“Eca Uvangi Wolondaka Viwa”
1. Ongangu yipi upostolo Paulu a eca kupange woku kunda?
1 “Tẽlisa ciwa upange wove.” (2 Tim. 4:5, Byington) Upostolo Paulu poku eca elungulo eli ku Timoteo, wa vangula lutõi. Ocili okuti, tunde kunyamo wa 47, toke wa 56 K.K., Paulu wa linga ovongende atatu kupange waye wumisionaliu. Elivulu Liovilinga, li tukula olonjanja vialua okuti, Paulu ‘wa eca uvangi wolondaka viwa.’ (Ovil. 23:11; 28:23) Koloneke vilo, tu ci linga ndati?
2. Tu eca ndati uvangi wolondaka viwa poku kundila konjo lanjo?
2 Oku Kundila Konjo Lanjo: Poku kundila omanu vana okuti ka va la yeva olondaka viwa, tu sukila oku likolisilako oku va pasuisa kapuluvi a litepa vokuenda kueteke. Olonjanja vimue, oco tu sange alume kolonjo viavo, tu sukila oku ci linga koñolosi, ale kesulilo liosemana. Tu sukilavo oku likolisilako oku vangula lomanu vosi tu sanga kolonjo, poku va pasuisa olonjanja vialua. Anga hẽ alikolisilo ove oku sandiliya omanu ka a siatele oku eca onima yiwa? Citava okuti oku soneha ukanda ale oku telefonalela omunu oco u pasuise, ceca onima yiwa.
3. Apuluvi api ove o kuete oku eca uvangi komanu kapuluvi ka a sokiyiwile?
3 Oku Kundila Omanu Kapuluvi ka a Sokiyiwile: Afendeli va Yehova koloneke vilo, va siata oku kuatisa omanu vana va va yevelela oco va kuate ‘olondunge viocili.’ Olonjanja vimue, tu lingila upange waco ‘volokololo kuenda povitanda.’ (Olosap. 1:20, 21) Poku enda kupange weteke leteke, tua siata hẽ oku sokolola oku eca uvangi komanu? Tu pondola hẽ oku popia tuti, ‘tua pitisa kovaso upange woku kunda’? (Ovil. 18:5) Nda oco tua siata oku linga, tu pondola oku popia tuti, tu kasi oku tẽlisa ocikundi cetu ‘coku eca uvangi wolondaka viwa.’—Ovil. 10:42; 17:17; 20:20, 21, 24.
4. Olohutililo kuenda oku sokolola ovina tua tanga, vi tu kuatisa ndati oku eca uvangi komanu?
4 Olonjanja vimue, omo lioku hongua kuetu, ale oku kuatela osõi omanu, tu liwekapo oku eca uvangi kokuavo. Ocili okuti, Yehova wa kũlĩha ciwa ekalo lietu. (Osa. 103:14) Omo liaco, tu sukila oku likutilila kokuaye oco tu kuate utõi woku vangula lomanu. (Ovil. 4:29, 31) Handi vali, osimbu tu linga elilongiso lietu lio pokolika loku sokolola ovina tua tanga Vondaka ya Suku, tu sola calua olondaka viwa, loku vi velisapo. (Va Fil. 3:8) Oku ci linga ci tu vetiya oku kuata ombili!
5. Tu pondola oku tẽlisa ndati olondaka viocitumasuku ci sangiwa kelivulu lia Yoeli?
5 Ocitumasuku ci sangiwa kelivulu lia Yoeli, ca popele hati, osimbu handi eteke lionyeño ya Yehova ka lieyile, afendeli va Suku va ka “amamako” oku kunda kuenda, lacimue ci va tateka oku linga upange waco. (Yoe. 2:2, 7-9) Citava okuti, tu kasi ale oku linga upange waco una okuti lalimue eteke u ka pituluiwa vali!