Olondaka vi Vetiya Havio Via Sunguluka Vioku Kundila Kovitumãlo ku Sangiwa Omanu Valua
1. Nye akongelo ana okuti a kuete ovitumãlo mu pita omanu valua, va vetiyiwa oku linga?
1 Akongelo ana okuti a kuete ovitumãlo mu pita omanu valua, va vetiyiwa oku linga esokiyo lioku kundila kovitumãlo viaco lekuatiso lioku kapa alivulu komesa. Nda alivulu a kapiwa komesa, akundi vavali va noliwa va kala ponele yomesa yaco. Ovo va sukila oku lianja lomanu, kuenda oku kuata ukamba lavo. Nda okuti omunu umue wa lekisa onjongole, ukundi umue o pondola oku fetika ombangulo poku pula ndoco: “Anga hẽ wa lipulile ale eci Embimbiliya li longisa catiamẽla kondaka yaco?” Ukundi ukuavo o pondola oku kuatisa oku eca uvangi ka wa sokiyiwile.
2. Lombolola ulandu umue u lekisa esilivilo lioku kundila kovitumãlo ku sangiwa omanu valua poku kapa alivulu komesa.
2 Eliangiliyo liaco, lia siata oku kuatisa omanu valua oku lilongisa Embimbiliya. Umalẽhe umue okuti o lilongisila kosikola yavelapo, poku linga upange waye wo kosikola wa nolapo oku soneha ovina viatiamẽla Kolombangi Via Yehova, pole ka tẽlele oku sanga Onjango yimue Yusoma. Kosemana yikuavo wa mola omesa yimue kua kapiwa alivulu. Noke wa fetika oku lilongisa Embimbiliya kuenje cilo wa papatisiwa kuenda wa siatavo oku kundila kovitumalo ku sangiwa omanu valua.
3. Nye akundi vamue va siata oku popia catiamẽla koku eca uvangi kovitumãlo ku sangiwa omanu valua?
3 Manji umue ukãi okuti wa siatavo oku kundila kovitumãlo ku sangiwa omanu valua wa popia hati: “Omanu vamue va talama ponele yomesa, oco va ambate olorevista viokaliye. Pole vakuavo, lalimue eteke va yevele ovina via tiamẽla Kolombangi Via Yehova. Nda limbuka okuti omo liesokiyo liaco omanu valua va vetiyiwa oku lilongisa Embimbiliya.” Manji ukuavo ukãi wa popiavo ndoco: “Eliangiliyo lioku kundila kovitumãlo ku sangiwa omanu valua li vetiya halio lia sunguluka momo li kuatisa omanu oku yevelela ciwa.”
4. Momo lie ci kuetele esilivilo oku kapa omesa yalivulu pocitumãlo cimuamue, keteke limuamue, kuenda kelivala limuamue liosemana?
4 Cikuete esilivilo oku kapa o mesa yaco pocitumãlo cimuamue, keteke limuamue, kuenda kelivala limuamue liosemana. Momo ci vetiya omanu oku kũlĩha ciwa ocitumãlo caco, kuenda va lianja poku pinga elivulu limue. Anga hẽ vekongelo o kasi mua lingiwa esokiyo lioku kundila kovitumãlo ku sangiwa omanu valua? Nda kua lingiwa, citava okuti o pondola oku kuatisa kupange waco lesanju loku kuata onima yiwa koku “longisa ondaka yiwa yusoma wa Suku.”—Luka 9:60.