Sokiya Ocindekaise Cimosi Oco ku Eciwe Olorevista Vivali
Volorevista vietu, mu sangiwa atosi alua alitepa okuti a vetiya onjongole yomanu. Ndaño okuti mu sangiwa atosi alua, ca sunguluka okuti, eci tu kundila konjo lanjo, tu tukula lika etosi limosi. Nda tua kũlĩhĩsa ciwa ovina vi sangiwa volorevista, tu ka tẽla oku nõla etosi limue Vutala Wondavululi ale vo Despertai! okuti, li vetiya onjongole yomunu tu sanga konjo. Poku sanga ovikuata omãla va siata oku papala lavio konjo, citava okuti tu lekisa orevista mu sangiwa ocipama ci lombolola omuenyo wepata. Eci ulume a yulula epito pamue tu tukula ondaka yimue ya siata oku sakalaisa alume valua, ndeci oku kuata ombiali yiwa. Ndaño okuti pamue tu tukula lika etosi limosi, pole nda omunu o lekisa onjongole tu pondola oku u sila olorevista vivali.