Kupange Wove Woku Kunda Talavaya Lombrochura Sanjukili Omuenyo Otembo ka yi Pui!

Tua sanjuka calua omo okuti tu kuete ombrochura kuenda elivulu liokaliye lioku songola alilongiso Embimbiliya! Tu likutilila ku Yehova oco a sumũlũise alikolisilo etu oku linga olondonge vialua. (Mat 28:18-20; 1Ko 3:6-9) Tu talavaya ndati lovimalẽho viaco viokaliye?

Omo okuti ombrochura Sanjukili Omuenyo Otembo ka yi Pui!, ya pangiwila oku longisa omanu Embimbiliya, yi lekisa onjila yokaliya yoku longisa, oku kuama olonumbi viaco ci ku kuatisa oku lipongiyila oku endisa alilongiso Embimbiliya.a

• Tanga ulandu kuenda konomuisa apulilo

• Tanga ovisonehua lonumbi yokuti “tanga”, kuenje kuatisa ondonge oku kuata elomboloko ndomo vi kapiwako

• Lekisa kuenda lombolola olovideo poku linga apulilo a sokiyiwa

• Seteka oku longisa ocipama cosi vonjanja yimosi

Kupange woku kunda, tete eca ombrochura oco o limbuke o njongole yomunu. (Tala okakasia losapi “Ndomo ku Eciwa Ombrochura Sanjukili Omuenyo Otembo ka yi Pui! Kombangulo Yatete.”) Nda wa mali oku lilongisa ombrochura kuenda ondonge yi yongola oku amamako, eca kokuaye elivulu kuenda fetika locipama 04. Nda ove o kasi oku longisa umue velivulu, Embimbiliya li Pondola ale Vocisola ca Suku, fetiki oku lilongisa elivulu Sanjukili Omuenyo Otembo ka yi Pui! kuenda nõla apa vu fetikila.

TALA OVIDEO LOSAPI HATI, WA LINGA WEYA KELILONGISO LIOVE LIEMBIMBILIYA KUENDA TAMBULULA APULILO A KUÃIMO:

• Nye olondonge vi ka lilongisa velivulu liokaliye?

• Momo lie o sukilila oku lekisa ovideo yaco kolondonge viokaliye?

• Ovimãho vipi o sukila oku vetiya ondonge oku litumbikila loku vi tẽlisa?—Tala pokakasia “Ovimãho Vionepa Lonepa”