Nye ci Koka Oku Amamako Kuesuvu?

Momo lie voluali lulo esuvu li kasilili ndu okuti ka li kuete esulilo? Oco tu limbuke etambululo liaco, tu sukila oku kũlĩha eci ci lomboloka esuvu, esunga lieci omanu va fetikila oku kuata esuvu kuenda ndomo li li sandula.

Nye ci Lomboloka Esuvu?

Esuvu ocisimĩlo cungangala omunu umue a kuetele ukuavo, ale ocimunga cimue comanu. Hacisimĩlo cimueko lika ci kala otembo yimue, olio ka li piti.

MOMO LIE OMANU VA FETIKILA OKU KUATA ESUVU?

Omanu va fetika oku kuata esuvu omo liasunga alua. Olonjanja vialua, ka va suvukiwa omo liovina va linga, pole, omo lioku tiamẽla kocimunga cimue comanu. Va tendiwa ndolondingaĩvi, va koka ohele kuenda ndomanu ka va pondola oku pongoloka. Va tendiwavo ndomanu va sule, haivo olono viovitangi vialua. Vana va suvuka ocimunga cimue comanu, citava okuti va kuete ovisimĩlo viaco omo okuti, pamue va tatiwa lungangala, lekambo liesunga, ale ocitangi cikuavo, ca va kokela oku kuata ovisimĩlo viaco vokati kavo.

NDOMO ESUVU LI LI SANDULA

Omunu umue o pondola oku suvuka omunu ukuavo ndaño okuti, ko kũlĩhĩle. Ndeci, vamue va pondola oku kuata ovisimĩlo vĩvi viatiamẽla kocimunga cikuavo omo okuti, epata kuenda akamba vavo va kuete ovisimĩlo viaco. Lonjila eyi, esuvu li li sandula, kuenje umue o vetiya ukuavo.

Tu pondola oku limbuka okuti, ci leluka esuvu oku li sandula lonjanga kuenda eli olio esunga lieci omanu valua va kuetele ovisimĩlo viaco. Pole, oco tu kuate elomboloko liwa lieci esuvu li kasilili oku amamako, tu sukila oku kũlĩha oku lia fetikila. Tu pondola oku sanga alomboluilo aco Vembimbiliya.

KOKU ESUVU LIA FETIKILA

Ociluvialuvia ci lekisa ovisongo vivali vi ñuala ñuala kolonele via liyekala vi situlula ovina via siata oku koka esuvu. 1. Alomboluilo esanda a tunda, kakamba kuenda kapata, komanu vo internet kuenda kasapulo. 2. Ekambo lioku kũlĩha catiamẽla, kutuwa, kekova kuenda ketavo. 3. Usumba, woku tunda vocimunga, woku pumba eci va kuete, wovina vĩvi vi laika oku pita.

ESUVU KA LIA FETIKIWILE LOMANU. Lia fetika eci ungelo umue wo kilu o tukuiwa Satana Eliapu, a sinĩla Suku. Eliapu lia linga “omondi tunde kefetikilo,” eci lia lekisa esino. Olio “ohembi haeye isia yuhembi” kuenda toke cilo, li kasi oku amamako oku vetiya omanu oku lekisa esuvu lungangala. (Yoano 8:44; 1 Yoano 3:11, 12) Embimbiliya li lekisa okuti, olio ongangala, ondingaĩvi kuenda o kemba omanu.—Yovi 2:7; Esituluilo 12:9, 12, 17.

OMO LIEKAMBO LIOKU LIPUA, OMANU VA CITIWA LOCITUWA COKU SUVUKA. Omunu watete Adama, wa linga ocina cimuamue ndeci Satana kuenje wa lueya. Omo liaco, omanu vosi va piñala ekandu kuenda ekambo lioku lipua. (Va Roma 5:12) Kaini omõla watete wa Adama, wa suvukile manjaye Abele, kuenje wo ponda. (1 Yoano 3:12) Ocili okuti, esuvu ka li lekisiwa lomanu valua, momo valua va lekisa ocisola kuenda ohenda. Pole, omo liekandu Adama a pitiya kovitumbulukila viaye, omanu valua va siata oku li velisapo calua, vakuacipululu, vakuanya kuenje oku lekisa—ovituwa evi, ci vetiya vali esuvu.—2 Timoteo 3:1-5.

OVISIMĨLO KA VIA SUNGULUKILE VI VOKIYA ESUVU. Oluali lueyuka lovilinga viungangala vina okuti, vi vetiya vali oku lekisa esuvu. Olonepele, ocame, olondaka viesepu, oku sanumũla kuenda oku nyõla ovina viamale, vi kasi kolonepa viosi omo okuti, “oluali luosi lu kasi povaka ondingaĩvi” okuti Satana Eliapu.—1 Yoano 5:19.

Pole, Embimbiliya ka li situlula lika ono yesuvu. Olio lia likuminyavo oku malako esuvu liaco.