Epingilo Liolorevista—li Kuatisa Koku Fetika Alilongiso Embimbiliya
1. Momo lie tunde kosimbu ocisoko ca Yehova ci vetiyila akundi oku kuata epingilo liolorevista?
1 Omanu valua, ka va yongola oku lilongisa Embimbiliya, pole va sanjukila oku tanga olorevista vietu. Omo liaco, ocisoko ca Yehova tunde kosimbu ci vetiya akundi oku kuata epingilo liolorevista. Omanu vana va siata oku tanga olorevista vietu, va sanjukila Ondaka ya Suku. (1 Pet. 2:2) Kuenje, ovina va tanga, vi pondola oku va vetiya oku tava oku lilongisa Embimbiliya.
2. Tu vetiya ndati onjongole yomanu vana tua siata oku sila olorevista?
2 ‘Tapela’ Ombuto Yocili: Ku ka ece lika olorevista pole, sanda oku sapela lomunu wa sanga loku linga ukamba laye. Oku ci linga ci ku kuatisa oku kũlĩha ekalo liaye, eci a sole, kuenda ovina a tava. Ci ku ĩhavo epuluvi lioku vangula lonjila yimue yu vetiya. (Olosap. 16:23) Lipongiya ciwa poku ka linga apasu. Nda citava, tukula etosi limue liavelapo kuenda ocisonehua ci li kuata ci sangiwa vorevista, poku ci linga o kasi oku tapela ombuto yocili yi kasi vutima waye. (1 Va Kor. 3:6) Soneha eteke wa linga epasu, elivulu wo sila, ulandu wa sapeli kuenda ocisonehua wa tangi.
3. Otembo yipi tu pondola oku tiuka oco tu linge epasu komanu vana va siata oku tanga alivulu etu?
3 Otembo Yipi o Pondola Oku Tiuka? O pondola oku tiuka eteke limosi vosãi, oco wece olorevista viokaliye komanu vana va siata oku tanga. Omo liaco, nda otembo yove yecelela, kuenda omanu va lekisa onjongole, o pondola oku sokiya oku u pasuisa olonjanja vialua. Eci pa pita osemana imosi ale vivali, o pondola oku tiuka, loku popia ndoco: “Ndeya kulo, oco ndi sapele love catiamẽla ketosi limue li sangiwa vorevista nda ku silile.” Olondaka viaco viu vetiya oku tanga ocipama cimue. Nda eye wa tanga ale ocipama caco, o pondola oku u pulisa ovina vipi a lilongisa kulandu waco kuenda oku sapela catiamẽla kovina a tanga. Andi vali, nda omunu waco wa sola oku tanga olorevista vietu, citava okuti o tiuka oco ece kokuaye okokanda kamue, ombrochura ale elivulu li kasi oku aviwa kosãi yaco.
4. Otembo lotembo, nye tu sukila oku linga oco tu kũlĩhe nda omanu va tanga alivulu etu va yongola oku va longisa Embimbiliya?
4 Ku ka kevelele toke eci omunu wa sanga oku pinga oco u longise Embimbiliya. Lekisa onjongole yoku ci linga. Ndaño okuti kefetikilo ka tavele oku u longisa Embimbiliya, otembo lotembo o pondola oku sapela laye ulandu u sangiwa Vutala Wondavululi losapi hati, “Apulilo Embimbiliya A Tambuluiwa,” kuenda oku kũlĩhisa nda eye o yongola oku sapela love catiamẽla kulandu waco. Poku ci linga ci ecelela oku fetika elilongiso pepito liomunu wa sanga. Omo liaco, nda ka ca ecele oku fetika elilongiso o pondola oku amamako oku eca olorevista oco o vetiye onjongole yomunu.