Ndomo Ululiki a Situlula Olohuminyo Viaye Viocisola

Tunde eci omanu va lulikiwa, ululiki wetu wa enda oku sapela lomanu pocakati covangelo kuenda covaprofeto. Handi vali, wa nõlapo okuti esapulo liaye kuenda olohuminyo viaye vi sonehiwa. Suku wa likuminya okuti kovaso yoloneke tu ka kuata esanju. Pole, pi o pondola oku sanga olohuminyo via Suku koloneke vilo?

Esapulo lia Suku kokuetu li sangiwa Vovisonehua vi Kola. (2 Timoteo 3:16) Suku wa vetiya ndati ovaprofeto oku soneha esapulo liaye? (2 Petulu 1:21) Suku wa kapa ovisimĩlo viaye vovisimĩlo via sonehi, oco va vi sonehe. Cimuamue haico koloneke vilo. Nda ulume umue ukualomilu o pinga kusonehi waye oku soneha esapulo limue vonduko yaye, tu limbuka okuti ulume ukualomilu, eye ukuesapulo liaco.

ONDAKA YA SUKU YI KUETE ESILIVILO

Omo okuti esapulo lia Suku likuete esilivilo, eye o yongola okuti omanu vosi va litanga loku kuata elomboloko lialio. Koloneke vilo, “olondaka viwa viotembo ka yi pui” vi kasi oku sandekiwa “kolofeka viosi, kapata osi, kalimi osi.” (Esituluilo 14:6) Lesumũlũho lia Suku, Ovisonehua vi Kola via sandekiwa liosi ale onepa yimue kueci ci pitãhala 3.000 kalimi, okuti ka kuli elivulu lalimue lia lisoka lalio voluali.