Talavaya Ciwa Lovipama Vielivulu Embimbiliya li Longisa

Osimbu omunu tu longisa Embimbiliya, a fetika oku kapako ovina a lilongisa, eye o ka ima apoko awa. (Osa. 1:1-3) Tu pondola oku kuatisa omunu tu longisa Embimbiliya oku kula poku talavaya ciwa lovipama vielivulu Embimbiliya li Longisa.

Apulilo Oku Fetika: Ocipama locipama ci fetika lapulilo a ka tambuluiwa vokuenda kuocipama. O pondola oku linga apulilo akuavo oco okuti omunu o longisa Embimbiliya ecavo etambululo volondaka viaye muẽle. Ale, o pondola oku pinga kokuaye oco a ece etambululo kepulilo lepulilo. Nda okuti etambululo liaye ka lia suilepo, ku sukila oku u pisa vonjanja yaco. Atambululo aye a ka ku kuatisa oku sokolola ciwa konepa a sukila oku linga apongoloko.—Olosap. 16:23; 18:13.

Alomboluilo a Vokiyiwako: Nda omunu o longisa Embimbiliya o kuata elomboloko loku tava kovina a kasi oku lilongisa, u vetiya oco a pitulule ovipama vi sangiwa kalomboluilo a vokiyiwako volondaka viaye muẽle. Kelilongiso likuavo, sanda akukutu amue oco o kũlĩhĩse nda eye o kuete elomboloko liovina a lilongisa. Nda wa limbuka okuti wopa esilivilo kovipama viaco vokuenda kuelilongiso, sanda otembo yoku lombolola ocipama ci sangiwa kalomboluilo a vokiyiwako ale nolapo oku tanga ovinimbu viaco loku linga apulilo ove wa pongiya.

Okakasia Koku Pitulula: Okakasia koku pitulula ka sangiwa kesulilo liocipama locipama mu sangiwa olondaka vi eca atambululo kapulilo oku fetika. Talavaya ciwa locimãleho caco oco o kuatise omunu o longisa Embimbiliya oku kuata elomboloko loku lombolola atosi a velapo. Tangeli kumosi ovinimbu vimue lolukandi kumue lovinimbu Viembimbiliya via tukuiwa. Pinga kondonge oco yi lombolole esilivilo liovinimbu via tangiwa lekuatiso Liembimbiliya.—Ovil. 17:2, 3.