Ceci Esuvu li ka Sulila Otembo ka yi Pui!
Ndaño okuti etu tu liwekapo oku suvuka vakuetu, ka tu tẽla oku va tateka oku liwekapo oku lekisa esuvu. Omanu ka va kuete eko, va kasi oku amamako oku tatiwa lesuvu. Omo liaco, helie o pondola oku malako esuvu otembo ka yi pui?
Yehova Suku, eye lika o pondola oku malako esuvu liosi tu lete koloneke vilo. Eci oco Embimbiliya lia likuminya okuti, oco eye a ka linga.—Olosapo 20:22.
SUKU O KA MALAKO OVINA VIOSI VI KOKA ESUVU
1. SATANA ELIAPU. Satana ungelo ukuesino, wa siata oku koka esuvu tu lete koloneke vilo. Suku o ka kundula Satana kuenda vosi vana va suvuka vakuavo ndeci eye.—Olosamo 37:38; Va Roma 16:20.
2. OLUALI LUA SATANA LUEYUKA ESUVU. Suku o ka kundula ovina viosi vĩvi violuali lulo, oku kongelamo vakuapulitika okuti vakuavitukiko, lasongui vetavo vana va vetiya esuvu. Suku o ka kundulavo ovisoko violomĩlu vakuacipululu haivo vakuavitukiko okuti, va siata oku nyana omanu vakuavo.—2 Petulu 3:13.
3. EKAMBO LIOKU LIPUA KUOMANU. Embimbiliya li lombolola okuti, omanu vosi va piñala ekambo lioku lipua okuti,—otembo yosi tu kuete onjongole yoku sokolola, loku linga ovina ka via sungulukile. (Va Roma 5:12) Oku kuatela esuvu vakuetu loku li lekisa, yimue pokati kolonjila vioku linga ekandu. Suku o ka kuatisa omanu oku yula ovina viosi viekambo lioku lipua, oco esuvu liosi li kunduiwe otembo ka yi pui.—Isaya 54:13.
EMBIMBILIYA LI LIKUMINYA OLUALI LUMUE KA MU KA KALA ESUVU
1. LOMUE O KA TATIWA LEKAMBO LIESUNGA. Ongongo yosi yi ka vialiwa Lusoma wa Suku. Owo u ka viala oku upisa kilu kuenda u ka nena esunga otembo ka yi pui. (Daniele 2:44) Olonepele kuenda ocame, ka vi ka kalako vali. Suku o ka malako ekambo liosi liesunga omanu va siata oku liyaka lalio.—Luka 18:7.
2. OMANU VOSI VA KA KUATA OMBEMBUA. Lomue o ka tala vali ohali omo liungangala, ale liuyaki. (Olosamo 46:9) Ongongo yi ka kala ocitumãlo cimue mu ka kala lika omanu va sole ombembua.—Olosamo 72:7.
3. VOSI VA KA KUATA EKALO LIWA OTEMBO KA YI PUI. Olonungi viosi via palo posi, vi ka lekisa ocisola cocili komanu vosi. (Mateo 22:39) Lomue o ka kuata vali asakalalo, ndaño muẽle oku tala ohali omo liovisimĩlo ka via sungulukile. (Isaya 65:17) Kotembo esuvu liosi li ka sulila, omanu “va ka sanjukila ombembua yalua.”—Olosamo 37:11.
O yongola hẽ oku kala voluali luaco? Vepuluvi lilo, omanu valua va kasi oku lilongisa oco va siepo esuvu kuenda oku kapako olonumbi Viembimbiliya. (Olosamo 37:8) Eci oco Olombangi viosi Via Yehova voluali luosi vi kasi oku linga. Ndaño okuti ovio vi tunda kovikoti kuenda kapata a litepa, vi li kuetele omunga kuenda ocisola omunu lukuavo.—Isaya 2:2-4.
Olombangi Via Yehova vi sanjukila oku sapuilako vakuavo ovina vi kasi oku lilongisa catiamẽla konjila ndomo vi liyaka lekambo liesunga kuenda olonepele. Ovina o ka lilongisa, vi pondola oku ku kuatisa oku siapo ovisimĩlo viosi viesuvu, kuenje o fetika oku kuata ocisola. O pondola oku lilongisa ndomo o tata omanu vosi lohenda,—oku kongelamo vana va molẽha ndu okuti vakualutukãi, ale vana va lekisa esuvu. Kuenje o ka kuata esanju cilo kuenda ukamba wove lomanu vakuavo u ka pamisiwa. Handi vali, o ka lilongisa eci o sukila oku linga oco o ka kale vemẽhi Liusoma wa Suku, eci esuvu li ka kunduiwa otembo ka yi pui.—Olosamo 37:29.