NDOMO TU MALAKO ESUVU

3 | Upa Esuvu Vovisimi̇̃lo Viove

Ceci Embimbiliya li Longisa:

“Pongololi ovisimĩlo viene oco okuti, vu limbuka ndeci ci kasi ocipango ca Suku okuti ciwa, ca sunguluka kuenda ca pua eko.”—VA ROMA 12:2.

Elomboloko Liocisonehua Eci:

Onjila ndomo tu sokolola, yi kuete esilivilo ku Suku. (Yeremiya 17:10) Ocili okuti, tu sukila oku yuvula oku popia, ale oku linga ovina vi situlula esuvu. Pole, tu sukila oku linga ovina vialua okuti, eci ci sule. Ci kuete esilivilo oku ivaluka okuti, esuvu li fetikila vutima kuenda vovisimĩlo. Omo liaco, tu sukila oku upa vutima wetu ovisimĩlo viosi vi vetiya esuvu. Poku ci linga, oco lika tu pondola oku ‘pongoloka’ loku yula esuvu.

Ceci o Pondola Oku Linga:

Kala ukuacili, konomuisa lutate ovisimĩlo viove kuenda ovina o sima viatiamẽla komanu vakuavo—ca piãla enene komanu vakuekova likuavo, ale vakuafeka yiñi. Li pula ndoco: ‘Cipi ocisimĩlo cange catiamẽla komanu ava? Ovisimĩlo viange via kunamẽla hẽ kueci nda kũlĩha catiamẽla kokuavo? Ale via kunamẽla kesuvu?’ Nda wa kũlĩha okuti, olofilme vimue, ale olonumbi vimue vio internet vi vetiya oku lekisa esuvu, lungangala, vi yuvula.

Ondaka ya Suku yi pondola oku tu kuatisa oku yula esuvu vutima wetu kuenda vovisimĩlo

Olonjanja vimue, ka ca lelukile oku linga ekonomuiso lia suapo liatiamẽla kovisimĩlo vietu. Pole, Ondaka ya Suku yi pondola oku tu kuatisa oku “limbuka ovisimĩlo lolonjongole viutima.” (Va Heveru 4:12) Omo liaco, amamako oku lilongisa Embimbiliya. Sokisa eci olio li longisa, lonjila yove yoku sokolola kuenda likolisilako oku sokolola lonjila yimue yi sanjuisa Suku. Pamue ka ci leluka oku upa esuvu vutima kuenda vovisimĩlo vietu ndeci oku “nyõla ovina via pama ndombonge,” pole, Ondaka ya Suku yi pondola oku tu kuatisa oku ci linga.—2 Va Korindo 10:4, 5.

Ulandu Womuenyo—STEPHEN

Wa Pongolola Onjila Yaye Yoku Sokolola

Stephen lepata liaye, va suvukiwile lomanu vakuekova liyela. Omo liaco, Stephen wa vetiyiwa locimunga cimue ca vakuapulitika haivo va linga ungangala poku yakela omoko omanu va kuete. Vokuenda kuotembo, eye wa fetikavo oku panga onepa kungangala omo liesuvu. Stephen wa popia hati: “Olonjanja vimue ame lakamba vange tua enda oku tala olofilme viomanu vo ko Afrika va talisiwa ohali vokuenda kupika ko Estadus Unidus. Omo liekambo liaco liesunga, tua enda oku pupola alume vakuekova liyela vosinema yaco. Kuenje tua fetika oku endaenda volosanjala muli omanu vakuekova liyela oco tu va pupole.”

Pole, eci Stephen a fetika oku lilongisa Embimbiliya Lolombangi Via Yehova, ovisimĩlo viaye viosi via pongoloka. Eye o lombolola ndoco: “Omo lioku suvukiwa calua, nda komõha poku mola ndomo Olombangi Via Yehova via enda oku li tata ciwa. Ndeci, eci ulume umue ukuekova liyela Ombangi ya Yehova ya sukilile oku linga ungende umue kofeka yikuavo, eye wa sia omãla vaye kepata limue liekova li tekãva. Vepuluvi likuavo, epata lia vakuekova liyela, lia yekisa ukuenje umue ukuekova li tekãva wa sukilile ocitumãlo coku kala.” Stephen wa pitĩla petosi lioku limbuka okuti, Olombangi Via Yehova vi kasi ndepata limue kuenda vi tẽlisa eci Yesu a popele catiamẽla kocisola ca laikele oku kala pokati Kakristão vocili.—Yoano 13:35.

Nye ca kuatisa Stephen oku siapo ovilinga viesuvu kuenda viungangala? Ocisonehua cukanda ku Va Roma 12:2. Eye hati: “Nda limbuka okuti, ndi sukila oku linga apongoloko konjila ndomo ndi sokolola. Sia sukilile lika oku pongolola ovisimĩlo viange oco ndi kuate ombembua, pole, oco ndi tavevo okuti, eli olio ekalo lia velapo liomuenyo.” Pa pita ale ci pitahãla 40 kanyamo tunde eci Stephen a kuete ekalo liwa komuenyo okuti, wa yula esuvu.