Apulilo Atambuluiwa
◼ Nye omãla va sukila oku lilongisa oco va kule konepa yespiritu?
Olonjali Akristão vi kuete ocikele coku longisa “omãla vavo loku va pindisa lovilongua via Yehova.” (Va Efe. 6:4) Olonjali via siata oku limbuka okuti, oku konomuisa ovisonehua eteke leteke kumue lomãla vavo, ci kuete esilivilo. Vokuenda kuefendelo liepata, vosi va sukila oku talela kumosi ovideo loku konomuisa ovina va tala, oku sapela ovolandu a sangiwa vovipama losapi hati: “Os Jovens Perguntam,” kuenda oku sokolola ulandu umue ale oku linga ovindekaise. Omo liaco, oco omãla ‘va amameko oku kula kespiritu’ va sukila oku kũlĩha ciwa ocili ci sangiwa Vembimbiliya.—Va Hev. 6:1.
Tu konomuisi ovina tu sukila oku longisa komanu tu sanga vocikanjo cetu. Eci tu kundila omanu onjanja yatete ale oku nyula vana va lekisa onjongole, tua siata oku fetika oku longisa Embimbiliya lekuatiso lielivulu Embimbiliya li Longisa Nye? Noke yoku malusula elivulu liaco, citava oku fetika elivulu “Kali Vocisola ca Suku.” Momo lie? Momo, elivulu Embimbiliya li Longisa Nye? li kuatisa omanu tu longisa oku kuata ukũlĩhĩso Wovisonehua. Elivulu “Kali Vocisola ca Suku,” li va longisa ndomo va pondola oku kapako olonumbi Viembimbiliya komuenyo wavo. Oku konomuisa alivulu aco, ci kuatisa vana va fetika ndopo oku lilongisa Embimbiliya, oku kuata ‘olombombo’ vu Kristu kuenda oku amamako oku pamisa ekolelo liavo.’ (Va Kol. 2:6, 7) Anga hẽ, alivulu aco a pondolavo oku kuatisa omãla vetu? Ovo va sukila oku kulĩha ovina viatiamẽla kocisembi, Kusoma, kuenda kekalo liomanu va fa. Omãla va sukilavo oku kũlĩha esunga lieci Suku a ecelela ohali kuenda ndomo va pondola oku limbuka okuti tu kasi koloneke viasulako violuali lulo. Va sukilavo oku tava okuti Olombangi Via Yehova vi longisa ocili. Amalẽhe vamue, va sukila oku kuata elomboloko liolonumbi Viembimbiliya kuenda ndomo va pondola oku pindisa “olondunge viavo.” (Va Hev. 5:14) Omo liaco, olonjali vi sukila oku kapako utunga womãla vavo, kuenda oku limbuka ndomo va pondola oku kuata elomboloko liovina viaco. Pole, kuli omãla valua okuti, va fetika oku lilongisa Embimbiliya tunde vutila.—Luka 2:42, 46, 47.
Oco olonjali vi kuatisiwe, vonumbi yetu yo Internet jw.org, mua kongeliwa olonumbi vioku lilongisa elivulu Embimbiliya li Longisa Nye?. Apata va pondola oku sanga olonumbi viaco vonumbi yetu yo Internet poku tala pokasapi ka linga hati: ENSINOS BÍBLICOS, kuenda ADOLESCENTES. Kovaso yoloneke, elivulu “Kali Vocisola ca Suku,” li ka kongeliwa volonumbi vioku lilongisa, vi sangiwa vo jw.org. Tu pondolavo oku upa olokopia vialivulu aco, oco vi tu kuatise koku longisa. Olonjali vi sukila oku nõla nda vi pondola oku kuama olonumbi viaco Kefendelo liavo Liepata, poku longisa Embimbiliya komãla vavo, ale poku va pindisa oco va linge elilongiso liavo lio pokolika.