. Yehova wa siata oku lekisa ndati epandi komanu?
1 Suku wa siata oku lekisa epandi lialua komanu. (Etu. 34:6; Osa. 106:41-45; 2 Pet. 3:9) Epandi liaye lia velapo li limbukiwa kupange woku kunda Usoma u kasi oku lingiwa voluali luosi. Yehova o kasi oku talavaya lomanu ci soka 2.000 kanyamo, kuenda o kasi oku amamako oku kokela kokuaye vakuavitima via sunguluka. (Yoa. 6:44) Tu setukula ndati epandi lia Yehova kupange woku kunda?
2. Tu lekisa ndati epandi poku talavaya vocikanjo cetu?
2 Poku Kunda Konjo Lanjo: Tu setukula epandi lia Yehova poku ‘amamako’ oku kundila vocikanjo cina okuti omanu ka va lekisa onjongole. (Ovil. 5:42) Tu lekisa epandi kupange woku kunda eci tu liyaka lesuvu, esepu, kuenda elambalalo. (Mar. 13:12, 13) Tu lekisavo epandi poku likolisilako oku tapela ombuto yocili ndaño tu sanga omanu ka va lekisa onjongole.
3. Momo lie ci sukilila epandi poku linga epasu loku songola alilongiso Embimbiliya?
3 Poku Songola Alilongiso Embimbiliya: Oco ocikũla ci kule, ci sukila epandi. Tu pondola oku kapa otulumu kocikũla, pole ka tu tẽla oku yayuisa oku kula kuaco. (Tia. 5:7) Cimuamue haico konepa yespiritu, okuti oku kula kuaco ku lingiwa levando, kuenda volonepa via litepa. (Mar. 4:28) Vana tu longisa Embimbiliya, citava okuti kokuavo ci tĩla calua oku siapo alongiso etavo liesanda ale ovihilahila vi pisiwa lovisonehua. Omo liaco tu yuvuli oku yayuisa oku kula kuavo kespiritu, poku va kisika oku linga apongoloko. Epandi li sukiliwa oco okuti vokuenda kuotembo ci ecelela espiritu lia Suku oku vetiya utima wondonge.—1 Va Kor. 3:6, 7.
4. Epandi li tu kuatisa ndati oku kundila vangandietu okuti Halombangiko via Yehova?
4 Vangandietu Okuti Halombangiko Via Yehova: Ndaño tu yongola okuti vangandietu vana okuti Halombangiko via Yehova va lilongisavo ocili, tu lekisi epandi poku talamẽla otembo ya sunguluka yoku va kundila kuenda oku yuvula oku va longisa ovina vialua. (Uku. 3:1, 7) Vokuenda kuotembo, ovo va ka limbuka ovituwa vietu viwa, kuenje ci tu ecelela oku amamako oku va kundila lumbombe kuenda esumbilo. (1 Pet. 3:1, 15) Omo liaco, nda tua lekisa epandi kupange woku kunda tu ka kuata onima yiwa loku sanjuisa Isietu wo kilu.