“Lingi Vakuahenda”

1. Nye omanu va sukila vali koloneke vilo?

¹ Omanu koloneke vilo va sukila vali ohenda yalua okuti kosimbu ci sule. Oku livokiya kuovitangi voluali, kua siata oku nena esumuo, enyumãlo kuenda ekambo lielavoko. Omanu valua va sukila ekuatiso, pole etu Tuakristão, etu tu kuete ocikele coku eca ekuatiso liaco kokuavo. (Mat. 22:39; Va Gal. 6:10) Tu eca ndati ekuatiso liaco kokuavo?

2. Yipi onjila ya velapo yoku lekisa ohenda?

² Upange Umue u Lingiwa Lohenda: Ka kuli elembeleko liocili hailio lia velapo okuti li tunda ku Suku li sule. (2 Va Kor. 1:3, 4) Yehova o tu vetiya oku linga “vakuahenda” kuenda wa tuiha ocikele coku kundila omanu olondaka viwa Viusoma. (1 Pet. 3:8) Oku lekisa ombili kupange owu, oyo onjila ya velapo yoku lembeleka vana va “teka kovitima,” momo Usoma wa Suku owo elavoko lia velapo komanu va tala ohali. (Isa. 61:1) Omo liohenda Yehova a kuetele omanu vaye, ndopo o ka nyõla oluali lulo luvĩ, loku tumbika oluali luokaliye luesunga.—2 Pet. 3:13.

3. Tu tenda ndati omanu ndeci Yesu a linga?

³ Kapako Omanu Ndeci Yesu a Linga: Yesu poku kundila owiñi walua, ka va tendele ño ndocimunga cimue comanu. Eye wa kapeleko eci omunu lomunu a sukilile konepa yespiritu. Ovo va kala ndolomeme ka vi kuete ungombo o vi songuila. Utima wa Yesu wa vetiyiwa leci a mola, kuenje co kuatisa oku va longisa lepandi. (Mar. 6:34) Nda tua kapako omanu ndeci Yesu a linga, tu ka vetiyiwavo oku lekisa ohenda yocili komunu lomunu. Eci ci ka limbukiwila koku vangula kuetu kuenda pupolo wetu. Tu ka velisapo upange woku kunda kuenda oku tiamisila olondaka vietu kekalo liomunu lomunu.—1 Va Kor. 9:19-23.

4. Momo lie tu sukilila oku lekisa ohenda?

⁴ Owiñi wakahandangala womanu va tunda kolofeka viosi, va kasi oku tava kesapulo Liusoma loku lembelekiwa lohenda tu lekisa kokuavo. Osimbu tu amamako oku lekisa ohenda, tu ka eca esivayo kuenda oku sanjuisa Yehova, Suku yohenda.—Va Kol. 3:12.