Talavaya Ciwa Lolorevista Viosimbu

Nda olorevista viosimbu tua vi soleka, ale tua vinasi, ka vi kuatisa omanu. Omo liaco, tu sukila oku vieca komanu. Orevista yimosi yi pondola oku kuatisa omanu oku kũlĩha ocili, kuenda yi va vetiya oku tukula onduko ya Suku. (Va Rom. 10:13, 14) Olonumbi vi kuãimo vi lombolola ndomo tu talavaya ciwa lolorevista viosimbu.

• Eci tu kundila omanu vovikanjo vina okuti ka tua siatele oku kundilamo olonjanja vialua, citava okuti tu sia orevista yimue kolonjo vina okuti, ka tua sangeleko omanu.

• Eci o kundila povitumãlo pa sangiwa omanu valua, ndeci, povitumãlo vioku talamẽla oviendelo, ale omboyo, pulisa komanu o sanga nda va yongola oku tanga cimue, loku lekisa kokuavo olorevista viosimbu kuenda ecelela okuti va nõla orevista va yongola oku tanga.

• Poku nyula omanu va talavaya volonjo vioku sukuila uwalo, olonjo vioku tata vana va kuka, olosipitali, ale ovitumãlo vikuavo vi sangiwa vocikanjo cekongelo liene, citava okuti eca olorevista viosimbu komanu va kasi pocitumãlo coku kevelela. Poku ci linga, o sukila tete oku pinga kusongui wo pocitumãlo caco nda opo a kasi. Nda wa limbuka okuti omanu pocitumãlo caco va kasi ale oku tanga olorevista, ku ka ece vali vikuavo.

• Eci o lipongiya oco o ka nyule omanu wa kundila, kũlihĩsa onjongole yomunu lomunu wa sokiya oku nyula. Li pula ndoco: Anga hẽ, o kuete epata konjo? O sole hẽ, oku linga ovongende? O talavaya hẽ, vocumbo colonelehõ? Sandiliya volorevista viosimbu, nda muli ocipama cimue okuti, oku ci tanga ci nena esanju, oco o ka ci tuale komunu o ka nyula.

• Nda wa sanga omunu umue konjo yaye okuti wa lekisa onjongole, poku sapela laye onjanja yikuavo lekisa kokuaye olorevista vi lombolola ovina wa sapeli.