Ceci Olohutililo vi Pondola Oku ku Lingila

Pamela wa kuatele uvei wo kanser kuenda wa sanda ekuatiso liolondotolo. Kuenje eye wa likutilila ku Suku oco a kuate ongusu yoku pandikisa. Anga hẽ ohutililo yo kuatisa?

Pamela wa lombolola hati: “Eci nda kala oku nyua ovihemba viuveyi wo kanser, nda kuata usumba. Pole, eci nda likutilila ku Yehova Suku, nda tula utima kuenda nda fetika oku sokolola ciwa. Ndaño nda kala oku yeva evalo lialua, pole, ohutililo ya ñuatisa oku kuata ovisimĩlo via sunguluka. Eci omanu va ndi pula ndomo ndi liyevite, nda popia hati, ‘Si liyevite ciwa, pole, ñuete esanju!’”

Ka tu sukila lika oku likutilila nda tu kasi oku liyaka luvei wa kãla, ale ceci tu liyaka locitangi cinene. Vosi yetu tua siata oku liyaka lovitangi vinene levi vitito kuenje, olonjanja vimue tu liyeva okuti tu sukila ekuatiso oco tu tẽle oku liyaka lavio. Anga hẽ ohutililo yi pondola oku kuatisa?

Embimbiliya li popia hati: “Tuika Yehova ocitele cove kuenje eye o ku kuatisa. Lalimue eteke o tava okuti ukuesunga o sengiwa.” (Osamo 55:22) Ocisimĩlo eci ca sunguluka! Ohutililo yi pondola oku ku kuatisa ndati? Eci o likutilila ku Suku lonjila ya sunguluka, eye o ku ĩha ovina ove o sukila oco o pandikise kovitangi.—Tala okakasia hati, “Ceci Olohutililo vi Pondola Oku ku Lingila.”

Ceci Olohutililo vi Pondola Oku ku Lingila

Ombembua yovutima

“Apingilo ene a kũlĩhĩwe la Suku; kuenje ombembua ya Suku yina ya piãla olondunge viosi, yi lava ovitima viene kuenda ovisimĩlo viene vu Kristu Yesu.” (Va Filipoi 4:6, 7) Eci o lombolola ovitangi viove ku Suku, eye o ka ku kuatisa oku tula utima kuenda oku lekisa olondunge eci o liyaka lovitangi.

Olondunge vi tunda ku Suku

“Nda umue pokati kene wa kamba olondunge, amameko oku pinga ku Suku, momo eye eca ku vosi lutima wosi halokupisako kuenje ci eciwa kokuaye.” (Tiago 1:5) Eci o kuete asakalalo, olonjanja vimue ku nõla onjila ya sunguluka. Pole, nda wa likutilila oku pinga olondunge, Suku o ka ku ivaluisa olonumbi vialua vi kuatisa, vi sangiwa Vondaka yaye Embimbiliya.

Ongusu kuenda elembeleko

“Kovina viosi ñuete ongusu mekonda lia una o nyĩha unene.” (Va Filipoi 4:13) Omo okuti Yehova Suku ukuonene wosi, o pondola oku ku ĩha ongusu o sukila oco o tẽle oku liyaka lovitangi, ale oku ku tata vokuenda kuohali yove. (Isaya 40:29) Embimbiliya li popiavo okuti, Yehova eye ‘Suku yelembeleko liosi.’ Eye o pondola oku tu lembeleka “kohali yetu yosi.”—2 Va Korindo 1:3, 4.