Talavaya Ciwa Lotembo Yove Kupange Woku Kunda
Vunyamo wupange wo 2014, Olombangi Via Yehova via talavaya eci ci soka 1.945.487.604 kolowola kupange woku kunda. Ovina viaco—vi lekisa okuti tua nolapo oku litumbika kupange wa Yehova. (Osa. 110:3; 1 Va Kor. 15:58) Omo okuti, otembo ya “tu tukuiwila ya linga yimbumbulu” citava hẽ okuti tu pesila otembo tu kuete oco tu kundile omanu valua?—1 Va Kor. 7:29.
Oco tu talavaye ciwa lotembo yetu kupange woku kunda, tu sukila oku sokiya ciwa otembo yetu. Nda okuti o pita olowola vialua kupange woku kunda okuti ku sapela lomunu umue, citava hẽ okuti o linga apongoloko oco o sapele lomanu valua? Ocili okuti ocitumãlo locitumãlo ci kuete ekalo lialitepa. Omo liaco, olonumbi vi kuãimo vi ka ku kuatisa oku talavaya ciwa lotembo yove oco o yuvule oku “veta ño ofela.”—1 Va Kor. 9:26.
Oku Kundila Konjo Lanjo: Vokuenda kuanyamo alua, akundi va siata oku fetika eteke liavo liupange woku kunda poku kundila konjo lanjo. Omo okuti omanu valua oloneke viosi va enda kovopange oku sanda eteku, momo lie ku lingila esokiyo lioku kundila koñolosi vepuluvi lina okuti omanu oco va sangiwa kolonjo viavo? Oku kundila volokololo ale kovitumãlo violomĩlu vokuenda kueteke, ci nena onima yiwa.
Oku Kundila Kovitumãlo ku Sangiwa Omanu Valua: Citava okuti ekongelo li linga esokiyo lioku kundila kovitumãlo ku sangawi omanu valua lekuatiso lioku kapa alivulu komesa kuenda okangulu ka kasi ndopatilela yoku kapa alivulu. (Tanga Upange Wetu Wusoma wosãi Yevambi Linene wo 2013, kem. 5) Nda kocitumãlo kua kapiwa omesa yalivulu ka ku sangiwa vali omanu valua, citava okuti Vamanji Vakuacikele Coku Songuila Upange Woku Kunda vekongelo va sukila oku linga esokiyo liokuti, omesa ale okangulu kalivulu vi kapiwa pocitumãlo cikuavo ku sangiwa omanu valua.
Oku Nyula Omanu Tua Kundila Kuenda Oku va Longisa Embimbiliya: Citava hẽ oku linga esokiyo lioku ka nyula omanu wa kundila loku va longisa Embimbiliya vepuluvi limue okuti ka ci leluka oku kundila omanu? Nda okuti wa siata oku kuata lika onima yiwa kupange woku kundila konjo lanjo Volocasapalo komẽle, o pondola hẽ oku longisa omanu Embimbiliya kekumbi ale koñolosi? Akundi poku nyula omanu va kundila va pondola hẽ oku endela vakãlu a litepa oco va kuate epuluvi lioku kundila omanu valua?
Ndaño okuti tu sukila oku soneha otembo tu pesila kupange woku kunda, pole, esanju lietu li livokiya eci tu kuata onima yiwa. Nda wa limbuka okuti onjila wa nõla yoku kunda ka yeci onima yiwa, citava okuti o nõla onjila yikuavo. Likutilila ku Yehova “Cime cokungula” oco a ku songuile loku ku kuatisa oku limbuka ndomo o talavaya ciwa lotembo yove kupange woku kunda!—Mat. 9:38