“Tiuki Kokuange”

1. Yehova o liyeva ndati eci omunu umue a tiuka kokuaye?

NDOMO tua lilongisa vocipama ca pita, Yehova o lisokisa lungombo umue uwa o tata locisola olomeme viaye. Eye o sandiliya omeme yosi yanyelela. Yehova wa sapuila va Isareli vana va tindukile kokuaye hati: “Tiuki kokuange, kuenje ame niukila kokuene.” Etu tua kũlĩha okuti eye handi o kuete ovisimĩlo vimuamue momo eye wa popia hati: “Si pongoloka.” (Mal. 3:6, 7) Yesu wa popia okuti, Yehova kuenda ovangelo va sanjuka calua, eci umue pokati kafendeli Vaye a tiuka Kokuaye.—Luka 15:10, 32.

2. Nye tu lilongisa vocipama cilo?

² Vocipama cilo, tu konomuisa alusapo atatu a Yesu, a ka tu longisa onjila ya velapo ndomo tu kuatisa vana va tinduka ku Yehova. Tu konomuisavo ovituwa vimue tu sukila oku lekisa oco tu kuatise vamanji vana va liwekapo oku kunda loku endaenda kolohongele oku tiuka ku Yehova. Handi vali, tu konomuisavo esunga lieci ci kuetele esilivilo oku likolisilako oku ci linga.

OKU SANDILIYA OCINGANGU CA NYELELA

3-4. Momo lie ukãi wa tukuiwa kelivulu lia Luka 15:8-10, a likolisililako oku sandiliya ocingangu caye codracma?

³ Oku sandiliya vana va yongola oku tiuka ku Yehova, ci sukila a likolisilo alua. Vevangeliu lia Luka, Yesu wa lombolola olusapo luatiamẽla kukãi umue o sandiliya cimue ci kuete esilivilo lialua okuti—ocingangu codracma. Onepa yi kuete esilivilo lialua volusapo olu, ceci okukti ukãi wa likolisilako oco a sange ocingangu caco.—Tanga Luka 15:8-10.

⁴ Yesu o lombolola ndomo ukãi a liyeva poku sanga ocingangu codracma. Koloneke via Yesu, omõla umue ukãi wa enda oku tambula ku ina ovingangu ekũi violodracma keteke liolohuela viaye. Citava okuti ocingangu caco, catiamẽlele kovingangu viaco ekũi violodracma. Ukãi wa kũlĩhĩle okuti ocingangu ca kupukila posi. Kuenje, eye o mĩha ondiyelo loku sandiliya kolonele viosi, pole, ka sangi lacimue. Ondiyelo yaco, citava okuti ka ya kuatele ocinyi calua oco eye a sange lonjanga ocingangu caco. Noke, o komba vonjo yosi. Pokati kovinene, o lete cimue ci kasi oku nina okuti: ocingangu caye. Hesanjukuolio eye a kuata! Eye o kovonga akamba vaye la vana va lisungue, oco a va sapuileko esanju a yevite.

5. Momo lie pamue ka ci leluka oku sandiliya vana va liwekapo oku kunda loku endaenda kolohongele?

⁵ Volusapo olu lua Yesu, tu limbuka okuti oco omunu a sange cimue ca nyelela, ci sukila alikolisilo alua. Cimuamue haico okuti, tu sukila oku likolisilako calua oco tu sange vana va siapo ekongelo. Citava okuti pa pita ale anyamo alua, tunde eci va liwekapo oku endaenda kolohongele. Pamue ovo va ilukila kocitumãlo cikuavo kuenda ka va kũlĩhiwile la vamanji va sangiwa kocitumãlo caco. Pole cilo, vamue pokati kavo va yongola oku tiuka ku Yehova. Ovo va yongola oku fendela Yehova kumue la vamanji, pole, va sukila ekuatiso lietu.

6. Ndamupi vamanji vosi va pondola oku kuatisa koku sandiliya vana liwekapo oku kunda loku endaenda kolohongele?

⁶ Velie va pondola oku kuatisa oku sandiliya vana va liwekapo oku kunda loku endaenda kolohongele? Vosi yetu—akulu vekongelo, akundi votembo yosi, epata liaye nda okuti Akristão kuenda akundi vosi vo vekongelo. Ove o kuete hẽ ekamba limue, ale umue ukuepa okuti wa liwekapo oku kunda loku endaenda kolohongele? Kupange woku kunda konjo lanjo, ale volokololo, ove hẽ wa sanga umue okuti wa liwekapo oku kunda loku endaenda kolohongele? Citava okuti eye o lekisa onjongole yoku nyũliwa lakulu vekongelo. Nda eye wa lekisa onjongole Yoku eca etendelo liaye liotelefone kakulu vekongelo, ove lieca kokuavo.

7. Nye wa lilongisila kolondaka viukulu umue wekongelo o tukuiwa Thomas?

⁷ Olonjila vipi akulu vekongelo va pondola oku kuama, oco va kuatise vana va yongola oku tiuka ku Yehova? Kũlĩhĩsa eci ca siata oku linga ukulu umue wekongelo o tukuiwa Thomas,b o kasi ko Espanya. Eye wa kuatisa ale ci pitahãla 40 ya vamanji oku tiuka vekongelo. Manji Thomas hati: “Tete ndi pula vamanji valua nda va kũlĩha pocitumãlo pa kasi vamanji vana va liwekapo oku kunda loku endaenda kolohongele. Ale ndi pula kakundi nda va ivaluka manji umue okuti wa liwekapo oku endaenda kolohongele. Vamanji valua vekongelo va tambulula lesanju omo ovo va kũlĩha okuti, va kasi oku panga onepa koku sandiliya. Noke, eci ndi nyula manji umue wa liwekapo oku kunda loku endaenda kolohongele, ndu pula eci catiamẽla komãla vaye kuenda epata liaye. Vamue va siata oku enda lomãla vavo kolohongele kuenda citava okuti omãla vaco va kalele ale akundi. Omãla vaco va pondolavo oku kuatisiwa oku tiuka ku Yehova.”

KUATISA OMÃLA VOSI VA NYELELA OKU TIUKA KU YEHOVA

8. Volusapo luomõla ocisandui ci sangiwa kelivulu lia Luka 15:17-24, ndamupi isia a tata omõlaye wa likekembela?

⁸ Ovituwa vipi tu sukila oku lekisa poku kuatisa vana va yongola oku tiuka ku Yehova? Kũlĩhĩsa eci tu pondola oku lilongisila kolusapo lua Yesu luatiamẽla komõla umue wulume o tunda vonjo. (Tanga Luka 15:17-24.) Yesu o lombolola ndomo omõlaco noke a limbuka okuti wa lekisa uveke kuenje o nõlapo oku tiuka konjo. Isia o lupukila komõlaye loku u pupola kapepe, ci lekisa okuti u sole. Omõla wa livetela evelo omo liovina a linga kuenda o sima okuti ka sesamẽla oku tatiwa ndomõla. Eye o lomboluila isiaye ndomo a liyevite kuenje isia o lekisa ocikembe loku kapako ekalo liomõlaye. Kuenje isia o linga ovina vimue oco omõla a limbuke okuti wa kapiwako; okuti ka tendiwa ndupika, pole, o tendiwa ndukuepata o soliwe. Oco isia a lekise okuti wa sanjukila oku tiuka kuomõla, o tuma oku lingila omõlaye wa likekembela ocipito cimue kuenda u wĩha ocikutu ca velapo.

9. Ovituwa vipi tu sukila oku lekisa oco tu kuatise vana va liwekapo oku kunda loku endaenda kolohongele oku tiuka ku Yehova? (Tanga okakasia losapi hati: “Ndomo tu Kuatisa Omunu una o Yongola Oku Tiuka.”)

⁹ Volusapo olu, Yehova o sokisiwa la isia. Eye o sole vamanjetu va liwekapo oku kunda loku endaenda kolohongele kuenje o yongola okuti va tiuka kokuaye. Poku kuama ongangu ya Yehova tu pondolavo oku va kuatisa oku tiuka. Oco tu ci linge, tu sukila oku lekisa epandi, ocikembe, kuenda ocisola. Momo lie tu sukilila oku lekisa ovituwa viaco kuenda ndamupi tu pondola oku ci linga?

10. Momo lie tu sukilila oku lekisa epandi poku kuatisa omunu umue oku tiuka ku Yehova?

¹⁰ Tu sukila oku lekisa epandi momo cambata otembo oco umue a tiuke ku Yehova. Valua okuti va liwekelepo oku kunda loku endaenda kolohongele va va limbuka okuti va tẽla lika oku tiuka vekongelo, noke liapasu alua akulu vekongelo kuenda vamanji vakuavo va linga kokuavo. Manji umue ukãi o tukuiwa Nancy, o kasi ko Asia, wa soneha hati: “Kamba liange umue vekongelo wa ñuatisa calua! Eye wa ndi tendele ndahuvaye. Eye wa enda oku lombolola ovolandu atiamẽla kotembo tua enda oku kala kumosi. Eye wa enda oku njevelela lepandi osimbu ndi lombolola asakalalo ange kuenda eye ka kuatele ohele yoku nyĩha alungulo. Eye wa lekisa muẽle okuti ekamba liocili, lina lieca ekuatiso kapuluvi osi.”

11. Momo lie tu sukilila oku lekisa ocikembe oco tu kuatise omunu umue wa sumua?

¹¹ Ocikembe ci kasi ndovihemba viwa. Ovio vi pondola oku kuatisa omunu oku yula ovisimĩlo ka via sungulukile. Vamue va siapo ekongelo, va kasi locikumbiti omo kanyamo a pita va popiwa lãvi lamanji umue kuenda ocikumbiti caco ci va tateka oku tiuka ku Yehova. Vamue pamue va sima okuti va tatiwa lonjila yimue ka ya sungulukile. Kuenje ovo va sukila umue o va yevelela okuti wa kapako asakalalo avo. (Tia. 1:19) Manji umue o tukuiwa María, okuti wa liwekelepo oku kunda loku endaenda kolohongele, wa lombolola hati: “Ame nda sukilile una o njevelela ciwa, o ndembeleka kuenda ekamba limue li ñuatisa.”

12. Tukula ocindekaise cimue ci lekisa ndomo Yehova pocakati cocisola caye a vetiya vana va liwekapo oku kunda loku endaenda kolohongele oku tiuka kokuaye.

¹² Embimbiliya li lekisa okuti, ocisola Yehova a kuetele afendeli vaye ci sokisiwa ndukolo. Ndamupi ocisola ca Yehova ci sokisiwa ndukolo? Kũlĩhĩsa ocindekaise eci: Sokolola okuti ove wa kupukila vokalunga ka kasi lakimba alua kuenda o kasi oku vomba. Kuenje umue o ku imbila ocikutu cimue ci ku teyiula oco ku ka vombe. Ocili okuti o sanjukila ekuatiso liaco, momo ci ku kuatisa oku telela kilu liovava okuti ku vombi. Pole, oku kuata lika ocikutu caco, ka ci tẽla oco o popeliwe. Ovava aco a talala calua kuenje oco o teyuile omuenyo wove kuenda ove o kuatisiwa lika nda wa tẽla oku pitĩla toke vombaluku yimue oco o popele omuenyo wove. Ove o sukila okuti umue oku imbila ukolo kuenda oku kunalela vombaluku yaco. Yehova wa sapuila va Isareli vana va tindukile kokuaye, hati: “Nda va koka lovikolo viomunu okuti ovikolo viocisola.” (Hos. 11:4) Cimuamue haico Yehova a kasi oku linga ku vana va liwekapo oku u vumba omo liovitangi vialua kuenda asakalalo. Eye o yongola okuti omanu vaco va limbuka ocisola caye kuenda o yongola okuti va tiuka kokuaye. Yehova o yongolavo okuti omanu ovo va limbuka ocisola caye vokuove.

13. Ulandu wa manji Pablo u lekisa ndati okuti ocisola tu kuetele vamanji ci pondola oku va kuatisa?

¹³ Ci kuete esilivilo oku sapuila ku vana va siapo ekongelo okuti Yehova o va sole, letuvo tu va sole. Manji Pablo, wa tukuiwa vocipama ca pita wa liwekelepo oku endaenda kolohongele ci pitahãla 30 kanyamo. Eye wa popia hati: “Eteke limue komẽle, eci nda kala oku tunda konjo, nda sanga manji umue ukãi wa kuka haye uwa calua. Eye wa sapela lame locisola kuenje nda fetika oku lila ndomõla. Ame ndo sapuila siti, soketi Yehova eye wa ku tuma oku sapela lame. Vepuluvi liaco, nda nõlapo oku tiuka ku Yehova.”

KUATISA LOCISOLA VANA VA HONGUA

14. Ndomo ca tangiwa kelivulu lia Luka 15:4, 5, nye ungombo a linga noke lioku sanga omeme ya nyelile?

¹⁴ Vana va liwekapo oku kunda loku endaenda kolohongele, va sukila ekuatiso lietu otembo yosi. Ndeci omola ocisandui volusapo lua Yesu, citava okuti ovo va yevite esumuo lialua. Ovo pamue va hongua konepa yespiritu omo liovitangi va liyaka lavio voluali lua Satana. Omo liaco, tu sukila oku va kuatisa oku pamisa ekolelo liavo ku Yehova. Volusapo luomeme ya nyelile, Yesu o lombolola okuti ungombo o kapa omeme kapepe aye kuenda o yambata loku yi tiula vocunda. Ungombo wa pesela otembo yaye kuenda ongusu, oco a sandiliye omeme ya nyelile. Pole eye wa kũlĩha okuti omeme ka yi kuete ongusu yoku tiukila oyo muẽle vocunda kuenje eye wa sukilile oku yambata loku yi tiula vocunda.—Tanga Luka 15:4, 5.

15. Tu kuatisa ndati vana va yongola oku tiuka ku Yehova? (Tala okakasia losapi hati: “Ocimalẽho Cimue ci Kuete Esilivilo.”)

¹⁵ Pamue tu sukilavo oku pesela otembo kuenda ongusu oco tu kuatise vana va liwekapo oku kunda loku endaenda kolohongele, oco va tẽle oku yula ovitangi viavo. Pole, lekuatiso liespiritu lia Yehova, Liondaka yaye kuenda lialivulu akuavo, tu pondola oku va kuatisa oku pama vali kespiritu. (Va Rom. 15:1) Tu pondola oku ci linga ndati? Ukulu umue wekongelo wa popia hati: “Vamanji valua eci va nõlapo oku tiuka ku Yehova, va sukila okuti umue o linga lavo elilongiso Liembimbiliya.”c Omo liaco, nda akulu vekongelo va ku pinga oco o songole elilongiso Liembimbiliya komunu umue wa liwekapo oku kunda loku endaenda kolohongele, momo lie ku tambuila ocikele caco? Ukulu wekongelo wamisako hati: “Ohundi yi songola elilongiso liaco, o sukila oku kala ekamba liwa, okuti poku sapela laye, omunu waco o lianja kuenda u kolela.”

KILU VA YOLELA KUENDA PALO POSI VA YOLELAVO

16. Tua kũlĩha ndati okuti tu kuete ekuatiso liovangelo?

¹⁶ Ka tu kasi oku linga upange woku sandiliya vana va siapo ekongelo likawetukundi. Tu kuete ekuatiso liovangelo. (Esit. 14:6) Kuli ovolandu alua a lekisa asunga aco. Ndeci, Silvio o kasi kofeka yo Ekuador, wa likutilila lutima wosi oku pinga ekuatiso oco a tiuke vekongelo. Osimbu a kala oku likutilila, va totola kepito liaye. Akulu vavali vekongelo ovo va totola. Ovo va kuata esanju lialua poku eca ekuatiso Silvio a sukilile.

17. Tu liyeva ndati eci tu kuatisa vana va hongua kespiritu?

¹⁷ Oku kuatisa vana va hongua kespiritu oku tiuka ku Yehova, ci tu nenela esanju lialua. Kũlĩhĩsa eci ca popia Salvador, ukundi umue wotembo yosi, okuti wa siata oku likolisilako calua oku kuatisa vana va siapo vekongelo. Eye hati: “Olonjanja vimue ndi yeva esanju lialua okuti ci ñokela oku lila. Esumũlũho limue linene oku kũlĩha okuti Yehova wa kuatisa yimue pokati kolomeme viaye oku tunda voluali lua Satana kuenje nda kuatavo esumũlũho lioku talavaya la Suku kocikele coku sandiliya olomeme viaye.”—Ovil. 20:35.

18. Nda ove wa liwekapo oku kunda loku endaenda kolohongele, ekolelo lipi o pondola oku kuata?

¹⁸ Ndaño okuti ove wa liwekapo oku liongolola lafendeli va Suku, kolela okuti Yehova handi o ku sole. Eye o yongola okuti o tiuka kokuaye. Pole, ove o sukila oku eca ananga amue oco o tiuke kokuaye. Ndeci ca linga isia volusapo lua Yesu, Yehova oku kuetele ongeva kuenje eye o yongola okuti ove o tiuka kokuaye.