Sanjukila Esumũlũho o Kuete
1. Omanu voluali va tenda ndati upange wetu woku kunda?
1 Omanu valua voluali lulo lua Satana va tenda upange wetu woku kunda ‘nduveke.’ (1 Va Kor. 1:18-21) Nda ka tua lungukile, ocisimĩlo eci cĩvi ci tu nenela esumuo kuenda ci tepulula ombili yetu. (Olosap. 24:10; Isa. 5:20) Momo lie tu sukilila oku sanjukila esumũlũho lioku kala Olombangi via Yehova?—Isa. 43:10.
2. Momo lie tu popela okuti upange woku kunda, ‘upange u kola’?
2 ‘Upange Umue u Kola’: Upostolo Paulu wa tendele ocikele coku kunda ‘ndupange u kola.’ (Va Rom. 15:15, 16) Oku kunda ku tendiwa ndati okuti ‘upange u kola’? Momo poku linga upange waco tu kala ‘olondingupange’ via ‘Una o Kola,’ okuti Yehova kuenda tu kuatisa koku kemainyisa onduko yaye. (1 Va Kor. 3:9; 1 Pet. 1:15) Omo Yehova o tenda upange woku kunda “[n]docilumba cesivayo,” upange waco onepa yimue ya velapo kefendelo lietu.—Va Hev. 13:15.
3. Momo lie tu tendela upange woku kunda olondaka viwa ndesumũlũho linene?
3 Oku kunda olondaka viwa esumũlũho liocili, momo vatito va kuete esumũlũho liaco. Ovangelo nda va sanjukila oku linga upange waco kuenda oku u tẽlisa ciwa. (1 Pet. 1:12) Pole, Yehova wa eca esumũlũho liaco kokuetu tumanu ka va lipuile, ‘ndolombia viotuma.’—2 Va Kor. 4:7.
4. Tu lekisa ndati okuti tua sanjukila upange woku kunda?
4 Upange wa Velapo: Omo lioku sanjukila esumũlũho lietu, tu tenda upange woku kunda ‘ndocina ca velapo’ komuenyo wetu. (Va Fil. 1:10) Omo liaco, osemana losemana sokiya otembo yoku kunda. Onjimbi yina yi sanjukila esumũlũho liaye lioku sikila kumosi locisoko cimue ca kũlĩhĩwa voluali, osimbu ka va endele koku sika o lipongiya kuenda o sanda onjila yoku mioñolola uloño waye. Cimuamue haico, osimbu ka tua endele kupange woku kunda, tu sukila oku lipongiya oco tu ‘kunde lesunga ondaka yocili’ kuenje tu ka mioñolola uloño wetu ‘woku longisa.’—2 Tim. 2:15; 4:2.
5. Helie o sanjukila upange wetu woku ku kunda?
5 Ocituwa comanu vana ka va lekisa onjongole, ka ci ka tepulule ombili yove. Ivaluka okuti vocikanjo cove handi muli omanu valua va sanjukila apasu ove. Pole upange tu kasi oku linga ka u soliwe lomanu. Haimo lumue, ocina ca velapo oku sokolola ndomo Yehova a tenda upange waco kuenda oku limbuka okuti eye o sanjukila alikolisilo etu.—Isa. 52:7.