Etu tu Vumba Suku “Ukuahenda ya Piãla”

1. Ovisimĩlo vipi tu kuata eci tu sokolola komunu umue ukuahenda?

ECI tu sokolola komunu umue ukuahenda, tu tiamisila ovisimĩlo vietu komunu umue wa sunguluka, womboka, ukuacikembe kuenda ukuacali. Pamue tu sokolola kolusapo lua Yesu luatiamẽla kulume u Samaria. Ulume waco wokofeka yikuavo “wa lekisa ohenda” ku Yudea una wa tipuiwa loku nyaniwa lovingumba. Ulume u Samaria “wo kuatela ohenda” kuenda locisola wo tata. (Luka 10:29-37) Olusapo olu lu lekisa ocituwa cimue ci komõhisa ca Suku yetu, okuti ohenda. Ocituwa eci ci lekisa onepa yimue yocisola ca Suku kuenda eye o ci lekisa eteke leteke konjila ndomo a tu tata.

2. Yipi onjila yikuavo yoku lekisa ohenda?

² Kuli onjila yikuavo omunu a sukila oku lekisa ohenda. Omunu ukuahenda, pamue o nõlapo okuti ka yambula omunu una wa sesamẽlele eyambulo. Konepa eyi, Yehova wa siata oku lekisa ohenda yaco kokuetu. “Eye ka tu tati ndomo ci likuata lakandu etu,” ndeci ukualosamo a ci popia. (Osa. 103:10) Olonjanja vimue, Yehova eca elungulo lia suapo komunu una wa lueya.

3. Apulilo api tu konomuisa?

³ Vocipama cilo, tu konomuisa apulilo atatu ndeci: Momo lie Yehova a lekisila ohenda? Anga hẽ pali elitokeko koku eca elungulo lia suapo kuenda ohenda? Nye ci tu kuatisa oku lekisa ohenda? Tu tali ndomo Ondaka ya Suku yi tambulula apulilo a-a.

ESUNGA LIECI YEHOVA A LEKISILA OHENDA

4. Momo lie Yehova a lekisila ohenda?

⁴ Yehova o sanjukila oku lekisa ohenda. Upostolo Paulu wa vetiyiwa oku soneha okuti, Suku “ukuahenda ya piãla.” Olondaka evi, Paulu wa kala oku tukula ohenda ya Suku yoku eca elavoko liomuenyo kilu kolombuavekua ka via lipuile. (Va Efe. 2:4-7) Pole, Yehova ka lekisa lika ohenda kafendeli vaye olombuavekua. Ukualosamo Daviti wa soneha hati: “Yehova uwa ku vosi, kuenda ohenda yaye yi limbukiwa kovopange aye osi.” (Osa. 145:9) Omo liocisola Yehova a kuetele omanu, otembo yosi o lekisa ohenda eci ku molẽha esunga liaco lioku ci linga.

5. Ndamupi Yesu a lilongisa catiamẽla kohenda ya Yehova?

⁵ Yesu wa kũlĩhĩle ciwa ocisola ca Yehova coku lekisa ohenda, okuti omunu ukuavo ci sule. Yehova la Yesu va kala kumosi kilu vokuenda kuanyamo alua osimbu Yesu keyile palo posi. (Olosap. 8:30, 31) Olonjanja vialua, Yesu wa mola ndomo Isiaye a lekisa ohenda komanu vakuakandu. (Osa. 78:37-42) Yesu valongiso aye, wa enda oku tukula ocituwa eci ca fina ca Isiaye.

6. Yesu o tu kuatisa ndati oku kuata elomboloko liohenda ya Isiaye?

⁶ Vocipama ca pita, Yesu wa tukula olusapo luatiamẽla komõla ocisandui oco a tu kuatise oku kuata elomboloko ndomo Yehova a sanjukila oku lekisa ohenda. Omõla wa silepo onjo kuenda ‘wa ka sandowaile ovina viaye viosi loku ambata omuenyo umue ka wa sungulukile.’ (Luka 15:13) Noke eye wa likekembela komuenyo waye wa vĩha, wa liketisa kuenda wa tiukila konjo. Isiaye wa liyeva ndati? Umalẽhe wa limbuka lonjanga ndomo Isia a liyeva. Yesu hati: “Osimbu [omõla] a kala ocipãla, isiaye wo mola, wo kuatela ohenda kuenje wa lupukila kokuaye, wo pupola kapepe loku u sipula locisola.” Isia ka lingile eci ci kutisa osõi komõla. Pole, eye wa lekisa ohenda komõla loku wecela kuenda wo yolela omo lioku tiuka pokati kepata. Omõla ocisandui wa lingile ekandu linene, pole, omo lioku likekembela kuaye, isiaye wo wecela. Isia ukuahenda volusapo, o lomboloka Yehova. Lolondaka evi, Yesu wa lekisa onjongole ya Isiaye yoku ecela vakuakandu va likekembela lutima wosi.—Luka 15:17-24.

7. Onjila ndomo Yehova a lekisa ohenda yi situlula ndati okuti wa velapo kolondunge?

⁷ Yehova o lekisa ohenda omo liolondunge viaye ka vi sokisiwa. Olondunge via Yehova hacituwa cimueko ci tepuluka. Embimbiliya li popia hati: “Olondunge vi tunda kilu, vieyuka ohenda kuenda apako awa.” (Tia. 3:17) Ndeci isia umue ukuacisola, Yehova wa kũlĩha okuti ohenda yaye yi kuatisa afendeli vaye. (Osa. 103:13; Isa. 49:15) Ohenda ya Yehova yeca kafendeli vaye elavoko liokovaso yoloneke, ndaño ka va lipuile. Kuenje omo okuti Yehova olondunge viaye via piãla, eye olonjanja viosi o lekisa ohenda eci ci sukiliwa oku ci linga. Pole, Yehova wa kũlĩhavo epuluvi ka sukila oku lekisa ohenda. Omo okuti eye wa velapo kolondunge, lalimue eteke a lekisa ohenda poku ecelela evĩho.

8. Olonjanja vimue nye ci sukiliwa oku lingiwa kuenda momo lie?

⁸ Sokolola okuti ufendeli umue wa Suku locipango, o nõlapo oku ambata omuenyo umue ka wa sungulukile. Nye tu sukila oku linga? Oku ‘liwekapo oku kuata ukamba’ lomunu waco, ndomo upostolo Paulu a ci soneha. (1 Va Kor. 5:11) Vana va linga ekandu liocipango va tundisiwa vekongelo. Oku ci linga, ci teyuila vamanji kuenda ci situlula olonjila vi kola via Yehova. Pole, vamue va sima okuti eci umue a tundisiwa vekongelo Suku ka lekisile ohenda kokuaye. Anga hẽ eci ocili? Tu ci konomuisi.

ANGA HẼ UMUE OKU TUNDISIWA VEKONGELO CI LEKISA OHENDA?

9-10. Ndomo ca tangiwa ku Va Heveru 12:5, 6, momo lie tu popela okuti oku tundisiwa ci lekisa ohenda? Ci lombolola.

⁹ Eci tu yeva esapulo kohongele liokuti umue tua kũlĩha kuenda tu sole calua cilo “Hambangiko vali ya Yehova,” etu tu sumua calua. Pamue tu lipula nda omunu waco wa sukilile muẽle oku tundisiwa. Anga hẽ oku tundisiwa ci lomboloka oku lekisa ohenda? Oco. Nda umue o sukila epindiso, pole, ku ci lingi, ka ci lekisa olondunge, ohenda, ale ocisola. (Olosap. 13:24) Eci hẽ ci kuatisa omunu wa tundisiwa oku likekembela loku linga apongoloko kovituwa viaye? Ci kuatisa. Valua va kupukila vekandu linene, va limbuka okuti oku tundisiwa vekongelo ca va kuatisa oku limbuka okuti, eci va linga ka ca sungulukile kuenda ca va kuatisa oku likekembela, oku linga apongoloko loku tiuka ku Yehova.—Tanga Va Heveru 12:5, 6.

¹⁰ Kũlĩhĩsa ocindekaise eci. Ungombo umue o limbuka okuti yimue pokati kolomeme viaye yi vela. Eye wa kũlĩha okuti oco a tate omeme yaco, oyo yi sukila oku tepiwa pokati kolomeme vikuavo. Olomeme ovinyama vimue, vi sole oku kala pamosi. Kuenje ovio vi pondola oku sakalala calua eci va vi tepa. Eci hẽ ci lomboloka okuti ungombo ka kuete ohenda eci eye a nõlapo oku tepa omeme yaco oco yi likalile? Sio, hacoko. Momo eye wa kũlĩha okuti nda wa ecelela omeme yaco oku litenga lolomeme vikuavo, o va sambuisako uvei waye. Poku tepa omeme yi vela, eye o teyuila ocunda cosi colomeme.—Sokisa Lovisila 13:3, 4.

11. (a) Kolonepa vipi omunu una wa tundisiwa a sokisiwa lomeme yi vela? (b) Omunu wa tundisiwa nye a sukila oku linga kuenda ekuatiso lipi a pondola oku tambula?

¹¹ Eci Ukristão umue a tundisiwa vekongelo, tu pondola oku u sokisa lomeme yimue yi vela. Eye o vela konepa yespiritu. (Tiago 5:14) Ndeci omunu umue o vela uvei waye u pondola oku sambukila vakuavo, una o vela konepa yespiritu o pondola oku yapuisa vakuavo koku linga eci cĩvi. Eci ci lomboloka okuti olonjanja vimue, ci sukila oku tundisa vekongelo omunu umue wa linga ekandu. Elinga liaco li lekisa ocisola Yehova a kuetele afendeli vakuekolelo kuenda ci pondola oku kuatisa omunu wa lueya oku limbuka ekandu liaye loku likekembela. Ndaño okuti umue wa tundisiwa vekongelo, eye o sukila oku endaenda kolohongele muna eye a pondola oku sanga alongiso Embimbiliya kuenda oku pamisa vali ekolelo liaye. Eye o kuetevo elianjo lioku tambula alivulu etu oco a ka a tange loku lilongisa kuenda oku tala ovipama vio JW Broadcasting^®. Eci akulu vekongelo va limbuka okuti o kasi oku linga apongoloko olonjanja vimue va sapela laye oco vo kuatise oku tumbulula vali ukamba waye la Yehova, okuti o kala vali Ombangi ya Yehova.b

12. Locisola kuenda ohenda nye akulu vekongelo va pondola oku linga lomunu wa linga ekandu okuti ka likekembela?

¹² Ci kuete esilivilo oku ivaluka okuti vana va linga ekandu okuti ka va likekembela ovo lika va tundisiwa vekongelo. Akulu vekongelo va kũlĩha okuti va sukila oku sokolola lutate osimbu ka va nõlelepo oku tundisa umue vekongelo. Ovo va kũlĩha okuti Yehova o pindisa “vonjongo ya suapo.” (Yer. 30:11) Ovo va sole vamanji kuenda ka va yongola oku linga cimue ci kapa kohele ukamba wavo la Yehova. Olonjanja vimue locisola kuenda ohenda va nõlapo oku tundisa vekongelo una wa lueya vokuenda kuotembo yimue.

13. Momo lie Akristão ko Korindo va sukilile oku tundisiwa?

¹³ Kũlĩhĩsa eci upostolo Paulu a linga kocita catete la vana va linga ekandu okuti ka va likekembelele. Ukristão umue ko Korindo wa enda oku lipekela lukãi wa isiaye. Elinga liaco lĩvi calua! Paulu wa kũlĩhĩle eci Yehova a sapuilile ku va Isareli hati: “Ulume wosi o lipekela lukãi wa isiaye, o kutisa osõi isiaye. Kavali kavo va pondiwe muẽle.” (Ovis. 20:11) Ocili okuti, Paulu ka handelekele okuti ulume waco wa sukilile oku pondiwa. Pole, eye wa sapuila va Korindo oco va tundise ulume waco. Elinga liaco lĩvi ulume a kala oku linga, lia kala oku yapuisa vamue vekongelo, vamue pokati kavo ka va tendele elinga liaco ndekandu limue linene!—1 Va Kor. 5:1, 2, 13.

14. Paulu wa lekisa ndati ohenda kulume wa tundisiwile ko Korindo kuenda momo lie? (2 Va Korindo 2:5-8, 11)

¹⁴ Noke liotembo yimue, Paulu wa yeva okuti ulume wa linga apongoloko anene. Ulume wa lingile ekandu wa likekembela lutima wosi! Ndaño okuti ulume wa linga eci ci koka osõi vekongelo, Paulu wa sapuila akulu vekongelo okuti ka yonguile “oku vangula calua.” Paulu wa va sapuila hati: “Te wo weceli locisola loku u lembeleka.” Kũlĩhĩsa esunga lieci Paulu a ci popela, eye hati: “Oco eye ka ka yuliwe lesumuo lialua.” Paulu wa kuatela ohenda ulume wa likekembela. Eye ka yonguile oku mola ulume oku yuliwa lesumuo omo lielinga lĩvi a lingile okuti wa nõlelepo oku likekembela.—Tanga 2 Va Korindo 2:5-8, 11.

15. Olonjanja vimue akulu vekongelo va lekisa ndati utõi kuenda ohenda?

¹⁵ Ndeci Yehova, akulu vekongelo va sole oku lekisa ohenda. Ovo va lekisa utõi poku lungula omunu wa lueya eci ci sukiliwa pole, va lekisa ohenda nda kuli esunga liaco. Nda akulu vekongelo ka va lungula omunu wa linga ekandu ovo ka va kasi oku lekisa ohenda, pole, va kasi oku lekisa ocekelela. Anga hẽ akulu vekongelo lika va sukila oku lekisa ohenda?

NYE CI KUATISA VOSI YETU OKU LEKISA OHENDA?

16. Ndomo ca tangiwa Kolosapo 21:13, nye Yehova a ka linga la vana ka va lekisa ohenda?

¹⁶ Akristão vosi va likolisilako oku setukula ohenda ya Yehova. Momo lie? Esunga liaco lieli okuti Yehova ka yevelela vana ka va lekisa ohenda ku vakuavo. (Tanga Olosapo 21:13.) Vosi yetu tu yongola okuti Yehova o yevelela olohutililo vietu, omo liaco tu yuvuli ocituwa coku likala oku lekisa ohenda. Etu ka tu yuvula oku yevelela vamanjetu va kasi oku tala ohali, pole, olonjanja viosi tu yevelela “koku liyula kuohukũi.” Cimuamue haico okuti, tua siata oku likolisilako oku kapako onumbi yokuti: “Una ka lekisa ohenda, ka ka sombisiwa lohenda.” (Tia. 2:13) Nda lumbombe tua ivaluka okuti tu sukilavo ohenda, ci ka leluka kokuetu oku lekisa ohenda. Etu tu yongola oku lekisa ohenda eci umue wa lueya a likekembela loku tiuka vekongelo.

17. Ndamupi Soma Daviti a lekisa ohenda yocili?

¹⁷ Ovolandu Embimbiliya a tu kuatisa oku lekisa ohenda kuenda oku amamako oku lekisa ocituwa caco. Ndeci, sokolola Soma Daviti. Eye wa kala omunu umue wa lekisile ohenda. Ndaño okuti Saulu wa yonguile oku u ponda, Daviti wa lekisa ohenda yalua kosoma ya nõliwile la Suku kuenda lalimue eteke o fetuluinyile.—1 Sam. 24:9-12, 18, 19.

18-19. Volonepa vipi vivali Daviti ka lekisile ohenda?

¹⁸ Halonjanja viosiko Daviti a lekisa ohenda. Ndeci, eci Nabala a lekisa uveke okuti ka lekisile esumbilo kuenda wa likala oku eca okulia ku Daviti kuenda kalume vaye, Daviti lonyeño yalua wa nõlelepo oku ka ponda ulume waco kumue lalume vosi vo konjo yaye. Pole, ukãi wa Nabala Avigaile, wa kala ukuahenda kuenda ukuepandi kuenje eye lonjanga yalua wa eca okulia ku Daviti, noke Daviti ka pondele vali Nabala lalume vaye.—1 Sam. 25:9-22, 32-35.

¹⁹ Vepuluvi likuavo, ceci uprofeta Natana a sapuila Daviti catiamẽla kulume umue ohuasi, wa tambula okameme kulume osuke okuti wa ka solele calua. Lonyeño yalua Daviti wa popia hati: “Ndeci Yehova a kasi lomuenyo, ulume waco wa ci linga o sesamẽla oku fa!” (2 Sam. 12:1-6) Daviti wa kũlĩhĩle Ocihandeleko ca eciwile ku Mose. Una o nyana omeme yimue wa sukilile oku tiuwiya olomeme vikuãla kumuẽle yaco. (Etu. 22:1) Pole, eyambulo liokufa? Ka ca lekisile ohenda poku popia okuti wa sukilile oku fa. Natana wa tukula olusapo olu oco a kuatise Daviti oku kuata elomboloko liekandu eye a lingile! Yehova wa lekisile ohenda yalua ku Daviti, okuti Daviti wa sukililevo oku lekisa ohenda yaco kulume wa tambula okameme volusapo Natana a tukula!—2 Sam. 12:7-13.

20. Nye tu lilongisila kulandu wa Daviti?

²⁰ Limbuka okuti Daviti eci a kala lonyeño yalua, eye wa nõlelepo oku ponda Nabala kuenda alume vosi vo konjo yaye. Kuenje noke Daviti wa popia okuti ulume ohuasi wa tukuiwa volusapo lua Natana wa sesamẽlele oku fa omo lieci a linga. Pole, Daviti wa kala ulume umue ukuahenda, momo lie a pisila ulume wa tambula okameme lungangala? Sokolola eci ca pita komuenyo wa Daviti. Vepuluvi liaco, Daviti wa kala oku sokolola kocina cĩvi a lingile. Ocituwa cekambo liohenda kuenda coku pisa ka ci lekisa ekalo liwa konepa yespiritu. Nda umue o pisa ukuavo ci lekisa okuti, ukamba a kuetele Yehova ka wa pamele. Yesu lutõi walua wa lungula olondonge viaye hati: “Liwekipo oku pisa, oco ka vu ka pisiwi; momo oku pisa vu pisa lakuo, hakuo va ko pisili lakuo.” (Mat. 7:1, 2) Tu sukila oku likolisilako oku yuvula oku pisa kuenje tu setukula Suku yetu “ukuahenda ya piãla.”

21-22. Kolonjila vipi tu sukila oku lekisa ohenda?

²¹ Voku kala ukuahenda mua kongela ovina vialua. Omanu vakuahenda va linga ovina vi kuatisa vakuavo. Vosi yetu tua ñualiwa lomanu va sukila ekuatiso, ndeci vepata, vekongelo kuenda posongo tu kasi. Tu kuete apuluvi alua oku lekisa ohenda! Nye tu linga nda umue o sukila elembeleko? Tu wĩha hẽ ekuatiso a sukila ndeci okulia ale oku lingila ovina vikuavo? O sukila hẽ ekamba limue liwa liu pamisa? O pondola hẽ oku sapuilako omanu vakuavo esapulo liolondaka viwa? Evi vimue pokati kolonjila via velapo vioku lekisa ohenda komanu vosi tu sanga.—Yovi 29:12, 13; Va Rom. 10:14, 15; Tia. 1:27.

²² Nda tua luluvala lutate kasukila aco, tu limbuka okuti tu kuete apuluvi alua oku lekisa ohenda. Eci tu lekisa ohenda tu sanjuisa Isietu wokilu okuti eye Suku “ukuahenda ya piãla”!