2 | 2 “Elembeleko li Tunda Kovisonehua”

EMBIMBILIYA LI POPIA HATI: “Ovina viosi via sonehiwa osimbu, via sonehiwila oku tu longisa okuti, omo liepandi lietu kuenda elembeleko li tunda Kovisonehua, tu kuata elavoko.” —VA ROMA 15:4.

Ceci ci Lomboloka

Embimbiliya li tu pamisa lovisimĩlo vi lembeleka vi pondola oku tu kuatisa eci tu kasi lovisimĩlo ka via sungulukile. Esapulo Liembimbiliya li tu ĩhavo elavoko liokuti, ndopo muẽle ka ku ka kala vali evalo li veta ovisimĩlo vietu.

Ndomo tu Kuatisiwa

Vosi yetu olonjanja vimue tu liyaka lovisimĩlo viesumuo; pole, vana va tala ohali omo liesumuo lialua ale esakalalo, va pondola oku liyaka lovisimĩlo viaco eteke leteke. Embimbiliya li pondola oku kuatisa ndati?

Vembimbiliya tu sangamo ovisimĩlo vialua viwa vina vi pondola oku piñainya ovisimĩlo ka via sungulukile. (Va Filipoi 4:8) Ocili okuti, olio li pondola oku yukisa ovisimĩlo vietu, lovisimĩlo vielembeleko kuenda vioku tula utima, vina vi ka tu kuatisa oku liyeva ciwa. —Osamo 94:18, 19.
Embimbiliya li pondola oku tu kuatisa oku yula ocisimĩlo cokuti, ka tu kuete esilivilo. —Luka 12:6, 7.
Ovisonehua vialua Viembimbiliya, vi tu ĩha ekolelo liokuti, ka tu kasi lika lietu kuenda Suku, Ululiki wetu, o kuete elomboloko liovisimĩlo vietu. —Osamo 34:18; 1 Yoano 3:19, 20.
Embimbiliya li likuminya okuti Suku o ka imũla olonjivaluiso vi koka evalo. (Isaya 65:17; Esituluilo 21:4) Eci tu kasi oku tala ohali omo liovisimĩlo vi sakalaisa, tu pondola oku limbuka okuti ohuminyo eyi yi tu ĩha ongusu yoku pandikisa.

Ndomo Embimbiliya Lia Siata Oku Kuatisa Jessica

Ovitangi Esumuo Lialua lia Siata Oku Ndi Kokela

“Eci nda tẽlisa 25 kanyamo, nda fetika oku kala languengue kuenje nda kuatiwa luvei woku sumua calua. Nda tala ohali omo liolonjivaluiso viya ocipikipiki haivio ka vi tava oku vi lava, viatiamẽla kovina vĩvi via pita lame kosimbu. Olondotolo via ndi kuatisa oku kuata elomboloko liokuti esumuo lialua ndi kuete, lia kokiwa omo lionjila ka ya sungulukile yoku sokolola, mekonda liovina vĩvi via pita vomuenyo wange. Ndaño okuti nda kala ale oku nyua ovihemba via suapo, pole, nda sukilavo esaku lioku tumbulula etimba oco li ndi kuatise oku limbuka loku mioñolola onjila yoku sokolola.”

Ndomo Embimbiliya Lia Siata Oku Ndi Kuatisa

“Votembo eci uvei wange woku sumua calua wa luile, nda enda oku lisalukako calua, oku sakalala calua kuenda oku pumba otulo. Olonjanja vialua kuteke, nda enda oku lemelẽlua lovisimĩlo vi sakalaisa vina okuti, sia ponduile oku vi lava. Ndomo Osamo 94:19 yi ci lombolola, Suku o pondola oku tu lembeleka loku tu kuatisa oku tula utima eci tu lemelẽlua lasakalalo. Omo liaco, Embimbiliya liange kuenda ocimalẽho coku sonehamo ovisonehua vielembeleko, viamamako oku kala ocipepi lula wange. Eci si tẽla oku pekela, nda ponduile oku tanga ovinimbu vimue Viembimbiliya oco ngecelele ovisimĩlo via Yehova oku ndi lembeleka.

“Embimbiliya li tu vetiya oku yula ovisimĩlo vina ka vi likuata lovina tua kũlĩha viatiamẽla ku Suku. Kosimbu, nda kuatele ekolelo liokuti, si kuete esilivilo kuenda si soliwe. Pole, nda lilongisa okuti ovisimĩlo viaco ka vi likuata leci Embimbiliya li popia, poku situlula Suku okuti, Isia umue ukuecisola kuenda ukuahenda haeye wa tu kapako omunu lomunu. Vokuenda kuotembo, nda fetika oku lava ovisimĩlo viange okuti si ecelela ovio oku ndi viala. Nda lilongisa oku litenda ame muẽle ndeci Yehova a ndi tenda. Eli lia kala enanga limue linene lioku ndi kuatisa oku yuvula oku litenda lonjila yimue ka ya sungulukile.

“Ame ndi lavoka lesanju lialua otembo eci olonjivaluiso viosi vi koka evalo kuenda ovisimĩlo vi sakalaisa ka vi ka kalako vali. Nda kũlĩha okuti, kovaso yoloneke ka ku ka kala vali uvei wovisimĩlo. Eci ci ndi kuatisa oku pandikisa cilo kuenda oku tiamisila elavoko liange kovaso yoloneke eci ame si ka kuata vali uvei woku sumua calua.”