Setukula Ohendaya Yehova

1. Yehova wa lisituluila ndati ku Mose? Momo lie ca kuatela esilivilo?

ETEKE LIMUE, Suku wa lisituluila ku Mose poku u sapuila onduko Yaye kuenda vimue pokati kovituwa Viaye. Ocili okuti, Yehova nda wa tukula unene waye ale olondunge viaye, pole, tete wa tukula eci catiamẽla kohenda kuenda kocali caye. (Tanga Etundilo 34:5-7.) Yehova wa tukula ovituwa viaye oco a lekise okuti, o yongola oku kuatisa afendeli vaye. Eci ca kuata esilivilo momo Mose wa sukulile oku kũlĩha nda Yehova wa laikele oku u kuatisa. (Etundilo 33:13) O liyeva ndati poku kũlĩha okuti Yehova wa tu kapako? Vocipama cilo, tu lilongisa eci catiamẽla kohenda. Vohenda mua kongela ovina vialua okuti oku kũlĩha lika ovitangi viovunu ci sule.

2, 3. (a) Nye ci lekisa okuti omanu va pondola oku kala vakuahenda? (b) Momo lie ci kuetele esilivilo oku lilongisa catiamẽla kohenda?

² Yehova ukuahenda kuenda wa tu lulika lesetahãlo liaye. Omo liaco, oku sakalala lekalo liwa lia vakuetu ci panga onepa kokuetu. Ndaño muẽle vana okuti ka va vumbi Yehova, va pondolavo oku lekisa ohenda. (Efetikilo 1:27) Vembimbiliya, tu sangamo ovolandu alua omanu va lekisa ohenda. Ivaluka hẽ ulandu wo vipuepue vivali via kala oku lihoyisa oco va kũlĩhe u wa kala ina yoñaña? Eci Salomone a tuma oku tola oñaña pokati, ina yomõla wa kuatela ohenda omõlaye. Eye wa pinga ku soma oco a ece omõla o kasi lomuenyo kukãi ukuavo. (1 Olosoma 3:23-27) Ivalukavo eci omõla ufeko wa Fareo a sanga Mose oñaña kolui? Eye wa kũlĩhĩle okuti u Heveru kuenda wa laikele oku pondiwa. Pole, wo “kuatela ohenda,” kuenje wo wa ambata oco o tekule ndomõlaye.—Etundilo 2:5, 6.

³ Momo lie tu sukilila oku lilongisa catiamẽla kohenda? Momo Yehova o yongola okuti tu u setukula. (Va Efeso 5:1) Tua lulikiwa lonjole yoku kuatisa vakuetu. Pole, omo ka tua lipuile pamue tu velisapo olonjongole vietu okuti via vakuetu ci sule. Nye ci tu kuatisa oku kala vakuahenda? Tete, tu konomuisa ongangu ya Yehova leyi ya Yesu yoku lekisa ohenda. Vali, tu konomuisa eci tu sukila oku linga oco tu setukule Yehova kuenda esilivilo lioku ci linga.

YEHOVA ONGANGU YAVELAPOYOKU LEKISA OHENDA

4. (a) Momo lie Yehova a tumila angelo ko Sodoma? (b) Ulandu wa Lote u tu longisa nye?

⁴ Vembimbiliya mu sangiwa ovolandu alua a lekisa okuti Yehova o Suku yimue yohenda. Tu sokololi eci ca pita la Lote. Lote wa kala ulume umue ukuesunga okuti, “wa sakalaisua” omo lievĩho liomanu vo ko Sodoma kuenda vo ko Gomorra. Omanu vaco, ka va sumbilile Yehova kuenje eye wa nõlapo oku va kundula. (2 Petulu 2:7, 8) Yehova wa tuma angelo ku Lote oco vo sapuile okuti, o Sodoma lo Gomorra, vi nyõliwa kuenda wa sukilile oku tila. Embimbiliya li lekisa okuti: “Eye [Lote] haimo wa simũlapo; ovalume [angelo] va kuata peka eye muẽle Lote, lukãi waye, lomãla vaye vavali vakãi, momo Yehova wo kuatela ohenda, kuenje vimbo vo wupamo, vo talamisa kofeka konẽle yimbo.” (Efetikilo 19:16) Ndeci Yehova a kapeleko ocitangi ca Lote, tua kolelavo okuti wa kapako ovitangi viosi tu liyaka lavio.—Isaya 63:7-9; Tiago 5:11; etosi 2 Petulu 2:9.

5. Embimbiliya li tu longisa ndati oku kala vakuahenda?

⁵ Yehova wa siatavo oku tu longisa okuti tu sukila oku kala vakuahenda. Tu sokololi kocihandeleko cimue a ecele ku va Isareli. Nda umue wa levala olombongo, una wa levalisa wa sukilile oku tambula onanga ya una wo levala ndondimbukiso yokuti, wa laikele oku tiula olombongo a levala. (Tanga Etundilo 22:26, 27.) Pole, una wa levalisa wa sukilile oku tiula onanga yomunu wo levala osimbu ekumbi ka lia iñilĩle, oco a lisikĩlĩle layo luteke. Omunu wosi okuti ka kaile ukuahenda, ka endaile oku tiula onanga yaco, pole, Yehova wa handelekele kafendeli vaye, oco va kale vakuahenda. Ocihandeleko eci ci tu longisa nye? Ci tu longisa okuti, tu sukila oku kapako a sukila a vamanjetu. Nda vamaji va tala ohali, tu lekisa onjongole yoku va kuatisa.—Va Kolosai 3:12; Tiago 2:15, 16; Tanga 1 Yoano 3:17.

6. Nye tu lilongisa kohenda Yehova a lekisa ku va Isareli?

⁶ Yehova wa lekisa ohenda ku va Isareli ndaño ceci va enda oku lueya. Embimbiliya li popia ndoco: “Yehova Suku yolosekulu viavo, ka liwekele oku va tumaisa olomunga viaye, momo wa kala lohenda lomanu vaye locitumãlo caye.” (2 Asapulo 36:15) Yehova ka yongola okuti, umue o yambuiwa keteke lienyõleho. (2 Petulu 3:9) Cimuamue haico, tu sukilavo oku lekisa ohenda komanu vana, okuti handi ka va kũlĩhĩle Yehova, oco va likekembele loku kala akamba vaye. Omo liaco, tu sukila oku sandeka esapulo lia Yehova komanu vosi oco va kuatisiwevo lohenda yaye.

7, 8. Momo lie Milan a limbukila okuti Yehova wa kuatela ohenda epata liaye?

⁷ Koloneke vilo, afendeli valua va Yehova va siatavo oku limbuka ohenda yaye. Tu kũlĩhĩsi eci ca pita lepata lia Milan kefetikilo liunyamo wo 1990, eci a kuata 12 kanyamo. Kocitumãlo va kala kua pita uyaki pokati kapata alua a litepa loku liponda. Milan, la manjaye kuenda olonjali viaye la vamanji vakuavo, va kala oku linga ungende lokalela oku tunda ko Bósnia oku enda ko Servia. Ovo va kala oku enda kohongele yofeka, kuna olonjali via Milan via laikele oku papatisiwa. Eci va pitĩla vongave yofeka, olondavululi via va tuma oku tuluka vokalela momo via limbuka okuti vatiamẽla kepata likuavo. Epata lia Milan lia kala pocitumãlo caco oloneke vivali. Kuenje kesongo kolondavululi, wa vilikiya kesongo kaye wavelapo loku u pulisa eci va ponduile oku linga lepata liaco. Epata lia Milan, lia yeva cosi kesongo kavelapo a tambulula okuti: “Vambati kuenda va loyi!”

⁸ Osimbu kesongo a kala oku vangula lolondavululi, alume vamue vavali veya ponẽle yepata lia Milan. Kuenje lutate va va sapuila vati, ovo Olombangivo Via Yehova. Vamanji va kala vokalela ovo va va sapuila ovina via pita lavo. Vamanji vaco vavali, va sapuila Milan la manjaye oku londa vekãlu oco va pitahãle ongave, momo olondavululi ka via kaile oku kũlĩhĩsa ovicapa viomãla. Noke, vamanji va sapuila olonjali via Milan vati: “Piti konyima yonjo yoku lava ongave, toke konele yikuavo yongave.” Milan wa kala lusumba walua kuenda ka kũlĩhĩle nda o yola ale o lila. Olonjali viaye, via pula viti: “Ene hẽ vu sima okuti va ka tu ecelela muẽle oku tunda palo?” Osimbu va kala oku enda, ca kala ndu okuti olondavululi ka va va lete. Noke Milan la manjaye va lisanga lolonjali viavo konele yikuavo yongave kuenje va enda kohongele yofeka. Ovo va kolelele okuti Yehova wa tambulula olohutililo viavo! Embimbiliya li tu sapuila okuti, Yehova olonjanja vimue ka teyuila afendeli vaye lonjila yimuamue. (Ovilinga 7:58-60) Milan wa popia hati: “Ca kala ndu okuti angelo va patisa ovaso olondavululi kuenje Yehova wa tu popela.”​—Osamo 97:10.

9. Yesu nye a linga eci a mola okuti owiñi wa kala oku u kuama? (Tala ociluvialuvia kefetikilo liocipama cilo.)

⁹ Tu pondolavo oku lilongisila kongangu ya Yesu. Eye wa kuatela ohenda omanu “momo va kala oku talisiwa ohali loku sakalaisua ndolomeme ka vi kuete ungombo.” Nye eye a linga oco a va kuatise? Yesu “wa fetika oku va longisa ovina vialua.” (Mateo 9:36; Tanga Marko 6:34.) Yesu wa litepele la va Fariseo, momo ka va kaile vakuahenda kuenda ka va kuatele onjongole yoku kuatisa omanu. (Mateo 12:9-14; 23:4; Yoano 7:49) Ndeci Yesu a linga, ove hẽ o kuete onjongole yoku kuatisa omanu kuenda oku va longisa catiamẽla ku Yehova?

10, 11. Hanga hẽ tu sukila oku lekisa ohenda olonjanja viosi? Ci lombolola.

¹⁰ Eci ka ci lomboloka okuti tu lekisa ohenda olonjanja viosi. Tu kũlĩhĩsi eci ca pita la Soma Saulu. Eye wa simĩle okuti wa lekisa ohenda eci a yuvula oku ponda Agage soma ya va Amaleke haiye unyali wafendeli va Suku. Saulu ka pondelevo ovinyama viosi via va Amaleke. Pole, Yehova wa handelekele Saulu oco a ponde va Amaleke vosi kumue lovinyama viavo. Omo okuti Saulu ka pokuile, Yehova wo likala ndosoma yo ko Isareli. (1 Samuele 15:3, 9, 15) Yehova eye o Nganji yesunga kuenda wa kũlĩha eci ci kasi vovitima viomanu. Omo liaco, wa kũlĩha u o sesamẽla ohenda lu ka sesamẽla. (Asiõsuĩlo 2:17; Esekiele 5:11) Eye o ka yambula omanu vosi va likala oku pokola kokuaye. (2 Va Tesalonike 1:6-10) Kotembo yaco, Yehova ka ka lekisa ohenda kolondingãivi. Pole, o ka kundula olondingãivi, oco a lekise ohenda kolondingesunga poku va popela.

¹¹ Ocili okuti, ka tu kuete omoko yoku sombisa omanu nda va sesamẽla omuenyo ale oku fa. Pole, tu sukila oku linga cosi citava oco tu kuatise omanu. Volonjila vipi tu pondola oku lekisa ohenda komanu? Tu konomuisa olonumbi vimue.

NDOMO TU LEKISA OHENDA

12. Tu lekisa ndati ohenda oloneke viosi?

¹² Kala ukuakukuatisa oloneke viosi. Yehova o yongola okuti Akristão va lekisa ohenda komanu vakuavo kuenda ku vamanji. (Yoano 13:34, 35; 1 Petulu 3:8) Ohenda yi lomboloka oku ‘talela kumosi ohali.’ Omunu ukuahenda o likolisilako oku kuatisa vana va kasi oku tala ohali. Omo liaco, tu sandi apuluvi oku kuatisa vakuetu, poku lieca olumue loku va lingilako ovopange amue.—Mateo 7:12.

13. Nye afendeli va Yehova va siata oku linga eci ku pita ovilunga?

¹³ Kuatisa vana va pita lovilunga. Eci tu mola omanu va tala ohali omo liocilunga cimue, tu lekisa ohenda kokuavo. Afendeli va Yehova va kũlĩhĩwa okuti va kuakukuatisa vakuavo olonjanja viosi. (1 Petulu 2:17) Tu kũlĩhisi ulandu wamanji umue ukãi wo ko Japãu okuti, onepa yofeka a kala ya nyõliwa locilemawe kuenda landunde ovava okalunga kunyamo wo 2011. Eye wa popia hati, eci a mola vamanji va tunda kolonepa vikuavo vio ko Japãu lo kolofeka vikuavo okuti, valieca olumue oco va semũlule olonjo Lolonjango Viusoma, “co vetiya kuenda co lembeleka calua.” Eye wa amisako hati: “Eci ca ñuatisa oku limbuka ekuatiso lia Yehova kuenda vamanji va kapako ekalo liomunu lomunu. Vamanji valua voluali luosi va kasi oku tu likutililako.”

14. O kuatisa ndati vana va vela la vana va kuka?

¹⁴ Kuatisa vana va vela kuenda vana va kuka. Eci tu mola omanu va kasi oku tala ohali omo lioku vela kuenda oku kuka, tu va kuatela ohenda. Omo okuti tu yongola oku mola esulilo liovitangi viaco, tu likutilila oco Usoma wa Suku wiye. Osimbu otembo yaco ka ya pitĩlile, tu likolisiliko oku kuatisa vana va vela la vana va kuka. Onoño yimue ya soneha eci catiamẽla ku ina yaye wa kuka, okuti o kuete uvei wo Alzheimer. Eteke limue wa tundisila vuwalo waye. Osimbu a kala oku seteka oku li puenya, Olombangi Via Yehova via veta kepito. Vamanji akãi va siata oku u nyula vo pinga oco vokuatise. Ukãi waco wa kumbulula hati: “Eci ci lingisa osõi pole citava.” Vamanji vokuatisa oku sukula uwalo waye. Noke vo yalekelako osia kuenda va kala oku sapela laye. Omõlaye ulume wa pandula calua kuenda wa soneha ndoco: “Olombangi via Yehova via kapako ovina va longisa.” Hanga hẽ ohenda o kuetele vana va vela la vana vakuka yu ku vetiya oku likolisilako oku vakuatisa?—Va Filipoi 2:3, 4.

15. Upange woku kunda ukuatisa ndati omanu?

¹⁵ Kuatisa omanu oku kũlĩha Yehova. Onjila yavelapo yoku kuatisa omanu va liyaka lovitangi, oku va longisa eci catiamẽla ku Yehova kuenda Kusoma waye. Onjila yikuavo, oku va kuatisa oku limbuka esunga lieci oku pokola kolonumbi via Yehova ci kuetele esilivilo kokuavo. (Isaya 48:17, 18) Upange woku kunda oyo onjila yavelapo yoku sivaya Yehova loku lekisa ohenda komanu. O pondola hẽ oku vokiya upange wove woku kunda?—1 Timoteo 2:3, 4.

OKU KALA UKUAHENDA CI KUATISA!

16. Tu kuatisiwa ndati nda tua kala vakuahenda?

¹⁶ Va kuakusakula uvei wo woño va popia vati, oku lekisa ohenda ci kuatisa kuhayele wetu kuenda kukamba tu kuete la vakuetu. Eci o kuatisa vana va kasi oku tala ohali, o kuata esanju, ku liyevi ulika kuenda o kuata ovisimĩlo via sunguluka. Ocili okuti ohenda yi kasi ndovihemba. (Va Efeso 4:31, 32) Eci tu lekisa ohenda komanu, tu kuata utima wa yela momo tua kũlĩha okuti tu kasi oku linga ovina Yehova a tu yonguila. Ohenda yi tu kuatisa oku kala olonjali viwa, olohueli viwa kuenda akamba vawa. Handi vali, nda tu lekisa onjongole yoku kuatisa vakuatu, tu tambulavo ekuatiso eci tu sukila.—Tanga Mateo 5:7; Luka 6:38.

17. Momo lie o yonguila oku kala ukuahenda?

¹⁷ Ndaño okuti oku lekisa ohenda ciwa kokuetu, esunga liavelapo lioku lekisa ohenda lieli okuti, tu yongola oku setukula Yehova kuenda oku u sivaya. Eye ono yocisola kuenda yohenda. (Olosapo 14:31) Yehova eye ongangu yetu yavelapo yoku lekisa ocisola kuanda ohenda. Omo liaco, tu likolisiliko oku setukula Yehova poku lekisa ohenda. Kuenje ukamba wetu la vamanji u pamisiwa kuenda tu kuata ukamba uwa lomanu vakuavo.—Va Galatia 6:10; 1 Yoano 4:16.