O Kasi hẽ Oku Talavaya lo JW Library?

O JW Library ocimalẽho cimue ci kuatisa oku tapa Embimbiliya, alivulu akuavo, olovideo, kuenda ovipama via ngalavaliwa okuti vi kapiwa votelefone yove, vo tablet, ale vo kombutador.

NDOMO O PONDOLA OKU YI TAPA: Iñila vo Internet, noke lekuatiso lio app store, tapa o JW Library. O app yaco yi sangiwa volotelefone, volo tablet, ale volo kombutador. Osimbu o kasi vo Internet, yikula o JW Library kuenje tapa alivulu o yongola oco o a kape vo kombutador ale vo telefone yove. Nda ku kuete o Internet konjo, citava okuti o ci lingila Vonjango Yusoma, vociseleko cimue calivulu ci sangiwa volokololo, ale kovitumãlo vikuavo kuli o Internet. Eci o mala oku tapa alivulu, ku sukila oku kala vali vo Internet oco o tange alivulu aco. Omo okuti vo JW Library mua siata oku vokiyiwa ovina viokaliye, olonjanja vimue o sukila oku iñila vo Internet, oco o limbuke nda mua lingiwa apongoloko amue.

MOMO LIE TU SUKILILA OKU YI TAPA? O JW Library yi tu kuatisa kelilongiso liopokolika, kuenda kolohongele viekongelo. Yi kuatisavo kupange woku kunda, ca piãla enene poku eca uvangi ka wa sokiyiwile.