APULILO A TAMBULUIWA
◼ Onumbi yipi Yembimbiliya tu sukila oku kapako eci umue a tu vilikiya votelefone osimbu tu kasi kolohongele, ale kupange woku kunda?
“Ovina viosi vi kuete uvo wavio” (Uku. 3:1): O telefone yo peka, yi kuatisa omanu oku tumisa asapulo kuenda oku sapela lakamba vavo. Pole, kuli apuluvi amue okuti Akristão ka va yongola okuti, oku vanguila votelefone ku va talula. Elivala liohongele, otembo yoku fendela Yehova, yoku longisiwa, kuenda yoku tambula elembeleko. (Esin. 31:12; Osa. 22:22; Va Rom. 1:11, 12) Ca sunguluka okuti eci tu pitĩla Vonjango Yolohongele tu yika o telefone yetu, kuenje tu yi yulula lika eci tu tunda oco tu tale asapulo a kapiwamo. Pole, nda kuli ocina cimue conjanga, tu sukila oku tepulula ocileñi cotelefone oco ka yi ka tateke vamanji oku yevelela ciwa.
“Cosi ndi ci lingila ondaka yiwa” (1 Kor. 9:23): Olonjanja vimue, eci tu enda kupange woku kunda, citava okuti tu vanguila votelefone. Pamue manji umue o songuila upange woku kunda o yongola oku sapela la vamanji va kundila kolonepa vikuavo viocikanjo. Akundi, olonjanja vimue va yongola oku vanguila votelefone lomunu umue wa lekisa onjongole, ale lomunu va pasuisile kefetikilo, ca piãla enene nda omunu waco o kasi ocipãla. Nda tu ambata otelefone, tu sukila oku kuata utate oco ka yi ka tu tateke, osimbu tu kasi oku sapela lomanu kolonjo viavo. (2 Va Kor. 6:3) Osimbu tu kasi oku kevelela akundi vakuavo, nda tu tumisa asapulo loku vilikiya akamba vetu votelefone, tu lekisa hẽ okuti tua tiamisila utima kupange woku kunda kuenda ku vamanji tu talavaya lavo?
Velisipo Vakuene. (1 Va Kor. 10:24; Va Fil. 2:4): Poku kala kolohongele viupange woku kunda, ka tu yongola oku kuata ocekelela loku sima okuti, otembo yosi tu sukila oku vilikiya omunu umue votelefone, ale oku tuma asapulo kokuaye oco a kũlĩhe oku vamanji va kasi oku kundila. Nda tu kuete ocituwa coku cilua, olonjanja viosi vamanji va ka sukila oku linga a pongoloko. Pole, kuli apuluvi amue okuti, tu cilua omo liovitangi vimue. Omo liaco, nda tu likolisilako oku pitĩla selo, tu lekisa okuti, tua sumbila eliangiliyo lia Yehova, la manji o songola kuenda akundi vakuavo.