Helie o ka vi Sola?
1. Ovina vipi o sukila oku kũlĩhĩsa poku tanga Utala Wondavululi lo Despertai!, kuenda momo lie?
1 Utala Wondavululi kuenda o Despertai!, via pongiyiwa locimãho coku kuatisa omanu voluali luosi. Eli olio esunga lieci mu sangiwila ovipama vi kuete olosapi via litepa. Poku tanga olorevista viaco, tu sukila oku kũlĩhĩsa ovipama vina omanu va ka sola oku tanga, loku sokiya ndomo tu vieca kokuavo.
2. Atosi api a sangiwa volorevista vietu omanu va pondola oku sola?
2 Anga hẽ Vutala Wondavululi wokaliye, mu sangiwa etosi limue Liembimbiliya wa sapelele tete lekamba liove lio kupange? Muli hẽ ocipama cimue ci lombolola omuenyo wepata okuti, ci pondola oku kuatisa vangandiove? Ove hẽ wa kũlĩha omunu umue o yongola oku enda kofeka yimue ya tukuiwa vo Despertai!? Anga hẽ o kuete orevista yi pondola oku vetiya omunu ukualomĩlu, ale ocisoko combiali vocikanjo cene? Kũlĩhĩsa orevista yimue yi lombolola ovitangi omanu va kuka va siata oku liyaka lavio okuti, yi pondola oku vetiya omunu o kasi konjo yepuyuko. Citava okuti vakuavihandeleko kuenda akuenje velombe, va sola ocipama cimue ciyilila vorevista.
3. Tukula ulandu umue u lekisa esilivilo lioku eca atendelo olorevista vina okuti vi vetiya omanu.
3 Onima Yiyililako: Olohueli vimue vio ko Afrika do Sul, noke yoku tambula o Despertai!, ya Mbalavipembe yo 2011, losapi hati: “Como Criar Filhos Responsáveis,” via telefonalela kolosikola 25, kuenda kolonjo vioku tata omãla vocikanjo cavo. Ci soka akũi avali lavali kalongisi, va tava oku tambula olorevista viaco oco va vi ece kolondonge. Olohueli vikuavo kofeka yaco via lingavo esokiyo lioku eca olorevista kolosikola vi kasi vocikanjo cavo. Kuenje, ulongisi umue wo kosikola, wa nõlapo oku longisa olondonge viaye lovipama vi sangiwa vorevista yaco. Olohueli viaco, via lomboluila ulandu wavo ku mitavaso o nyula akongelo, kuenje, mitavaso yaco wa vetiya akongelo vocikanjo caye oco va kundile kolosikola. Noke ofiliale ya tambula apingilo alua oco va vokiyeko etendelo liorevista yaco, okuti ya pangiwile ale!
4. Momo lie tu yonguila oku eca olorevista komanu vosi?
4 Olorevista vietu vi tukula ovina via siata oku pita voluali, kuenda vi tiamisila ovolandu aco Vembimbiliya, kuenda Kusoma wa Suku. Olorevista vietu, ovio lika vi “sapula eyovo.” (Isa. 52:7) Omo liaco, tu yongola oku vi eca komanu vosi. Onjila yimue yiwa yoku ci linga, oku kũlĩhĩsa epulilo eli: ‘Helie o ka vi Sola?’