Kuli hẽ Usongui Umue wa Koleliwa Oco a tu Kuatise Oku Kuata Ekalo Lia Kolapo Kovaso Yoloneke?

Ovipama viatete, via lombolola okuti, omanu va siata oku seteka oku sanda ekalo liwa lio kovaso yoloneke poku kolela kovina ndeci, kosande, kelilongiso lia velapo, kovokuasi kuenda oku kala omunu uwa. Oku nõlapo oku kuama ovina viaco, ci sokisiwa loku kuama omapa yimue ka yi kuete alomboluilo a suapo. Eci hẽ ci lomboloka okuti ka kuli usongui umue wa koleliwa o tu kuatisa oku kuata ekalo lia kolapo kovaso yoloneke? Sio, haicoko!

OLONUMBI VI TUNDA KONO YIMUE YA VELAPO

Poku nõla olonjila vimue, olonjanja vialua tu kũlĩhĩsa omunu umue okuti, ukulu wetu kuenda o kuete olondunge vialua, etu ci sule. Cimuamue haico, tu pondola oku sanga alomboluilo a koleliwa atiamẽla kekalo lietu lio kovaso yoloneke Kono yimue okuti, omunu waco ukulu wetu kuenda o kuete olondunge vialua, etu ci sule. Tu pondola oku tanga alungulo aye velivulu limue lia fetikiwa oku sonehiwa ci soka 3.500 kanyamo a pita. Elivulu liaco liovisonehua vi kola, li tukuiwa okuti Embimbiliya.

Momo lie o sukilila oku kolela Kembimbiliya? Momo Usovoli walio, Omunu umue ukulu calua, haeye o kuete olondunge via velapo voluali luosi. Eye o tukuiwa okuti, “Ukuasimbu” haeye o kasiko “tunde otembo ka yi pui toke otembo ka yi pui.” (Daniele 7:9; Olosamo 90:2) Eye “Ululiki wovailu, Suku yocili, Una wa panga ongongo.” (Isaya 45:18) Eye o tu sapuila okuti, onduko yaye Yehova.—Olosamo 83:18.

Omo okuti Embimbiliya lia tunda Kululiki womanu vosi, olio ka li velisapo ocikoti cimue, ale omanu vakuekova limue okuti vakuavo va sule. Alungulo a sangiwamo, otembo yosi a kuete esilivilo kuenda a kuatisa omanu vo kolofeka viosi. Olio lia sandekiwa kalimi alua kuenda olio elivulu lia eciwa vali komanu okuti, alivulu akuavo ci sule.a Eci ci lomboloka okuti, omanu va sangiwa kolonepa viosi, va pondola oku kuata elomboloko lialio loku songuiwa lalio. Eci ci likuata leci Embimbiliya li popia okuti:

“Suku hokuacameko, pole, kolofeka viosi omunu una u sumbila loku linga ovina via sunguluka, o taviwa laye.” —OVILINGA 10:34, 35.

Ndeci olonjali vi sole kuenda vi kuatisa omãla vavo, Yehova Suku Isia ukuacisola, o tu kuatisa pocakati Condaka yaye Embimbiliya. (2 Timoteo 3:16) Ove o pondola oku kolela Kondaka yaye; momo eye wa tu lulika kuenda wa kũlĩha eci ci tu sanjuisa.

OLONUMBI VIA KOLELIWA

Tu pondola oku kolela kueci Embimbiliya li popia catiamẽla kekalo lio kovaso yoloneke, momo ovolandu a siata oku pita kuenda ovituwa omanu va lekisa koloneke vilo, tunde eci via popiwa Vembimbiliya, pa pita ale ci soka 2.000 kanyamo.

OVOLANDU

“Ofeka yi ka katukila ofeka kuenda usoma u ka katukila usoma. Ku ka kala ovilemawe kuenda kocitumãlo locitumãlo onjala, lafengi.” —LUKA 21:10, 11.

OVITUWA

“Koloneke via sulako, ekalo li ka tĩla calua halio li koka ohele. Momo omanu va ka linga vakuakulisola ovo muẽle, vakuakusola olombongo, vakuakulipanda, vakuakulivelisapo, vakuakupopia atonãi, vakuakusinĩla olonjali, vakualutukãi, havakuaciliko, ka va ka kuata ocisola la vangandiavo, vakuamanya, vakualundi, ka va ka tẽla oku likandangiya, olongangala, ka va ka sola eci ciwa, olomakuli, vakualonamãlãla, vakuepela, vakuakusola ayele okuti Suku ci sule.”—2 TIMOTEO 3:1-4.

Ocisimĩlo cipi o kuata poku mola ovina via tukuiwa Vembimbiliya okuti cilo vi kasi oku tẽlisiwa lonjila ya suapo? Ocili okuti, o pondola oku tava kueci Leung, wo kofeka yo Hong Kong a popia hati: “Ovitumasuku Viembimbiliya via sonehiwa osimbu. Ka kuli omunu laumue o tẽla oku popia ovina ka via lingiwile handi okuti, noke vi tẽlisiwa lonjila ya suapo. Embimbiliya lia tunda komunu umue wa velapo calua okuti, etu tu sule.”

Vembimbiliya tu sangamo ovitumasuku vialua via tẽlisiwa ale.b Eci ceca uvangi wokuti, Embimbiliya Ondaka ya Suku. Yehova wa popia hati: “Ame ndi Suku kuenda ka kuli wa lisoka lame. Tunde kefetikilo ame ndi sapula ovina vi keya.” (Isaya 46:9, 10) Eli esunga limue liwa li ku vetiya oku kolela kueci Embimbiliya li popia catiamẽla kekalo lio kovaso yoloneke.

OLONUMBI VI KU KUATISA CILO KUENDA OTEMBO KA YI PUI

Nda o kuama olonumbi vi sangiwa Vovisonehua vi Kola, o ka kuatisiwa. Kũlĩhĩsa ovolandu amue.

ALUNGULO AWA ATIAMẼLA KOLOMBONGO KUENDA KUPANGE

“Epupu limosi liepuyuko lia velapo okuti, apupu avali wupange walua a sule kuenda oku lupukila konyima yofela.”—UKUNDI 4:6.

OMUENYO WEPATA

“Omunu lomunu pokati kene, a sole ukãi waye ndeci a li sole eye muẽle; handi vali, ukãi o sukila oku lekisa esumbilo liocili kulume waye.”—VA EFESO 5:33.

NDOMO TU LITATA POKATI

“Imbapo onyeño kuenda siapo oku tema; ku ka lisakalaise, liwekapo oku linga eci cĩvi.”—OLOSAMO 37:8.

Nda o kapako eci Embimbiliya li popia, o pondola oku kuata ekalo liwa cilo kuenda ekalo lia kolapo kovaso yoloneke. Vembimbiliya tu sangamo olohuminyo vi komõhisa via Suku viatiamẽla kekalo lio kovaso yoloneke, muna mua kongela

OMBEMBUA KUENDA OKU KOLAPO

“Va ka sanjukila ombembua yalua.”—OLOSAMO 37:11.

OLONJO KUENDA OKULIA KOMANU VOSI

“Ovo va ka tunga olonjo kuenda va ka kalamo, kuenda va ka kũla oviumbo viayuva kuenje va ka lia apako alio.”—ISAYA 65:21.

KA KU KA KALA VALI OKU VELA ALE OKU FA

“Oku fa ka ku ka kalako vali, ndaño oku lila loku liyula levalo ka vi ka kalako vali.”—ESITULUILO 21:4.

Nye o sukila oku linga oco o kuate ekalo liaco lia kolapo kovaso yoloneke? Lilongisa ocipama ci kuãimo.

a Oco o kũlĩhe alomboluilo akuavo atiamẽla koku pongolola loku eciwa Kuembimbiliya, iñila vo www.jw.org vemẽhi liokasapi ALONGISO EMBIMBILIYA > ULANDU & EMBIMBILIYA.

b Oco o kũlĩhe alomboluilo akuavo, tala ocipama 9 celivulu A Bíblia—Palavra de Deus ou de Homem? lia sandekiwa Lolombangi Via Yehova. Li sangiwa vonumbi yetu yo internet www.jw.org. Tala vemẽhi liokasapi OCISELEKO CALIVULU> ALIVULU & OLOMBROCHURA.