Ndomo tu Talavaya Lombrochura, Olondaka Viwa vi Tunda ku Suku! Ombrochura Yokaliye ya Pongiyiwila Oku tu Kuatisa Oku Linga Apasu Kuenda Oku Fetika Alilongiso Embimbiliya
1. Ombrochura yipi tua tambula Kohongele Yofeka losapi “Lava Utima Wove!,” yi ka tu kuatisa oku linga apasu kuenda oku fetika alilongiso Embimbiliya?
1 Vokuenda Kuohongele Yofeka losapi hati: “Lava Utima Wove!” tua sanjukila oku tambula ombrochura yokaliye yi tu kuatisa oku linga apasu kuenda oku fetika alilongiso Embimbiliya. Ombrochura Olondaka Viwa vi Tunda ku Suku! ya lisetahãla lombrochura Suku o Yongola Nye Kokuetu, okuti ya tepiwa vovipama vitito. Ombrochura yaco yi tu kuatisa oku fetika alilongiso Embimbiliya puvelo womunu tua sanga. Ombrochura Suku o Yongola Nye Kokuetu, yi lombolola ovina vi kisikiwa Kakristão okuti, ka ca lelukile olondonge viokaliye oku vi tava. Pole, ombrochura yokaliye, yi lombolola olondaka viwa vi sangiwa Vembimbiliya.—Ovil. 15:35.
2. Momo lie ombrochura yokaliye ya pangiwila?
2 Momo lie ya pangiwila? Vamanji voluali luosi va siata oku linga apulilo a teta onimbu okuti, a vetiya omanu oku tava kocili. Noke, va lekisa elivulu Embimbiliya li Longisa Nye!, okuti olio tua siata oku longisa lalio Embimbiliya komanu. Omanu vana va sima okuti ka ca lelukile oku lilongisa elivulu eli, va ka sanjukila oku lilongisa ombrochura yokaliye tua tambula ndeti. Ca leluka oku pongoluila ombrochura yaco kalimi alua.
3. Ombrochura yokaliye ya litepa ndati lalivulu akuavo oku lilongisa?
3 Ndomo ya pangiwa: Valua pokati kalivulu etu a pangiwa lonjila yimue okuti omanu poku a tanga, va kuata elomboloko Liembimbiliya okuti, ka va sukila ekuatiso. Pole, ombrochura eyi ya litepa. Oyo ya pangiwila oku kuatisa akundi poku longisa Embimbiliya komanu. Eci o yeca ku umue, o sukila oku kũlĩhĩsa lika ocinimbu cimosi ale vivali. Omo okuti ovinimbu viaco vitito, citava oku vi kũlĩhĩsa osimbu utãi puvelo womunu wa sangi, ale pocitumãlo cupange. Ndaño ocipama 1 ca leluka oku fetika laco ombangulo, pole tu pondola oku fetika elilongiso Liembimbiliya lovipama vikuavo viombrochura.
4. Ombrochura eyi yi tu kuatisa ndati koku longisa Embimbiliya?
4 Valua pokati kalivulu etu, a tambululo apulilo, a sangiwa vovinimbu. Pole, vombrochura eyi, atambululo aco a sangiwa Vembimbiliya. Omanu valua va yongola lika oku lilongisa Embimbiliya, pole, ka va tava oku ci linga lekuatiso lialivulu etu. Vakuavo ka va yongola okuti tu va tukuila ocisonehua cimue Cembimbiliya. Ovo, va yongola lika oku tanga Embimbiliya. Poku ci linga, ci kuatisa olondonge oku limbuka okuti, ovina va kasi oku lilongisa vi tunda ku Suku.—Isa. 54:13.
5. Momo lie ci kuetele esilivilo ukundi oku lipongiya ciwa, osimbu ka endele koku longisa omunu umue?
5 Ombrochura eyi ka yi lombolola ovinimbu viosi Viembimbiliya. Momo lie? Momo ya pangiwa locimaho coku vetiya ondonge oku linga apulilo, kuenda yi kuatisa ukundi oku longisa ciwa. Omo liaco, tu sukila oku lipongiya ciwa osimbu ka tua endele koku longisa Embimbiliya. Elungulo: Yuvula oku vangula calua. Etu tu sole oku lombolola ovina vi sangiwa Vovisonehua. Pole, tu sukila oku pinga kondonge oco yi lombolole ocisimĩlo caye catiamẽla kocinimbu Cembimbiliya ca tangiwa. Nda wa linga apulilo lutate, ci kuatisa ondonge oku sanga elomboloko liocinimbu Cembimbiliya ca tangiwa.—Ovil. 17:2.
6. Tu pondola ndati oku talavaya lombrochura: (a) Pocitumãlo cina okuti omanu ka va yongola oku yevelela catiamẽla ku Suku kuenda Kembimbiliya? (b) Poku kundila konjo lanjo? (c) Poku fetika elilongiso Liembimbiliya puvelo womunu tua sanga? (d) Poku tiukila oku pasuisa vana tua nyula onjanja yatete?
6 Ndomo tua siata oku eca alivulu oku linga elilongiso Liembimbiliya, ombrochura yokaliye citava okuti yeciwa vapuluvi osi, ndaño kua lingiwa esokiyo lioku yeca kosãi yikuavo. Akundi valua va sanjukila oku talavaya lombrochura yaco, poku fetika elilongiso Liembimbiliya puvelo womunu va sanga. Kohongele yofeka tua lilongisa okuti, tu pondola oku talavaya layo “poku linga epasu ku vana va lekisa onjongole!”—Tanga pokalokasia ka sangiwa kemẽla 4-7.
7. O pondola ndati oku linga elilongiso Liembimbiliya lombrochura yokaliye?
7 Ndomo tu Longisa Layo Omanu: Tu pondola oku fetika ombangulo poku tanga apulilo a sonehiwa lotinda yi tẽkava calua. Noke, tanga ocinimbu kuenda ovisonehua via yendukila kovaso. Linga apulilo oco o kuatise omunu wa sanga oku kuata elomboloko liovisonehua. Osimbu ka wa tangeli etosi li kuãimo, pulisa omunu wa sanga okuti o tambulula epulilo lia sonehiwa lotinda yi tekãva calua, oco o limbuke nda colomboloka. Kapasu atete kũlĩhisi lika epulilo limosi lia sonehiwa lotinda yi tekãva calua. Vokuenda kuotembo, tu pondola oku kũlĩhĩsa ocipama cosi.
8. Nye tu sukila oku yuvula, poku tukula ocisonehua cimue, kuenda momo lie?
8 Kovinimbu Viembimbiliya kua sonehiwa hati “tanga,” ovio vi tambulula epulilo lia sonehiwa lotinda yi tekãva calua. Poku tukula ocisonehua cimue yuvula oku popia hati: “Upostolo Paulu wa soneha ndoco, ale tala eci Yeremiya a popia.” Momo omunu tua sanga o pondola oku sima okuti, tu kasi oku tanga olondaka viomanu. Omo liaco, ca sunguluka oku popia hati: “Ondaka ya Suku ya popia ndoco” ale “Tala eci Embimbiliya li popia.”
9. Vokuenda kuelilongiso tu sukila hẽ oku tanga ovinimbu viosi Viembimbiliya via tukuiwa?
9 Tu sukila hẽ oku tanga ovinimbu viosi Viembimbiliya via tukuiwa, ale tu tanga lika vina kua sonehiwa hati, “tanga”? Ekalo liomunu tua sanga, olio li tu kuatisa oku nõla onjila tu kuama. Vombrochura yaco mu sangiwa ovinimbu vimue Viembimbiliya okuti, ka tu sukila oku vi tanga, loku vi lomboluila kondonge. Vovinimbu Viembimbiliya tu pondola oku sangamo ovina tu pondola oku lomboluila ondonge. Pole, pamue tu sanga omanu vana okuti, ka va kuete otembo yalua yoku tu yevelela, ale ka va lekisa onjongole, vakuavo ka va tẽla oku tanga ciwa. Omo liaco, tu sukila lika oku tanga lavo ovinimbu Viembimbiliya via sonehiwa hati, “tanga.”
10. Otembo yipi citava oku pongoluila elilongiso velivulu Embimbiliya li Longisa Nye?
10 Ceci tu Sukila Oku Pongoluila Elilongiso Velivulu Embimbiliya li Longisa Nye!: Noke yoku sapela olonjanja vialua okuti tua fetikile oku longisa omunu Embimbiliya, tu pondola oku nõla nda tu kuama elivulu Embimbiliya li Longisa Nye!, ale tu amamako vombrochura yokaliye toke kesulilo liayo. Akundi ovo va pondola oku nõla otembo citava oku fetika elilongiso velivulu. Noke yeliangiliyo liaco, citava hẽ okuti ondonge yetu yi fetikila kocipama catete, velivulu Embimbiliya li Longisa Nye? Ka kuli onumbi yi lekisa ndomo ci lingiwa. Omanu tu longisa, ka va kuete elomboloko limuamue. Pole, olondonge vialua vi kuatisiwa poku vokiya ukũlĩhĩso wavo, osimbu va lilongisa elivulu Embimbiliya li Longisa Nye.
11. Momo lie tu sukilila oku talavaya ciwa lombrochura yokaliye?
11 Koloneke vilo, tu kuete esumũlũho lioku kundila omanu esapulo liwa liokuti, Usoma wa Suku u ka nena oluali luokaliye, mu ka kala esunga! (Mat. 24:14; 2 Pet. 3:13) Tua kolela okuti omanu va ka yeva esapulo liaco, va ka sanjukila olondaka viokuti: ‘Olomãhi viomunu iya kolomunda londaka yiwa via posoka nye! Eye o sapula ombembua kuenje iya londaka yiwa yesanju. Haeye o sapula eyovo, kuenje o popia la Siono hati, Suku yove wa linga osoma!’ (Isa. 52:7) Tu pondola oku kundila omanu va kasi vocikanjo cetu olondaka viwa vi tunda ku Suku, lekuatiso liombrochura yokaliye.
[Olondaka vielitalatu kemẽla 5]
Kovitumãlo Vina Okuti Omanu ka va Yongola Oku Yevelela Catiamẽla ku Suku Kuenda Kembimbiliya:
● Kovikanjo vimue, akundi va siata oku sanga omanu ka va tava oku vangula catiamẽla ku “Suku” kuenda “Kembimbiliya.” Omo liaco, kepasu liatete ca sunguluka oku tukula ovina vi vetiya omanu vocikanjo ndeci: Oku kuata ombiali yiwa, ovina vi kuatisa apata, kuenda ekalo liwa kovaso yoloneke. Tu pondola lika oku lekisa ombrochura Olondaka Viwa noke yoku sapela olonjanja vialua catiamẽla koku kũlĩha okuti kuli Suku, kuenda esunga lieci tu sukilila oku kolela Kembimbiliya.
[Olondaka vielitalatu kemẽla 6]
Poku Kundila Konjo Lanjo:
● Ndeya oku ku nyũla oco ndu ku lekise ovina Suku a yonguila omanu kovaso yoloneke. O tava hẽ okuti Suku o ka mãlako ohali? [Ecelela etambululo.] Ombrochura yilo yi lekisa ocinimbu Cembimbiliya ci tambulula epulilo eli. [Eca kokuaye ombrochura loku tanga ocinimbu catete kocipama 1, kuenda elivulu lia Yeremiya 29:11.] O tava hẽ okuti Suku o tu yonguila ekalo liwa kovaso yoloneke? [Ecelela etambululo.] Nda wa yi sola o siala layo. Onjanja yikuavo tu ka kũlĩhĩsa ocinimbu cavali ceca etambululo Liembimbiliya liepulilo eli: ‘Suku o ka yovola ndati omanu kovina vi koka ohali?’ (Kepasu liatete, nda omunu o kuete otembo o pondola oku tanga laye ocinimbu cavali vombrochura, kuenda ovinimbu vitatu Viembimbiliya. Linga eliangiliyo lioku tiuka oco u kũlĩhĩse epulilo liavali vocipama caco.)
● “Omanu valua va sole oku likutilila, ca piãla enene eci va liyaka lovitangi. Ove hẽ wa siata oku likutilila? [Ecelela etambululo.] O sima hẽ okuti Suku o yevelela olohutililo viomanu vosi, ale o yevelela lika viomanu vamue? [Ecelela etambululo.] Ombrochura yilo yi lekisa ndomo tu sanga etambululo Liembimbiliya kapulilo a lingiwa ndeti. [Eca kokuaye ombrochura kuenda konomuisa laye ocinimbu catete kocipama 12 kuenda “tanga” ovinimbu Viembimbiliya.] Anga hẽ oku kũlĩha okuti, Suku o yongola oku tu yevelela ka ci tu komõhisa? Oco tu kuatisiwe lolohutililo, tu sukila oku kũlĩha ciwa Suku. [Yulula ocipama 2, kuenda lekisa kokuaye okalosapi kaco.] Nda o yongola ndu ku sila ombrochura yilo, kuenje vepuluvi likuavo, tu ka tanga atambululo Embimbiliya a tiamẽla kapulilo a lingiwa ndeti.”
● “Ndi kasi oku pasuisa vakuetu momo, amanu va sakala lekalo lioluali lulo. O tava hẽ okuti voluali mu ka kala ekalo liwa? [Ecelela etambululo.] Omanu valua va komoha eci va lilongisa okuti, Vembimbiliya mu sangiwa olondaka viwa vi tu ĩha elavoko. Ombrochura yilo yi kuete apulilo amue a tambuluiwa Vembimbiliya.” Eca kokuaye ombrochura, kuenda u lekisa apulilo a sangiwa kemẽla lia sulako oco a nõle eli a yongola oku kũlĩhĩsa. Noke, yulula kemẽla ku sangiwa ocipama caco, kuenda u lekisa ndomo elilongiso Liembimbiliya li lingiwa. Sokiya eteke lioku tiuka oco o kũlĩhĩse laye epulilo li kuãimo liocipama caco.
[Olondaka vielitalatu kemẽla 7]
Seteka Oku Teta Onimbu:
● Ndi yongola oku vangula love ca tiamẽla keliangiliyo liokaliye lioku lilongisa Embimbiliya. Ombrochura yilo yi kuete 15 kovipama vi lekisa ndomo o sanga Vembimbiliya atambululo apulilo a kuete esilivilo. [Lekisa kokuaye emẽla liatete, kuenda eli lia sulako vombrochura yaco.] Wa setekele ale oku kuata elomboloko Liembimbiliya? [Ecelela etambululo.] Ndi yongola oku ku lekisa okuti, ca leluka oku kuata elomboloko liovipama viaco. [Kũlĩhĩsa laye ocinimbu catete kuenda epulilo 3 liocipama 3 kuenda tanga elivulu Liesituluilo. 21:4, 5. Nda otembo yecelela, kũlĩhĩsa laye ocinimbu ci kuãimo kuenda oku “tanga” ocisonehua cimue.] Nda o yongola ndu ku sila ombrochura yilo. Omo liaco, tu ku vetiyiwa oku seteka eliangiliyo liokaliye lioku lilongisa Embimbiliya. Nda wa sola eliangiliyo liaco, citava okuti amamako oku ci linga. Eci tu tiuka vali, tu ka konomuisa ocipama catete. Ivaluka okuti ovipama viombrochura yaco, vi sangiwa kemẽla limosi.
[Olondaka vielitalatu kemẽla 7]
U Lekisa Epulilo o ka Tambulula Kepasu Likuavo:
● Poku pasuisa omunu wa lekisa onjongole, tu pondola oku popia ndoco: Nda sanjuka omo nda ku sanga. Nda ku nenela ombrochura yilo yi tambulula apulilo alua Embimbiliya. [Eca ombrochura kokuaye, kuenda u lekisa kemẽla lia sulako.] Pokati katosi ava lipi o yongola oku konomuisa? [Ecelela etambululo. Noke tuvula ocipama a nõla.] Linga ndu ku lekise ndomo ombrochura eyi yi tu kuatisa oku sanga atambululo Embimbiliya.” Lekisa ndomo elilongiso lilingiwa poku konomuisa ocinimbu cimosi ale vivali kuenda “tanga” ocisonehua cimue. Ivaluka okuti, ca leluka oku fetika elilongiso Liembimbiliya! Eca ombrochura komunu wa sanga konjo kuenda sokiya eteke lioku tiuka. Kesulilo liocipama caco, amako locipama cikuavo ca ñoliwa lomunu wa sanga, ale, o fetikila kocipama catete vombrochura yaco.