NDOMO TU MALAKO ESUVU

4 | Yula Esuvu Lekuatiso Lia Suku

Ceci Embimbiliya li Longisa:

“Epako liespiritu lieli: ocisola, esanju, ombembua, epandi, ohenda, uwa, ekolelo, umbombe kuenda oku likandangiya.”—VA GALATIA 5:22, 23.

Elomboloko Liocisonehua Eci:

O pondola oku yula esuvu lekuatiso lia Suku. Espiritu sandu liaye li tu kuatisa oku kuata ovituwa vina okuti, likalietu nda ka tua tẽlele oku vi kuata. Omo liaco, ci kuete esilivilo oku kolela kekuatiso lia Suku, oco tu yule esuvu okuti, ka tu likolela etu muẽle. Nda tua ci linga, tu ka liyeva ndeci upostolo Paulu wa soneha ndoco: “Nela ovina viosi vu Kristu u o ñolaisa.” (Va Filipoi 4:13) Tu ka popiavo hati: “Ekuatiso liange li tunda ku Yehova.”—Olosamo 121:2.

Ceci o Pondola Oku Linga:

“Yehova wa ndi pongolola okuti ndi siapo ungangala, ndi kala omunu ukuambembua.”—WALDO

Likutilila ku Yehova lutima wosi loku pinga espiritu sandu liaye. (Luka 11:13) Pinga kokuaye oco o kuate ovituwa viwa. Konomuisa Vembimbiliya ovituwa vi ku kuatisa oku yula esuvu ndeci, ocisola, ombembua, epandi kuenda oku likandangiya. Seteka oku lekisa ovituwa viaco eteke leteke. Linga ukamba la vana va kasi oku setekavo oku kuata ovituwa viaco. Ovo va pondola oku ku kuatisa loku ku ‘vetiya locisola kuenda lovilinga viwa.’—Va Heveru 10:24.

Ulandu Womuenyo—WALDO

Wa Yula Ungangala Kuenda Esuvu

Waldo vutila waye wa talisiwa ohali yalua, omo liaco, wa kuatele esuvu lialua. Eye hati: “ Nda enda oku litenga vovama a lingiwa volokololo lovimunga violongangala . . . Eteke limue ocimunga cikuavo ca pañinya omondi yimue oco yi ndi ponde, kuenje nda tila noke lioku ndi toma lumosi.”

Waldo ka sanjukile eci ukãi waye a fetika oku lilongisa Embimbiliya Lolombangi Via Yehova. Eye hati: “Nda vi suvukile kuenda olonjanja vialua nda enda oku va kelohãla loku popia olondaka vĩvi. Pole, ca ndi komõhisa ceci okuti, ovo va kala vakuambembua.”

Vokuenda kuotembo, Waldo wa fetikavo oku lilongisa Embimbiliya. Eye wa lombolola hati: “Ka ca lelukile oku kapako ovina nda kala oku lilongisa. Nda simĩle okuti, lalimue eteke ndi ka tẽla oku likandagiya konyeño kuenda kungangala.” Pole, ovina a lilongisa Vembimbiliya vio kuatisa calua.

Waldo wa lombolola ndoco: “Eteke limue, ulongisi wange Alejandro wa ndi pinga oco ndi tange Va Galatia 5: 22, 23. . . . Alejandro wa lombolola okuti, oco ndi kuate ovituwa evi, ndi sukila espiritu sandu lia Suku okuti, longusu yange muẽle ka ci tẽliwa. Eci ca pongolola onjila yange yoku sokolola!”

Omo lioku kolela ku Suku, Waldo wa tẽla oku yula esuvu komuenyo waye. Eye wa popia hati: “Epata liange kuenda akamba vosimbu va komõha poku mola ndomo nda pongoloka.” Eye amisako ndoco: “Yehova wa ndi pongolola okuti ndi siapo ungangala, ndi kala omunu ukuambembua.”