“Paulu wa Pandula Suku Kuenda wa Kuata Utõi”

Eci vamanji ko Roma va yeva okuti Paulu o kasi oku iya, va linga ungende weci ci soka 64 kolokilometulu oco va ka li sange laye. Alikolisilo va linga a kuatisa ndati Paulu? “Eci Paulu a va mola, wa pandula Suku kuenda wa kuata utõi.” (Ovil. 28:15) Ndaño Paulu wa kũlĩhĩwile okuti wa pamisa akongelo a nyula, vepuluvi eli eci eye a kala omandekua, wa pamisiwavo calua.​—2 Va Kor. 13:10.

Koloneke vilo vamanji va kuakunyula akongelo va siata oku pamisa vamanji. Ndeci ci pita lafendeli vakuavo va Suku, olonjanja vimue ovo va yeva ekavo, esakalalo kuenda va sukilavo oku pamisiwa. Onjanja yikuavo eci manji o nyula akongelo kuenda ukãi waye va nyula ekongelo o kasi, nye o sukila oku linga oco o va kuatise oku kuata utõi, okuti pa kala “evelo lioku likolisa pokati”?​—Va Rom. 1:11, 12.

• 

  Poku enda kohongele yupange woku kunda. Manji o nyula akongelo o pamisiwa eci akundi va likolisilako oku enda kupange woku kunda vosemana yaco yilikasi. (1 Va Tes. 1:2, 3; 2:20) Sokiya oku talavaya ndukundi wa sokamo vokuenda kuosãi yepasu. Citava hẽ okuti o sokiya oku talavaya laye ale lukãi waye kupange woku kunda ale oku enda lavo komunu umue o longisa Embimbiliya? Ovo va sanjukila oku talavaya lakundi va litepa, oku kongelamo vana okuti ndopo va fetika oku kunda ale ka va loñolohẽle calua kupange woku kunda.

• 

  Poku va yekisa. Citava hẽ okuti o va yekisa ale oku va ĩha okulia? Poku ci linga o lekisa kokuavo okuti o va sole. Ovo ka va sukila ovina vialua.—Luka 10:38-42.

• 

  Poku va yevelela, oku kapako olonumbi kuenda elungulo liavo. Vamanji va nyula akongelo va lekisa ocisola, poku tu kuatisa oku limbuka ndomo tu pondola oku mioñoloha kupange tu lingila Yehova. Vepuluvi liaco, eye o pondola oku tu ĩha elungulo li tu pamisa. (1 Va Kor. 5:1-5) Eye o kuata esanju eci tu pokola kolonumbi viaco.—Va Hev. 13:17.

• 

  Lekisa olopandu. Sapuila manji o nyula akongelo kuenda kukãi ndomo wa kuatisiwa omo lialikolisilo avo. O pondola oku ci linga poku vangula lavo, ale poku va sonehela ukanda umue.—Va Kol. 3:15.