Ovipama Via Ngalavaliwa—Ndomo tu Talavaya Lavio
1. Ovipama vipi vikuavo via vokiyiwa kalivulu etu?
1 Omanu valua va siata oku kuata esanju poku tanga ovolandu a sangiwa vo jw.org, oco va kuate elomboloko lia suapo liocili Cembimbiliya. (Uku. 12:10) Wa siata hẽ oku talavaya lovipama via ngalavaliwa? Vamanji va siata oku yevelela ovipama viaco, va kũlĩha ovina vialua vi sangiwa vonumbi yetu yo Internet. Ovipama via ngalavaliwa vi pondola ndati oku tu kuatisa?
2. Tu pondola ndati oku talavaya lovipama via ngalavaliwa kelilongiso lio pokolika kuenda kefendelo liepata?
2 Ci tu Kuatisa Kelilongiso Lio Pokolika Kuenda Kefendelo Liepata: Oku yevelela ovipama via ngalavaliwa ndeci: Viembimbiliya, violorevista, ale vialivulu akuavo osimbu o linga ungende, poku linga ovopange eteke leteke, ci tu kuatisa oku talavaya ciwa lotembo. (Va Efe. 5:15, 16) Tu pondola oku vokiya ovina vikuavo tu lilongisa kefendelo lietu liepata poku yevelela oku tangiwa kuovipama via ngalavaliwa osimbu tu kuama velivulu limue. Oku yevelela ovipama via ngalavaliwa vokuenda kuelilongiso lietu lio pokolika ci pondola oku tu kuatisa oku tanga ciwa ale oku lilongisa elimi likuavo.
3. Omanu vapi vocikanjo cetu va pondola oku kuatisiwa lovipama via ngalavaliwa?
3 Kupange Woku Kunda: Omanu tu sanga vocikanjo cetu okuti ka va kuete otembo yoku tanga alivulu etu, va pondola oku yevelela ovipama via ngalavaliwa. Citava okuti tu sanga omanu va vangula alimi akuavo kuenda va tava lika esapulo Liusoma poku va kundila “kelimi liavo muẽle.” (Ovil. 2:6-8) Kolofeka vimue, ocituwa coku yevelela, ci panga onepa kovituwa viomanu vaco. Omanu va vangula elimi lio Hmong, va kuete ocituwa coku lomboluila kamalẽhe ovolandu avo kuenda amalẽhe vaco va likolisilako oku patekela ovolandu aco loku a lomboluilavo ku vakuavo. Omanu valua vo Afrika va sanjukila oku kuata elomboloko liovolandu.
4. Apulilo api tu pondola oku linga atiamẽla koku kuatisa omanu vocikanjo cetu?
4 Anga hẽ o pondola oku kuatisa omanu vocikanjo cove poku yevalisa ovipama via ngalavaliwa kelimi liavo? Omanu hẽ va pondola oku kuatisiwa poku yevelela ovipama via ngalavaliwa vielivulu tua eca kokuavo? Tu pondola hẽ oku tapa elivulu limue lia ngalavaliwa loku li kapa vo CD oco tu liece komunu wa lekisa onjongole kumue lelivulu liaco? Ovipama viosi via ngalavaliwa ndeci, elivulu, ombrochura, otuikanda ale olorevista tu eca kupange woku kunda, tu pondola oku vi soneha vulandu wetu wupange woku kunda. Tu pondola oku yevelela ovipama via ngalavaliwa poku linga elilongiso lietu lio pokolika loku sandeka ocili Cusoma.—1 Va Kor. 3:6.