Ndomo o Kuatisiwa Locimunga Cupange Woku Kunda
1. Esokiyo Liovimunga Vielilongiso Lielivulu Vekongelo lia kuata esilivilo lie, kuenda li kasi oku kuatisa ndati ovimunga viupange woku kunda?
1 Anga hẽ wa ivalako ovina vimue tua lingaile Vovimunga Vielilongiso Lielivulu Vekongelo? Omo okuti vovimunga viaco ka mua kalele omanu valua, ca kuatisile vamanji oku lianja. Handi vali, ca lelukilevo oku linga ukamba una u pamisa ekolelo. (Olosap. 18:24) Esokiyo liaco, lia enda oku kuatisa usongui wocimunga celilongiso lielivulu oku kũlĩha ciwa vamanji loku eca elembeleko komunu lomunu. (Olosap. 27:23; 1 Pet. 5:2, 3) Toke cilo, esokiyo liaco li kasi oku amamako oku kuatisa ovimunga viupange woku kunda.
2. Ndamupi tu lekisa onjongole yoku linga ukamba la vamanji vocimunga cetu cupange woku kunda oco tu pamise ekolelo?
2 Lekisa Onjongole Yoku Kuatisa: Ovimunga vimue viupange woku kunda ka vi kuete omanu valua ndeci ca kala ovimunga vielilongiso lielivulu vekongelo. Poku talavaya kupange woku kunda ‘kumosi’ la vamanji, tu pamisa ukamba tu kuete lavo. (Va Fil. 1:27) Anga hẽ wa siata oku talavaya la vamanji vosi vocimunga cene? O pondola hẽ oku ‘lianja’ lavo? (2 Va Kor. 6:13) Olonjanja vimue, tu sukila oku laleka vamanji vamue Kefendelo Lietu Liepata, ale oku lila kumue lavo onanya. Vamanji vakongelo amue, va siata oku linga esokiyo liokuti, onjanja lonjanja eci va laleka manji umue oco a linge ohundo, ocimunga cimue cupange woku kunda ci pongiya okulia. Kuenje, ocimunga cina ca nõliwa osemana yaco, ci liongola oku lia onanya loku livetiya pokati, ndaño pamue manji wa linga ohundo ka pondola oku kala kumue lavo.
3. Vapuluvi api tu pondola oku pasuisiwa vocimunga cetu cupange woku kunda?
3 Ndaño okuti cilo akongelo ka a siatele oku liongolola olonjanja vialua vosemana, eci ka ci lomboloka okuti, akulu vekongelo ka va pondola vali oku pasuisa vamanji. Asongui vovimunga viupange woku kunda va siata oku nõla vamanji vamue va sukila elembeleko kuenda oku va pindisa kupange woku kunda. Nda usongui wocimunga cene ka ku nõlele handi oco o talavaye laye kupange woku kunda, momo lie ku pingila kokuaye? Handi vali, mitavaso yupange woku kunda o kuete esokiyo liokuti, osãi losãi o pasuisa ocimunga cimue kuenda o talavaya la vamanji kupange woku kunda. Vakongelo ana muli ovimunga vitito, eye o linga esokiyo lioku nyula ocimunga locimunga olonjanja vivali vunyamo. Ove hẽ wa linga ale esokiyo lioku enda kupange woku kunda la mitavaso yupange eci a ka nyula ocimunga cene?
4. (a) Ovimunga viupange woku kunda via sokiyiwa ndati? (b) Momo lie tu popela okuti oku eca onjo yetu oco yi kale ocitumãlo colohongele viupange woku kunda esumũlũho lia velapo?
4 Nda ocimunga locimunga ci kuete ocitumãlo va siata oku liongoluila kesulilo liosemana, ci kuete esilivilo. Momo oku kuata ovitumãlo vialua vioku lingila ohongele yoku kunda ci tepulula otembo, kuenje, cecelela okuti akundi ka va lingi ungende walua woku enda kohongele yaco kuenda kupange woku kunda. Ci kuatisavo vamanji oku lipongiya lonjanga oco va kale kohogele yaco, okuti ka va cilua. Handi vali, ci kuatisa usongui wocimunga oku limbuka vamanji vana va sukila oku kuatisiwa lonjanga. Olonjanja vimue, ka ca sungulukile okuti ovimunga vivali, ale ovimunga vialua vi liongoluila pamosi. Nda okuti, ovimunga viosi viekogelo vi liongoluila pamosi Vocasapalo catete vosãi, noke Yelilongiso Liutala Wadavululi, ca sunguluka okuti ocimunga locimunga ci tumãla pamosi oco cecelele asongui vovimunga oku nõla lonjanga vamanji osimbu handi ka va lingile ohutililo yoku enda kupange woku kunda.—Tanga okakasia losapi hati, “O Pondola hẽ Oku Eca Onjo Yove?”
5. Ndaño okuti Elilongiso Lielivulu Vekongelo lia imũha, nye tu sukila oku kolela?
5 Ndaño okuti Elilongiso Lielivulu Vekongelo lia imũha, pole, Yehova o kasi oku amamako oku sokiya ovina vi kuatisa oku tẽlisiwa kuocipango caye. (Va Hev. 13:20, 21) Omo okuti, Yehova wa siata oku tu tata ciwa, lacimue ci tu kambela. (Osa. 23:1) Oku tiamẽla kocimunga cupange woku kunda, ci nena asumũlũho alua. Omo liaco, nda tu likolisilako oku lekisa onjongole yoku ‘kũla calua, tu kongula calua.’—2 Va Kor. 9:6.
[Okakasia kemẽla 6]
O Pondola hẽ Oku Eca Onjo Yove?
Omo okuti vakongelo amue vamanji ka va kuete olonjo vioku lingila olohongele viupange woku kunda, va sokiya okuti, ovimunga viupange woku kunda vi lingila olohongele viavo vonjo yimosi olonjanja vialua. Oku eca onjo yetu oco mu lingiwile olohongele viupange woku kunda, esumũlũho limue lia velapo. Ove hẽ o pondola oku eca onjo yove? Ku ka sime okuti onjo yove ka ya posokele. Nda onjo yove ya taviwa oku kala ocitumãlo colohongele vioku kunda, akulu vekongelo va ka kũlĩhĩsa ovina vi sukiliwa viatiamẽla kocitumãlo caco ndevi vielilongiso lielivulu vekogelo. Omo liaco, nda o yongola oku eca onjo yove sapuilako usongui wocimunga cene.