Oku Tẽlisa Ocimãho Colohongele Viupange Woku Kunda

1. Olohongele vioku enda kupange woku kunda vi kuete ocimãho cipi?

¹ Onjanja yimue, Yesu wa lingile ohongele yimue leci ci soka 70 kolondonge osimbu ka va endele kupange woku kunda. (Luka 10:1-11) Eye wa va vetiya poku va ivaluisa okuti ka va kasi lika liavo, pole, va songuiwa la Yehova okuti eye ‘Cime cupange woku ungula.’ Yesu wa ecavo olonumbi kokuavo via va vetiya oku linga upange waco kuenda wa linga esokiyo lioku va tuma “vavali, vavali.” Koloneke vilo, olohongele tua siata oku linga vioku enda kupange woku kunda, vi kuetevo ocimãho cimuamue okuti oku vetiya, oku pamisa kuenda oku tu angiliya.

2. Ohongele yupange woku kunda yi lingiwa vakukutu añami?

² Koloneke vilo, olohongele vioku enda kupange woku kunda vi lingiwa vokuenda kueci cisoka 10 kakukutu ale akukutu 15, oku kongelamo oku sokiya ovimunga, ovikanjo kuenda oku linga olohutililo. Pole, kua lingiwa esokiyo liokaliye. Oku upisa kosãi ya Kupupu, olohongele viupange woku kunda ka vi ka pitãhala akukutu atãlo ale akukutu epanduvali. Omo liaco, nda okuti kocitumãlo caco ku ka liongoluila ekongelo likuavo, ohongele yaco ka yi ka kale otembo yalua momo vamanji va siata ale oku tambula olonumbi viupange woku kunda. Oku linga lonjanga ohongele yaco ci kuatisa vosi oku pesila otembo yalua kupange woku kunda. Nda okuti akundi votembo yosi ale akundi vakuavo va fetika upange wavo woku kunda osimbu ohongele yupange woku kunda ka wa fetikile, ovo va ka tepulula lika akukutu amue kotembo yavo.

3. Olohongele viupange woku kunda vi sokiyiwa ndati oco vi kuatise akundi vosi?

³ Olohongele viupange woku kunda, vi sokiyiwa locimãho coku kuatisa akundi vosi. Akongelo alua va nõlapo oku liongoluila kovimunga okuti ka va liongolola lika kocitumãlo cimosi. Oku ci linga, ci leluka oku enda kocitumãlo ku lingiwila ohongele yaco kuenda vocikanjo. Esokiyo liaco, li kuatisa akundi oku lipongiya lonjanga kuenda ci leluka kumanji o songola ohongele yupange woku kunda oku kũliha ciwa vamanji vosi. Akulu vekongelo va pondola oku kũlĩhisa ekalo liopocitumãlo caco loku nõlapo onjila va kuama. Osimbu ka kua lingiwile ohutililo yoku malusula, akundi vosi va sukila oku kũliha kocitumãlo va ka kundila kuenda omunu a talavaya laye.

4. Momo lie olohongele viupange woku kunda vi kuetele esilivilo ndevi vi lingiwa Vonjango Yusoma?

⁴ Olohongele Viupange Woku Kunda vi Kuetevo Esilivilo Ndevi vi Lingiwa Vonjango Yusoma: Omo okuti olohongele viupange woku kunda vi kuatisa vana va enda kupange woku kunda, akundi ovo lika va sukila oku kala kohongele yaco. Pole, olohongele viupange woku kunda vi kuetevo esilivilo ndevi vi lingiwa Vonjango Yusoma. Ndeci ci lingiwa kolohongele viosi, olohongele viupange woku kunda, esokiyo limue lia eciwa la Yehova oco li tu kuatise oku loñoloha loku livetiya pokati locisola kuenda oku lekisa ovituwa viwa. (Va Hev. 10:24, 25) Omo liaco, vamanji va kuete ocikele coku songola va sukila oku lipongiya ciwa oco okuti ovina va ka popia vi sivaya Yehova kuenda vi kuatisa vamanji va kasi kohongele yaco. Nda va ci linga, akundi va enda kupange woku kunda va ka likolisilako oku kala kohongele yaco.

Olohongele viupange woku kunda vi kuetevo esilivilo ndevi vi lingiwa Vonjango Yusoma

5. (a) Mitavaso yupange woku kunda o kuete ocikele cipi catiamẽla kolohongele viupange woku kunda? (b) Manji ukãi o pondola ndati oku songola ohongele yupange woku kunda?

⁵ Ndomo Vamanji va Songola va Lipongiya: Oco omunu a lipongiye ciwa poku linga onepa yimue kohongele, o sukila oku tambula selo onepa yaco. Cimuamue haco ci pita lohongele yupange woku kunda. Nda okuti ovimunga vimue vi liongoluila kovitumãlo vialitepa, vamanji va kuete ocikele co kusongola citava okuti va songola ohongele yaco vovimunga viavo. Eci ekongelo li sokiya oku lingila pamosi ohongele yupange woku kunda, manji ukuakusongola citava oku nõla manji umue oco a linge ohongele. Olomitavaso viupange woku kunda va eca ulandu wesokiyo ku vamanji va songola kuenda ulandu ukuavo u kapiwa vo quadro ya sapulo ekongelo. Mitavaso yupange woku kunda, o sukila oku lavulula poku nõla vamanji va ka songola loku ivaluka okuti nda manji o ka songola wa loñoloha, o longisa ciwa kuenda o ci linga lonjila yimue yi vetiya vamanji va kasi kohongele yaco. Nda kapali ukulu umue wekongelo, oñuatisi yimue yekongelo ale manji umue wa papatisiwa, citava okuti mitavaso yupange woku kunda o nõla manji umue ukãi wa papatisiwa oco a songole ohongele yaco.—Tanga ocipama losapi hati: “Ceci Manji Ukãi a Songola Ohongele Yupange Woku Kunda.”

6. Momo lie ci kuetele esilivilo okuti manji wa noliwa oku songola o lipongiya ciwa?

⁶ Eci tu tambula ocikele cimue Kosikola Yupange Wakristão ale Kohongele Yupange, tu likolisilako oku lipongiya ciwa. Lomue pokati ketu okuti osimbu a kasi vonjila o pongiya ovina a ka popia kohongele. Manji wa noliwa oku songola ohongele yupange woku kunda o sukilavo oku kuama onjila yimuamue. Omo okuti otembo yohongele yupange woku kunda yi ka tepuluiwa, ci kuete esilivilo oku lipongiya ciwa oco ohongele yaco yi kuate elomboloko kuenda yi lingiwa votembo ya sokiyiwa. Voku lipongiya ciwa mua kongela oku sokiya selo ovikanjo.

7. Ovina vipi manji o songola hongele yupange woku kunda a sukila oku lombolola?

⁷ Ovina vi popiwa: Omo okuti ocikanjo locikanjo ci kuete ekalo lia litepa, ‘ukuenje wa kolelua’ ka eci olohundo vi lingiwa kupange woku kunda. Vokakasia losapi hati: “Ovina vi Konomuisiwa Vokuenda Kuohongele Yupange Woku Kunda” ku lombolola olonumbi vimue. Olonjanja vimue olohongele viupange woku kunda vi lingiwa lapulilo amue kolonjeveleli. Citava okuti mu kongeliwa ocindekaise cimue ca pongiyiwa ciwa ale olonumbi vimue viovideo vi sangiwa vo jw.org. Poku pongiya ohongele yupange woku kunda, manji o songola o sukila oku ivaluka ovina vi vetiya havio vi pamisa va manji va enda kupange woku kunda keteke liaco.

Ceci Manji Ukãi a Songola Ohongele Yupange Woku Kunda

8. Ocina cipi ci kuete esilivilo ci pondola oku lomboluiwa kohongele yupange woku kunda Volocasapalo kuenda Volocalumingu?

⁸ Akundi valua okuti Volocasapalo, va siata oku eca Utala Wondavululi kuenda o Despertai! Vana okuti va siata lika oku enda kupange woku kunda Vocasapalo olonjanja vimue va kuata ovitangi vioku ivaluka ovina va pongiya vokuenda kuefendelo liavo liepata. Omo liaco, manji o songola ohongele yaco o sukila oku pitulula olonumbi vi lekisiwa kemẽla liasulako Liupange Wetu Wusoma. Volonumbi vikuavo mua kongela oku lombolola catiamẽla kesapulo limue lio posongo, ocipito cimue, poku eca orevista ale ndomo tu li pongiya poku nyula omunu tua kundila nda okuti wa tava oku tambula olorevista. Nda okuti vamanji vamue va talavaya ale lolorevista vi kasi oku eciwa kosãi yaco, manji o songola citava okuti o pinga ku vamanji oco va lombolole olonumbi vimue ale ovolandu va kuata. Volocasapalo, citava okuti manji o songola o nolapo oku lombolola ovina vimuamue vi lekisa ndomo ku ka eciwa olorevista viosãi. Alivulu tua siata oku longisa lavo omanu ndeci: Olombrochura losapi, Olondaka Viwa kuenda Yevelela Suku kumue lelivulu Embimbiliya li Longisa, vi pondola oku eciwa oloneke viosi kuenda manji o songola citava okuti o konomuisa ndomo tu eca alivulu aco.

9. Nye ci pondola oku lomboluiwa kesulilo liosemana eci ku lingiwa esokiyo liupange ulikasi?

⁹ Nda okuti ekongelo lia sokiya oku linga upange ulikasi kesulilo liosemana, manji o songola o sukila oku kũlĩhĩsa ndomo kueciwa olorevista viosãi kumue lotuikanda tuelaleko ale otuikanda tukuavo poku lombolola ovina vi vetiya onjongole yomunu tua sanga. Ale citava okuti o lombolola ovolandu a lekisa esilivilo liupange waco.

10, 11. Momo lie ci kuetele esilivilo akundi oku lipongiya oco va kuatise kohongele yupange woku kunda?

¹⁰ Akundi va Sukila Oku Lipongiya: Akundi vana va kala kohongele yupange woku kunda, va pondola oku kuatisa oco ohongele yaco yi kuate onima yiwa. Poku lipongiya selo ndeci vokuenda kuefendelo liavo liepata, ci va kuatisa oku lombolola ulandu umue kakundi vakuavo. Voku li pongiya ciwa, mua kongela oku kuata olorevista kuenda alivulu akuavo osimbu ka va endele kohongele yupange woku kunda, oco vosi va pitile vocikanjo votembo ya sokiyiwa.

¹¹ Omo liaco, ci kuetevo esilivilo oku linga esokiyo lioku pitĩla selo kohongele yupange woku kunda. Ocili okuti, tua siata oku likolisilako oku pitila selo kolohongele viekongelo. Pole, nda ka tu pitĩla selo kohongele yupange woku kunda, ka tu eci ongangu yiwa. Momo lie? Momo manji o songola, o kũlĩhĩsa olonumbi vialua osimbu ka va endele kupange woku kunda. Nda kuli lika etendelo litito lia kundi, citava okuti va nolapo oku kundila kocikanjo cimue okuti va siata ale oku kundilako. Nda okuti kocitumãlo ku lingiwila ohongele kupãla, manji o songola o pondola oku sokiya okuti vamanji va tunda la vamanji vakuavo va kuete oviendelo. Nda vocikanjo caco muli omanu va linga ungangala, eye o pondola oku nola vamanji alume oco va kundile kumue la vamanji akãi. Akundi vana okuti va vela, va pondola oku kundila ocipepi okuti ka va endi kupãla. Akundi vana okuti ndopo va fetika oku kunda, citava okuti va kundila kumue lavamanji vana va kasi ale osimbu kupange woku kunda. Pole, nda okuti akundi ka va pitĩla selo, vamanji ka va kuatisiwa lesokiyo liaco. Citava okuti olonjanja vimue tu kuata esunga lioku cilua kohongele yupange woku kunda. Pole, nda tu kuete ocituwa coku cilua, tu sukila oku li kũlĩhĩsa nda momo okuti ka tu sanjukila olohongele viupange woku kunda, ale nda ka tu tẽla oku linga esokiyo lioku ongotiya selo ovina vietu muẽle.

12. Nda wa siata oku linga esokiyo liove muẽle lioku enda kupange woku kunda nye o sukila oku kũlĩhĩsa?

¹² Akundi vamue vapondola oku linga esokiyo liavo osimbu ohongele yupange woku kunda kaya fetikile ale oku kevelela toke eci vo tukuila omunu a tunda laye. Pole, nda okuti wa siata oku linga esokiyo liove muẽle anga hẽ, o pondola oku “lianja” poku talavaya la vamanji vakuavo, okuti ku talavaya lika lakamba vove olonjanja viosi? (2 Va Kor. 6:11-13) O pondola hẽ oku linga esokiyo lioku talavaya lukundi umue wokaliye oco u kuatise oku loñoloha koku longisa? (1 Va Kor. 10:24; 1 Tim. 4:13, 15) Kapako olonumbi viosi wa siata oku tambula, oku kongelamo onumbi yatiamẽla kovikanjo o ka kundila. Noke yohongele yaco yuvula oku pongolola esokiyo lia lingiwa kuenda kuende lonjanga vocikanjo u ka kundila.

13. Onima yipi tu kuata nda tu kuatisa kolohongele viupange woku kunda?

¹³ Ci soka 70 kolondonge Yesu a tumĩle kupange woku kunda, “via tiuka lonjolela.” (Luka 10:17) Ocili okuti, ohongele Yesu a linga lavo osimbu ka va fetikile oku kunda ya va kuatisa oku kuata onima yiwa. Koloneke vilo, ohongele yupange woku kunda yi kuetevo ocimãho cimuamue. Nda vamanji vosi va eca ekuatiso liavo, ohongele yupange woku kunda yi tu vetiya, yi tu pamisa kuenda yi tu angiliya oco tu tẽlise ocikundi tua tambula coku “kundila kolofeka viosi.”—Mat. 24:14.

Poku pongiya ohongele yupange woku kunda, manji o songola o sukila oku ivaluka ovina vi vetiya havio vi pamisa va manji va enda kupange woku kunda keteke liaco

Manji ukãi o sukila oku futa elesu kuenda o tumãla eci a songola ohongele yupange woku kunda. Eye o lombolola olonumbi viaco ndeci manji umue ulume a linga. Pole, o sukila oku yuvula oku pindisa vamanji va kasi kohongele yaco. Eye o ci linga loku ecelela okuti vosi va panga onepa. Nda manji umue ulume wa papatisiwa o sanga okuti ohongele yaco ya fetika ale, manji ukãi o pondola oku laleka manji ulume oco a malusule ohongele yaco. Mitavaso yupange woku kunda, o sukila oku eca olonumbi via sunguluka ku vamanji vosi oco okuti ka va ka kuata ovitangi poku songola ohongele yaco. Nda akulu vekongelo va limbuka okuti manji umue ulume umãlehe okuti wa papatisiwa ka loñolohele oco a songole ohongele yupange woku kunda, citava okuti o kala kohongele yaco ndanõ manji ukãi eye wa noliwa oku songola ohongele yaco. Mitavaso yupange woku kunda o sukila oku sapuila ku vamanji vakuavo okuti manji ukãi o ka songola ohongele yaco, pole, manji yaco ulume o linga ohutililo nda akulu vekongelo va limbuka okuti o pondola oku ci linga. Citava okuti pokati ka vamanji va kasi kohongele yaco, pali manji umue ulume wa papatisiwa okuti wopiwa ovikele vioku songola ohongele ale oku linga olohutililo vekongelo omo liepindiso limue a tambula kakulu vekongelo. Akulu vekongelo ka va sukila oku situluila ovina manji yaco a linga, pole, va ecelela okuti vamanji akãi va songola loku likutilila ndaño okuti manji yaco ulume o kasi kohongele yaco. Akulu vekongelo va sukilavo oku sapuila kumanji yaco ulume oloneke manji ukãi a ka songola olohongele viupange woku kunda.

Ovina vi Konomuisiwa Vokuenda Kuohongele Yupange Woku Kunda:

Ocindekaise cimue ci sangiwa Vupange Wetu Wusoma.
Ovideo yimue yatiamẽla kupange woku kunda yi sangiwa vo jw.org.
Oku lipongiya ciwa, poku sokiya olondaka vioku fetika ombangulo, oku linga esokiyo lioku nyula omunu tua kundila, ale oku tukula etosi limue li sangiwa velivulu tu eca komunu wa lekisa onjongole.
Oku tanga ocinimbu cimue Cembimbiliya ci vetiya okuti ci likuata lovina tu ka popia kupange woku kunda.
Oku lombolola ulandu umue wo pocitumãlo ale umue u sangiwa valivulu etu watiamẽla kupange woku kunda.
Olonumbi vi sangiwa vovipama Viupange Wetu Wusoma
Olonumbi via tukuiwa konepa yimue Yohongele Yupange.
Olonumbi vimue viatiamẽla kupange woku kunda vi sangiwa Vutala Wondavululi.
Olonumbi vimue viupiwa valivulu ndeci: Osikola Yupange kuenda “Linga Ondonge Yange.”
Ulandu umue wo jw.org okuti u pondola oku tu kuatisa kupange woku kunda.
Ulandu umue u sangiwa vo Traducão do Novo Mundo yokaliye okuti u tu kuatisa kupange woku kunda.
Ndomo tu fetika ombangulo lomunu umue tu sanga vocikanjo okuti ka tava ku Suku, o tava kelongiso liokuti ovina via tukuluka ño, ukuetavo lio Indu ale lio Budismo.
Ndomo tu tambulula omunu umue o tu teta kondaka.
Ndomo tu kuatisa ekamba tu tunda laye kupange woku kunda oku loñoloha.
Ndomo tu tambulula omunu umue o vangula elimi likuavo.
Ndomo tu pondola oku kundila kumue lavamanji ndeci poku linga akonomuiso, oku eca uvangi lekuatiso liotelefone, oku kundila kovitumãlo ku sangiwa omanu valua, oku nyula vana va lekisa onjongole ale oku longisa omanu Embimbiliya.
Olonumbi vimue viatiamẽla koku liteyuila, oku lekisa esunguluko, oku kuata ovituwa viwa ale ovina vikuavo.