Kuatisa Omunu wa Sanga Oku Sokolola
1. Ombangulo yipi yeca onima yiwa kupange woku kunda?
1 Ombangulo yipi yeca onima yiwa kupange woku kunda, yina okuti tu kisika omanu oku tava, ale yina okuti tu kuatisa omanu oku sokolola kuenda oku sanga elomboloko? Eci upostolo Paulu a vangula la va Yudea ko Tesalonike, wa va kuatisa oku sokolola kuenje “vamue pokati kavo va tava.” (Ovil. 17:2-4) Nye ca kongela voku kuatisa omanu oku sokolola?
2. Tu setukula ndati Paulu eci tu kunda olondaka viwa?
2 Kapako Ovisimĩlo Kuenda Ovituwa Viavo: Voku kuatisa omanu oku sokolola mua kongela oku kapako ovisimĩlo via vana tu sanga vocikanjo. Paulu poku kundila va Helasi ka va tavele va kala ko Areópago, wa tukula ovina va kũlĩhĩle haivio va tavaile. (Ovil. 17:22-31) Omo liaco, eci o pongiya olondaka vioku fetika ombangulo, sokola ovina omanu vocikanjo cove va tava kuenda ovina vi va sakalaisa. (1 Va Kor. 9:19-22) Nda omunu wa linga epulilo limue, seteka oku sanda ondaka yi likuata locisimĩlo caye, kuenda tiamisila ombangulo yove ketosi liaco.
3. Tu kuatisa ndati omanu oku sokolola poku linga apulilo luloño?
3 Linga Apulilo Luloño: Ka tu tẽla oku eca onumbi kongende yimue nda ka tua kũlĩhĩle oku a loña. Cimuamue haico, ka tu tẽla oku kuatisa omunu tu kundila oku kuata elomboloko nda ka tua kũlĩhĩle ovisimĩlo viaye. Oco Yesu a kuatise olonjeveleli oku sokolola, wa linga apulilo oco a limbuke ovisimĩlo viavo. Eci umue a pulisa Yesu hati, “Ndinga nye okuti ñuata omuenyo ko pui?”, Yesu tete wa kũlĩhĩsa ocisimĩlo culume waco osimbu ko tambuluile. (Luka 10:25-28) Vepuluvi likuavo, eci Petulu a eca etambululo ka lia sungulukile, Yesu wo pulisa lutate oco a pengulule ocisimĩlo caye. (Mat. 17:24-26) Omo liaco, nda omunu tua sanga wa linga epulilo limue ale wa lekisa ocisimĩlo cimue ka ca sungulukile, tu sukila oku u linga apulilo oco tu u kuatise oku sokolola kondaka yaco.
4. Momo lie tu sukilila oku kuatisa omunu tua sanga oku sokolola?
4 Eci tu kuatisa omanu oku sokolola, tu setukula Ulongisi wa Velapo Yesu, kuenda akundi vakuavo va loñoloha vo kocita catete. Tu lekisa okuti tua kapako omanu tu sanga kuenda tua va sumbila. (1 Pet. 3:15) Nda tua ci linga, eye o pondola oku lekisa onjongole yoku tu tambula vepuluvi likuavo.