Upi Ongangu Kovaprofeto—Yona
1. Ovituwa vipi Yona a lekisa?
1 Eci o sokolola uprofeto Yona, u tenda ndati? Vamue va tenda okuti wa kala ukuosumba, haeye ocimbinde. Pole, eye wa lekisa umbombe, wa kuata utõi, kuenda wa lieca olumue. Tu kuama ‘ndati ongangu’ ya Yona?—Tia. 5:10.
2. Tu setukula ndati umbombe wa Yona?
2 Umbombe: Eci Yona a tambula ocikele caye konjanja yatete, wa endelele kumue kuiñi. Elinga liaye ka li tu komõhisa, momo va Asuria va kala olongangala, kuenda o Ninivei ya tukuiwile hati, ‘imbo liosonde.’ (Nah. 3:1-3) Konjanja yavali, Yehova wa pindisile Yona, kuenje wa lekisa umbombe poku tava ocikundi caye. (Olosap. 24:32; Yona 3:1-3) Ndaño okuti kefetikilo Yona wa susõha, noke wa linga ocipango ca Yehova. (Mat. 21:28-31) Anga hẽ tu kuete onjongole yoku kunda olondaka viwa Viusoma, ndaño pamue tu tambula epindiso, kuenda tu liyaka lovitangi poku kundila vocikanjo ca tatama?
3. Kovina vipi viupange wove woku kunda o sukila oku lekisa utõi kuenda oku lieca olumue?
3 Utõi Loku Lieca Olumue: Eci Yona a limbuka okuti wa kapele kohele omuenyo wa vakuanaviyu, wa nõlelepo oku pesela omuenyo waye muẽle. (Yona 1:3, 4, 12) Noke, poku tẽlisa ocikundi caye vo Ninivei, wa enda vokati kolupale, pocitumãlo cimue ciwa oco a sapule esombiso lia Yehova. Elinga liaco ka li lekisa okuti wa kala ukuosumba, pole wa kala uprofeto wa Suku, haeye wa kuata utõi! (Yona 3:3, 4) Nye ci popiwa kokuetu? Suku o tu kuatisa okuti eci tu liyaka lelambalalo, tu eca uvangi lutõi. (Ovil. 4:29, 31) Tu sukila oku lieca olumue poku sokiya otembo, kuenda oku eca ovipako vietu kupange woku kunda.—Ovil. 20:24.
4. Momo lie tu sukilila oku sandiliya otembo yoku sokolola ciwa ongangu yovaprofeto va Yehova?
4 Olonjanja viosi poku tanga ovolandu ovaprofeto va Yehova, o kuatisiwa calua nda wa kũlĩhĩsa ovitangi va liyaka lavio. Omo liaco lipula ndoco: ‘Nda ocitangi caco ca pitile lame, nda nda tambulula ndati?’ Ndi setukula ndati ovituwa viaye viwa? (Va Hev. 6:11, 12) Vupange Wetu Wusoma, mu ka sandekiwa ovipama, vi ka lombolola ovolandu ovaprofeto vakuavo va Yehova okuti, vi tu longisa ovina vialua.