Tu Mioñololi Uloño Wetu Kupange Woku Kunda—Omanu tu Sila Olorevista Osãi Losãi

Esunga Lieci ci Kuetele Esilivilo: Omanu valua va sanjukila oku tanga olorevista vietu ndaño okuti ka va lilongisa Embimbiliya. Citava okuti ovo, va sanjukila etavo liavo ale va sima okuti ka va kuete otembo yoku lilongisa. Osimbu va tanga olorevista vietu olonjanja viosi, va pondola oku kuata onjongole yoku lilongisa ondaka ya Suku. (1 Pet. 2:2) Citava okuti ocipama cimue va tanga ci vetiya utima wavo ale va fetika oku lilongisa omo liekalo liomuenyo wavo lia pongoloka. Oku linga esokiyo lioku nyula lonjanga omanu vaco, ci va kuatisa oku lianja letu kuenda ci tu kuatisavo oku kũlĩha ovisimĩlo viavo lovina va sukila. Noke, ku lingiwa esokiyo lioku fetika oku va longisa Embimbiliya.

Ndomo tu ci linga:

Olosãi viosi, sanda otembo yoku eca Utala Wondavululi kuenda o Despertai! yosãi komunu umue. Citava okuti o nyula omunu waco vokuenda kuosãi oco okuti onjongole yaye yoku tanga olorevista ove eca kokuaye yi livokiya kuenda soneha ovina wa sapeli.—Tanga Upange Wetu Wusoma wosãi ya Susu wo 2014, kem. 3.
Lipongiya ciwa poku ka linga apasu. Ku ka sie ño olorevista, pole, sapela lomunu wa sanga kuenda linga ukamba laye oco o vetiye onjongole yaye.
Sanda apuluvi oco o fetike oku u longisa Embimbiliya. Nda omunu umue wa siata oku tambula olorevista o pinga kokuove oco u lomboluile eci Embimbiliya li popia catiamẽla kulandu umue, eca kokuaye elivulu limue tua siata oku longisa lalio omanu okuti mu sangiwa atambululo aco, kuenda sapeli ovina viaco. Osimbu kua tundile konjo yaye, linga epulilo limue oco o li tambulule onjanja yikuavo. Nda olonjanja viosi poku sapela o tiamisila ombangulo yaco Kembimbiliya ale kelivulu limue tua siata oku longisa lalio, o kasi oku longisa Embimbiliya. Anga hẽ, wa siata oku eca komunu wa sanga ombrochura losapi hati Olondaka Viwa vi Tunda ku Suku kuenda oku lekisa komunu waco ndomo elilongiso Liembimbiliya li lingiwa? Wa siata hẽ oku u lekisa ovideo losapi hati: Momo Lie Ndi Lilongisila Embimbiliya? Kuenda Nye ci Lingiwa Velilongiso Limue Liembimbiliya? Ndaño okuti omunu waco ka lekisile onjongole yoku lilongisa, pole, citava okuti o pongolola ovisimĩlo viaye. Anga hẽ nda wa ci linga cu ku kuatisa?

Seteka Ndoco Vokuenda Kuosãi:

Soneha olonduko viomanu vana wa siata oku eca olorevista. Eca kokuavo olorevista viokaliye, kuenda va sapuila okuti onjanja yikuavo o va nenela alivulu akuavo.