Upi Ongangu Kovaprofeto—Amosi
1. Momo lie ongangu ya Amosi yi tu pamisila?
1 Anga hẽ eteke limue wa simile hoti ku pondola oku kunda omo okuti kua tangele calua? Nda oco, o sukila oku kuama ongangu yutõi Amosi a lekisa. Eye wa kala ungombo wolomeme loku lombuila oviti viakuyu, pole Yehova wo nõla oco a sandeke esapulo likuete esilivilo. (Amo. 1:1; 7:14, 15) Cimuamue haico koloneke vilo, Yehova o kuatisa vana okuti ambombe. (1 Va Kor. 1:27-29) Ocina cipi cikuavo tu lilongisa kongangu yuprofeto Amosi?
2. Nye ci pondola oku tu kuatisa oku pandikisa kupange woku kunda ndaño lelambalalo?
2 Amamako Oku Pandikisa Ndaño Lelambalalo: Eci Amasiya una wa enda oku fendela ociñumañuma conale, wakala kuviali wo konano wapata ekũi a va Isareli, poku yeva esapulo lia Amosi, wa kala ndu a tambulula hati: ‘Kuende! Tu sie likalietu! Tu kuete ale etavo lietu!’ (Amo. 7:12, 13) Vepingilo a linga ku Soma Yerevoama, Amasiya wa vangula uhembi catiamẽla kupange wa Amosi. (Amo. 7:7-11) Pole Amosi ka kuatele usumba. Koloneke vilo, asongui vamue vatavo va kuatisa olombiali kelikolisilo liavo lioku lambalala omanu va Yehova. Pole, Yehova lalimue eteke a ka ecelela okuti va tẽlisa onjongole yavo.—Isa. 54:17.
3. Asapulo api avali tu kasi oku kunda koloneke vilo?
3 Sapula Esombiso Lia Suku Kuenda Asumũlũho a Keya Kovaso Yoloneke: Ndaño Amosi wa sandeka esapulo lioku pisa usoma wapata ekũi lia va Isareli, pole eye wa malusula oku soneha elivulu Liembimbiliya liambata onduko yaye poku tukula ohuminyo ya Yehova yoku tumbulula kuenda oku nena asumũlũho alua. (Amo. 9:13-15) Tu kasivo oku sapula “eteke liekanga” lia Suku li kasi oku iya pole, eyi yimue ño onepa “yolondaka viwa viusoma” tu sukila oku sapula. (2 Pet. 3:7; Mat. 24:14) Uyaki wa Yehova woku nyõla olondingaĩvi ko Harmagedo, onjila yimue yoku yelisa ongongo oco yi linge ocumbo celau.—Osa. 37:34.
4. Ekolelo li pi tu kuete liokuti tu ka tẽlisa ocipango ca Yehova?
4 Oku kunda esapulo Liusoma voluali muli valua va tu lambalala, ci seteka onjongole kuenda elitumbiko lietu lioku amamako oku linga ocipango Yehova. (Yoa. 15:19) Ndaño lovitangi viaco, tua kolela okuti Yehova o ka amamako oku tu kuatisa oco tu tẽlise ocipango caye, ndeci a linga la Amosi.—2 Va Kor. 3:5.