Tu Kuami Ongangu Ya Yehova Yoku Lekisa Epandi
“[Yehova] ka livala lohuminyo yaye, . . . puãi o pandikisa.”—2 PETULU 3:9.
1. Ombanjaile yipi ya velapo Yehova a eca komanu?
YEHOVA wa tu ĩha ombanjaile yimue ya velapo okuti, lomue o tẽla oku yeca. Kuenda lomue o tẽla oku yi landa lolombongo. Ombanjaile yaco, elavoko lioku kuata omuenyo ko pui voluali luokaliye palo posi. (Yoano 3:16) Etu tuka kuata omuenyo wesanju liapiãla. Voluali luokaliye, lomue oka sumua omo liungangala, uhukũi, ovovei kuenda olofa. Kotembo Yuviali wa Suku, omanu vaka kuata ombembua lelitokeko lia velapo. Omo liaco, tu yongola oku kala Voluali luokaliye.—Isaya 9:6, 7; Esituluilo 21:4, 5.
2. Momo lie Yehova ka nenelele handi esulilo lioluali lulo lua Satana?
2 Yehova o kasi loku talamẽla otembo yoku nena Oluali luokaliye palo posi. Eye o sole esunga locili. (Osamo 33:5) Omo liaco, Eye wa siata oku sumua poku mola vana va tomba olonumbi viaye viesunga, loku lavisa uviali waye kuenda oku lambalala omanu vaye. Pole, o kuete esunga lieci ka nenelele handi esulilo lioluali lulo lua Satana. Vesunga liaco, mua kongela ocitangi cuviali waye. Yehova poku tetulula ocitangi caco wa siata oku lekisa epandi. Pole, koloneke vilo ka va luile va siata oku lekisa ocituwa caco.
3. (a) Kelimi lio Heveru kuenda lio Helasi, ondaka ‘epandi’ yi lomboloka nye ndomo ya tukuiwa Vembimbiliya? (b) Apulilo api tu kũlĩhĩsa cilo?
3 Kelimi lio Helasi kuli ondaka yimue okuti vo Votradução do Novo Mundo va yi tukula olonjanja vitatu hati, ‘epandi.’ Oyo, yi lomboloka ‘oku livala konyeño.’ Pole, olonjanja vimue yi lombolokavo ‘oku likandangiya’ kuenda ‘oku pandikisa.’ Omo liaco, ondaka epandi kelimi lio Heveru kuenda lio Helasi, yi lomboloka oku yuvula oku tema lonjanga. Oco hẽ, epandi lia Yehova li tu kuatisa ndati? Nye tu li longisa kepandi lia Yehova kuenda kepandi liomanu vaye? Tua kũlĩha ndati okuti epandi lia Yehova li kuete esulilo? Tu kũlĩhĩsi apulilo a votuiwa ndeti.
Kũlĩhĩsa Epandi Lia Yehova
4. Upostolo Petulu wa popia nye catiamẽla kepandi lia Yehova?
4 Catiamẽla kepandi lia Yehova, upostolo Petulu, wa popia hati: “A vakuacisola, ko ka ivaliko eci cokuti, eteke limuamue ku Suku lia soka ndohulukãi yalima, lohulukãi yalima ya soka ndeteke limuamue. [Yehova] ka livala lohuminyo yaye ndeci vamue va tukula vati, o livala, puãi o pandikisa lene. Momo ka yongola okuti, umue o nyõleha, puãi o yongola okuti vosi va likekembela akandu avo.” (2 Petulu 3:8, 9) Tu kũlĩhĩsi atosi avali Petulu a tukula vovinimbu evi, oco tu kuate elomboloko liepandi lia Yehova.
5. Ovisimĩlo via Yehova viatiamẽla kotembo vi tiamisiwila ndati kovina a yongola oku linga?
5 Etosi liatete lieli okuti, Yehova ka tendi otembo ndeci etu tu yi tenda. Omo okuti Eye o kasi otembo ka yipui, ohulukãi yanyamo kokuaye, yi kasi ndeteke limosi. Eye ka vetiyiwa oku linga cimue omo liotembo. Pole, ka livala koku tẽlisa ocipango caye. Omo okuti Yehova eye wa velapo kolondunge, wa kũlĩha otembo yoku nena ekalo liwa komanu vaye. Kuenda o kevelela lepandi toke eci otembo yaco yi pitila. Omo liaco, ka tuka simi okuti, Yehova ka kuete ocikembe lomanu vaye va tala ohali. Eye ‘ukuahenda haeye ukuacisola.’ (Luka 1:78; 1 Yoano 4:8) Yehova o pondola oku malako evĩho lohali a kasi oku ecelela komanu.—Osamo 37:10.
6. Ovisimĩlo vipi tu sukila oku yuvula viatiamẽla ku Suku, kuenda momo lie?
6 Ka ca lelukile oku kevelela cimue omunu a yongola. (Olosapo 13:12) Nda omunu ka tẽlisa lonjanga olohuminyo viaye, vakuavo va sima okuti, ka kuete onjongole yaco. Etu tu sukila oku yuvula ovisimĩlo viokuti, Yehova ka kuete onjongole yoku tẽlisa olohuminyo viaye. Nda ka tua kuatele elomboloko liepandi lia Yehova, tuka sima okuti, ka kasi oku tẽlisa lonjanga olohuminyo viaye. Noke tu fetika oku kuata atatahãi lesumuo kuenje tu liwekapo oku linga ocipango caye. Handi vali, tu kembiwa lomanu vakuakusepula, vana Petulu a tukula okuti ka va kuete ekolelo. Ovo va siata oku popia hati: “Ohuminyo yetukuluko lia Ñala yi kasi pi? Momo, tunde eteke [vakukululu yetu va fa], ovina viosi vi kasi ño ndeci via kala tunde kefetikilo lioluali.”—2 Petulu 3:4.
7. Epandi lia Yehova li lekisa ndati okuti o yongola oco omanu va likekembele?
7 Etosi liavali tu li longisa kolondaka via Petulu, lieli okuti Yehova o lekisa epandi. Momo, o yongola okuti, omanu vosi va likekembela. Vana okuti ka va yongola oku siapo ovilinga viavo vĩvi, vaka nyoliwa la Yehova keteke lio Harmagedo. Ocili okuti, Yehova ka sanjukila oku fa kuolondingaĩvi. Pole, o sanjuka lika nda omanu va likekembela loku siapo ovilinga viavo vĩvi oco va kale lomuenyo. (Esekiele 33:11) Epandi lia Yehova, li kasi oku ecelela okuti, olondaka viwa vi kundiwa voluali luosi oco omanu va kuate omuenyo ko pui.
8. Epandi lia Yehova lia lekisiwa ndati kocituwa caye ndomo a tata va Isareli?
8 Epandi lia Yehova tu li limbukilavo kocituwa caye ndomo a tatele va Isareli. Eye wa pandikisa lesino liavo vokuenda kuanyamo alua. Vonduko yovaprofeto vaye wa enda loku va sapuila hati: “Tinduki kolonjila viene vĩvi. Lavi ovihandeleko viange lovisila viange loku pokola kovihandeleko viosi . . . nda handelekele olosekulu viene haivio ndo tumisi lomẽla wakuenje vange ovaprofeto.” Anga hẽ omanu va tava oku pokola kolondaka evi? Sio, ka va tavele ‘oku yevelela.’—2 Olosoma 17:13, 14.
9. Yesu wa kuama ndati ongangu ya Isiaye yoku lekisa epandi?
9 Noke Yehova wa kuatavo epandi poku tuma Omõlaye palo posi. Eye wo tumile ku va Yudea oco va likekembele akandu avo okuti va kuata ukamba la Suku. Yesu wa kuata epandi ndeli lia Isiaye. Eci a limbuka okuti otembo yaye yoku pondiwa yi kasi ocipepi, wa li siõsiõla hati: “A Yerusalãi, a Yerusalãi, okuakuipa ovaprofeto, okuaku sosola ava va tumiwa kokuove. Olonjanja via lua nda livela oku vutama omãla vove ndeci [osanji yi] vutama ivuvu vialio vemi liavava alio, kuenje ka wa taveli.” (Mateo 23:37) Omunu wosi ukuakupisa vakuavo haeye ongangala ka popi olondaka evi. Ovio, vi popiwa lika lekamba lina li kuete ocisola haeye ukuepandi. Yesu wa kuamele ongangu ya Isiaye. Momo wa yonguile okuti, omanu va likekembela akandu avo oco va puluke keyambulo. Vana va tava kelungulo liaye, va puluka kenyolẽho eci o Yerusalãi ya lunduiwa kunyamo wa 70.—Luka 21:20-22.
10. Epandi lia Yehova lia siata oku tu kuatisa ndati?
10 Epandi lia Yehova li komohĩsa calua. Koloneke vilo onepa yalua yomanu voluali, ka va yongola oku pokola kolonumbi via Yehova. Pole, eye o kasi oku eca komanu vosi epuluvi lioku u kũlĩha oco va kuate elavoko lioku popeliwa. Upostolo Petulu wa sapuila vamanji Akristão hati: “Sokololi okuti epandi lia Ñala yetu olio eyovo.” (2 Petulu 3:15) Etu tua sanjuka calua, poku kũlĩha okuti Yehova wa tu yuluila onjila yoku popeliwa omo liepandi liaye. Omo liaco, tu sukila oku likutilila ku Yehova oco amameko oku lekisa epandi kokuetu, osimbu tu u fendela eteke leteke.—Mateo 6:12.
11. Oku kuata elomboloko liepandi lia Yehova ci tu vetiya oku linga nye?
11 Nda tua limbuka esunga lieci Yehova a siatela oku lekisa epandi, tuka kevelela lepandi eyovo li tunda kokuaye. Kuenda ka tu kuata ovisimĩlo viokuti, Yehova ka tẽlisa lonjanga olohuminyo viaye. (Asiõsuĩlo 3:26) Osimbu tu amamako oku likutilila ku Yehova oco Usoma waye wiye, tua kolela okuti, Eye wa kũlĩha otembo yoku tambulula olohutililo vietu. Omo liaco, tu pondolavo oku kuama ongangu yepandi liaye poku kala ciwa la vamanji kuenda la vana tu kundila. Etu ka tu yongolavo okuti, umue o nyoliwa. Pole, tu yongola okuti, omanu va likekembela akandu avo oco vakuate elavoko liomuenyo ko pui.—1 Timoteo 2:3, 4.
Kũlĩhĩsa Epandi Liovaprofeto
12, 13. Ndomo elivulu lia Tiago 5:10 li popia, uprofeto Isaya wa lekisa ndati epandi?
12 Oku kũlĩhĩsa epandi lia Yehova, ci tu vetiya oku sola ocituwa caco kuenda oku kuama ongangu Yaye. Omo okuti ka tua lipuile, ka ca lelukile oku kuata epandi. Pole, tu sukila oku likolisilako loku lekisa epandi. Tu sukilavo oku kuama ongangu yomanu vaye va kuatele epandi kosimbu. Ndonge Tiago wa popia hati: “A vamanjange, upi ongangu yoku tala ohali leyi yepandi kovaprofeto va popia vonduko ya [Yehova].” (Tiago 5:10) Tu sanjuka calua poku kũlĩha okuti, vakuetu va yulavo ovitangi tu kasi oku liyaka lavio.
13 Uprofeto Isaya, wa sukilile oku kuata epandi oco a tẽlise ocikele caye. Yehova wo sapuila hati: “Kuende, ka sapuile omanu vaco hati: Yeveleli ño puãi ko ka ci limbuki. Lemisa utima womanu ava, lemisa ovatũi avo, patisa ovaso avo, sanga va leta lovaso avo, kuenje va yeva lovatũi avo, ha va limbuka lovitima viavo, yu va pongoloka, kuenje va sakuiwa.” (Isaya 6:9, 10) Uprofeto Isaya wa kuatele epandi poku kundila omanu vana ka va yonguile oku pokola kalungulo a Yehova. Kuenje, wa linga upange waco vokuenda kuakũi akuãla lepandu kanyamo. Cimuamue haico tu sukila oku linga. Nda tua lekisa epandi, tuka amamako lupange woku kunda ndaño omanu valua ka va lekisa onjongole kolondaka Viusoma.
14, 15. Nye ca kuatisa Yeremiya oku yula ovitangi a liyaka lavio?
14 Eci ovaprofeto va kala oku tẽlisa ocikundi cavo, ka va liyakele lika locitangi coku kundila omanu vana ka va lekisa onjongole. Pole, va liyakavo lelambalalo. Uprofeto Yeremiya vo kapele “vokayike,” noke, vo leñuila vocisimo cimue ca longa. (Yeremiya 20:2; 37:15; 38:6) Eye wa suvukiwile lomanu vana a yonguile oku kuatisa. Pole, Yeremiya ka lekisile onyeño loku fetuluinya. Eye wa pita anyamo alua loku pandikisa.
15 Elambalalo lelaviso, ka lia tepuluile onjongole ya Yeremiya yoku kunda. Cimuamue haico ci pita letu koloneke vilo. Citava okuti olonjanja vimue tu sumua, ndeci ca pita la Yeremiya. Eye wa popia hati: “Ondaka ya Yehova ya ñokela oku pembuiwa loku tondaliwa eteke liosi. Nda linga siti, siu tukula vali. Simbi vali owanji vonduko yaye.” Nye Yeremiya a linga noke? Anga hẽ, wa liwekapo upange waye woku kunda? Eye wamisako hati: “[Ondaka ya Yehova] vutima wange [ya kala] ndondalu yi taima ya yikiwila vakepa ange. Nda kava loku likandangiya oku yi sapula. Oku yuhĩla vali si ci tẽla.” (Yeremiya 20:8, 9) Ivaluka okuti, eci Yeremiya a sokolola omanu vana va kala oku u talisa ohali, wa sumuile calua. Pole, eci a sokolola esilivilo liupange waco, wa kuata esanju lia piãla. Yehova wa kala konyima ya Yeremiya “ndesualali li linga usumba.” Kuenje wo kuatisa oku kunda ondaka Yaye lutõi.—Yeremiya 20:11.
16. Nye ci tu kuatisa oku amamako lesanju kupange wetu woku kunda olondaka viwa?
16 Ocili okuti, Yeremiya wa kuatele esanju poku linga upange waye. Eye wa sapuila Yehova hati: “Olondaka viove via sangiwa kuenje nda vi lia. Olondaka viove via linga onjolela yange, havio esanju liutima wange. Momo nda tukuiwa londuko yove a Yehova.” (Yeremiya 15:16) Yeremiya wa sanjukilile esumũlũho lioku kala onumiwa ya Suku loku kunda ondaka Yaye. Etu tu pondolavo oku kuata esanju. Pole, tu sanjuka vali calua ndovangelo poku mõla ndomo omanu valua va kasi oku tava kesapulo Liusoma. Kuenje va kasi oku likekembela akandu avo loku endela vonjila yi tuala komuenyo ko pui. Ovo va likekembela kuenda va kasi oku endela vonjila yi tuala komuenyo ko pui.—Luka 15:10.
“Epandi Lia Yovi”
17, 18. Yovi wa pandikisa ndati kuenda nye a tambula omo liepandi liaye?
17 Noke yoku lombolola ulandu wovaprofeto, Tiago wa popia hati: “Wa yevi epandi lia Yovi kuenje wa moli esulilo lialio lio wiha Ñala [Yehova]. Eye ukuacikembe haeye ukuahenda.” (Tiago 5:11) Ondaka yo Helasi yokuti, ‘oku pandikisa’ yi kuete elomboloko limuamue leyi Tiago a tukula kocipama catãlo kocinimbu cekũi hati, ‘epandi.’ Onoño yimue poku lombolola oku litepa ku kasi pokati kolondaka evi, wa popia hati: ‘Kelimi lio Helasi, epandi li lomboloka oku livala konyeño eci tu sepuiwa la vakuetu. Pole, oku pandikisa, ku lomboloka oku kolela kohali eci tu liyaka lovitangi.’
18 Yovi wa liyaka lovitangi vialua. Eye wa pesela ovokuasi aye, wa fisa omãla vaye vosi kuenda wa kuatiwa luvei. Eye wa liyakavo lesumuo omo liolondembeleki viaye viesanda vio sapuila okuti, Yehova eye wa kala oku u yambula. Noke, wa lisiõsiõla calua omo liovitangi viaye kuenje wa simĩle okuti esunga liaye lia velapo okuti lia Yehova li sule. (Yovi 35:2) Pole, wamamako lekolelo liaye kuenda ka liwekelepo oku vumba Suku. Yovi ka siñalele Yehova ndeci a vetiyiwa la Satana. (Yovi 1:11, 21) Noke nye ca pita laye? Yehova ‘wo sumũlũisa lovina vialua okuti, evi a kuatele tete vi sule.’ (Yovi 42:12) Eye wo wĩha uhayele kuenda ovokuasi alua okuti, ana a pesile ci sule. Yehova wo sumũlũisavo lomuenyo umue uwa poku u wĩha vali omãla. Yovi epandi liaye, lio kuatisa oku kuata elomboloko liekalo lia Yehova.
19. Epandi lia Yovi li tu longisa nye?
19 Epandi lia Yovi li tu longisa nye? Citava okuti tu liyakavo loku vela kuenda ovitangi vikuavo ndevi via Yovi. Pamue ka tu kuata elomboloko lieci Yehova a tu ecelela oku liyaka lovitangi viaco. Pole, tu sukila oku kũlĩha okuti, nda tua pandikisa lekolelo, Yehova oka tu sumũlũisa. Eye o sumũlũisa lika omanu vana vo sanda lutima wa sunguluka. (Va Heveru 11:6) Yesu wa popia hati: “U o pandikisa toke kesulilo, eye o popeliwa.”—Mateo 10:22; 24:13.
‘Eteke Lia Yehova li Kasi Ocipepi’
20. Momo lie tu popela okuti, eteke lia Yehova li kasi ocipepi?
20 Ndaño okuti Yehova ukuepandi, ka ci lomboloka okuti, oka ecelela evĩho otembo ka yi pui. Epandi liaye li kuete otembo yoku sulila. Petulu wa lombolola okuti Yehova ka kuatele ohele yoku yambula oluali luo kosimbu. Noha kumue lepata liaye, va puluka ketande lia kundula olondingaĩvi. Yehova wa kundulavo olupale luo Sodoma kuenda luo Gomora. Eyambulo liaco, lia linga ‘elungulo komanu vana va tomba Suku.’ Omo liaco, tu sukila oku kũlĩha okuti, ‘eteke lia Yehova, li kasi ocipepi.’—2 Petulu 2:5, 6; 3:10.
21. Tu pondola ndati oku lekisa epandi? Nye tuka lilongisa vocipama cikuãimo?
21 Tu amamiko loku kuama ongangu yepandi lia Yehova poku kuatisa vakuetu okuti va likekembela akandu avo, oco va popeliwe. Tu kuamivo ongangu yovaprofeto poku kunda olondaka viwa ndaño omanu vamue ka va lekisa onjongole. Nda tua pandikisa kovitangi loku pokola ku Yehova ndeci Yovi a linga, tuka tambula asumũlũho alua. Omo liaco, tu kuete esunga lioku sanjukila upange woku kunda. Momo tua kũlĩha okuti Yehova o kasi oku sumũlũisa upange womanu vaye woku kundila olondaka viwa voluali luosi. Vocipama cikuãimo, tuka kũlĩhĩsa ondaka eyi.
Ivaluka Eci Tua Lilongisa?
• Momo lie Yehova a kasilili oku lekisa epandi?
• Epandi liovaprofeto li tu longisa nye?
• Yovi wa lekisa ndati epandi kuenda wa tambula onima ye?
• Tua kũlĩha ndati okuti epandi lia Yehova li kuete otembo yoku sulila?
[Elitalatu kemẽla 15]
Yesu wa lekisa epandi ndeli lia Isiaye
[Elitalatu kemẽla 16]
Yehova wa sumũlũisa ndati epandi lia Yeremiya?
[Elitalatu kemẽla 17]
Yehova wa sumũlũisa ndati epandi lia Yovi?