Asunga Ekũi Lavali Lieci tu Kundila

Momo lie tu kundila loku longisa omanu olondaka viwa? Anga hẽ ocina ca velapo oku kuatisa vakuotima wa sunguluka oku endela vonjila yomuenyo? (Mat. 7:14) Eli olio esunga liatete lia tukuiwa, pole halioko ocimãho cetu ca velapo. Katosi 12 akuãimo a tiamẽla kupange woku kunda, lipi o sima okuti olio lia velapo?

1. Eci tu kunda tu kuatisa omanu oco va popeliwe.—Yoa. 17:3.

2. Tu kuatisa oku lungula olondingãivi.—Esek. 3:18, 19.

3. Ci panga onepa koku tẽlisiwa kuovitumasuku Viembimbiliya.—Mat. 24:14.

4. Ci situlula esunga lia Suku. Lomue o pondola oku popia okuti Yehova ka ecele epuluvi kolondingãivi oco vi likekembele, osimbu ka via nyõliwile.—Ovil. 17:30, 31; 1 Tim. 2:3, 4.

5. Ci tu ecelela oku tẽlisa ocikundi cetu oco omanu va landiwa losonde ya Yesu va kuatisiwe konepa yespiritu.—Va Rom. 1:14, 15.

6. Tu yuvula oku kuata eko liosonde.—Ovil. 20:26, 27.

7. Ci pondola oku popela omuenyo wetu.—Esek. 3:19; Va Rom. 10:9, 10.

8. Ci lekisa okuti tu kuetele ocisola omanu.—Mat. 22:39.

9. Ci lekisa epokolo lietu ku Yehova kuenda Komõlaye.—Mat. 28:19, 20.

10. Ci panga onepa kefendelo lietu.—Va Hev. 13:15.

11. Ci lekisa ocisola tu kuetele Suku.—1 Yoa. 5:3.

12. Ci kuatisa koku kemãlisa onduko ya Yehova.—Isa. 43:10-12; Mat. 6:9.

Ava haoko lika asunga tu kuete oku kunda. Oku kunda ku pamisavo ekolelo lietu kuenda ku tu ĩha esumũlũho lioku kala olondingupange kumosi la Suku. (1 Va Kor. 3:9) Pole esunga lia velapo vali lieci tu kundila, etosi 12. Ci kale okuti omanu va yeva ale sio, upange woku kunda u kuatisa oku kemãlisa onduko ya Suku kuenda ceca etambululo ku una imbula Yehova. (Olosap. 27:11) Omo liaco, tu kuete asunga alua ‘oku amamako oku longisa kuenda oku kunda olondaka viwa.’—Ovil. 5:42.