Ovina Vipi vi Pondola Oku ‘ku Nenela Epandiyo’?
1. Nye ci tu nenela epandiyo kesulilo liosãi losãi?
1 Kesulilo liosãi losãi eci va ku pinga orelatoriu yove yupange woku kunda, nye cu ‘ku nenela epandiyo’? (Va Gal. 6:4) Ci kale okuti tu talavaya ndakundi va likasi poku eca 130 kolowola ale pamue tuakundi vana okuti tu eca lika 15 kakukutu, vosi tu sukila oku sanjukila oku vumba Yehova lutima wosi.—Osa. 100:2.
2. Momo lie tu sukilila oku lieca olumue koku linga upange wa Yehova?
2 Omo okuti Yehova eye Ñala Ukuonenewosi voluali, o sesamẽla oku wĩha ovina via velapo tu kuete. (Mal. 1:6) Omo liocisola tu u kuetele tua lieca olumue koku linga ocipango caye. Nda okuti kesulilo lieteke, ale kesulilo liosãi tua kolela okuti tua eca ‘eci ca velapo’ okuti otembo yetu, uloño, kuenda ongusu koku vumba Yehova, tu kuata esunga lioku pandiyiwa. (Olosap. 3:9) Nda owanji utima wetu u tu imbila uvangi, tu sukila oku likolisilako oku linga eci ca velapo.—Va Rom. 2:15.
3. Momo lie ka ca sungulukilile oku lisokisa la vakuetu.
3 ‘Ka tu Lisokisa la Vakuetu’: Ka ca sungulukile oku lisokisa la vakuetu ale oku sokisa ongusu tua kuatele kosimbu. Ekalo li pongoloka. Olohõlo ka via lisokele. Ocituwa coku lisokisa ci koka oku livelisapo, ale oku li tenda okuti ku kuete esilivilo. (Va Gal. 5:26; 6:4) Yesu ka kuatele ocituwa coku sokisa omunu lukuavo. Eye wa enda oku eca epandiyo leci omunu a tẽlele oku linga.—Mar. 14:6-9.
4. Nye tu lilongisila kolusapo lua Yesu lua tiamẽla kolokondu?
4 Volusapo lua Yesu lua tiamẽla kolokondu, omunu lomunu wa tambula “ndeci a tela.” (Mat. 25:15) Eci cime a tiuka kuenda wa pinga ulandu wupange wavo, vana va talavaya ndomo epondolo longusu yavo ya ecelela, va tambula epandiyo kuenje va iñila vesanju lia cime cavo. (Mat. 25:21, 23) Omo liaco, nda tua litumbika kupange woku kunda Usoma, tu pandiyiwavo la Suku kuenda tu kuata esunga lioku sanjuka!