3 | Ndomo o Kuatisiwa Lovolandu Embimbiliya

EMBIMBILIYA LI POPIA ECI CATIAMẼLA . . .Kalume kuenda kakãi vakuekolelo vana va kuatele ovisimĩlo ndevi vietu.—TIAGO 5:17.

Ceci ci Lomboloka

Vembimbiliya mueyuka ovolandu alume kuenda akãi va kuatele ovisimĩlo vialua via litepa. Osimbu tu tanga ovolandu avo, tu pondola oku limbuka okuti umue pokati kavo wa kuatele ovisimĩlo vimuamue levi vietu.

Ndomo tu Kuatisiwa

Vosi yetu, tu sole oku kũlĩha okuti vakuetu va kuete elomboloko liovisimĩlo vietu. Pole, ci kuete vali esilivilo nda tu kasi loku liyaka luvei wovisimĩlo. Eci tu tanga Embimbiliya, tu lilongisa eci catiamẽla ku vakuetu va kuatele ovisimĩlo kuenda ekalo limuamue ndeli lietu. Omo liaco, eci tu limbuka okuti hetuko lika tu kasi oku liyaka lohali yaco, ka tu liyevi calua ulika eci tu liyaka lesakalalo kuenda ovisimĩlo vi sakalaisa.

Vembimbiliya tu sangamo olondaka vialua via vamue va liyeva okuti, ka va kuete ekuatiso haivo va pua elavoko. Ove hẽ wa simĩle ale ndoco: ‘Si tẽla vali oku amamako lekalo eli?’ Mose, Eliya kuenda Daviti va kuatelevo ovisimĩlo viaco. —Atendelo 11:14; 1 Olosoma 19:4; Osamo 55:4.
Embimbiliya li tu sapuila eci catiamẽla kukãi umue o tukuiwa Hana una “wa sumuile calua” momo ka ponduile oku cita omãla kuenje wa enda oku sanumũiwa calua la sepakãi yaye. —1 Samuele 1:6, 10.
Embimbiliya li tu sapuila eci catiamẽla kulume umue o tukuiwa Yovi, una wa liyakavo lovitangi ndevi vietu. Ndaño okuti eye wa kuatele ekolelo lia pama ku Yehova, pole, eye wa tala ohali omo liovisimĩlo vi sakalaisa kuenje wa popia hati: “Nda suvuka omuenyo wange; si yongola vali oku kala lomuenyo.”—Yovi 7:16.

Oku lilongisa ndomo omanu va tukuiwa Vembimbiliya va liyaka ciwa lovisimĩlo vi sakalaisa, tu pondolavo oku sanga ongusu tu sukila oco tu liyake lohali yetu.

Ndomo Embimbiliya Lia Siata Oku Kuatisa Kevin

Ndomo Nda Siata Oku Tala Ohali Omo Liuvei u Ndi Lingisa Okuti Vepuluvi Limue Ndi Sanjuka, Vepuluvi Likuavo Ndi Sumua

“Eci nda kala oku tẽlisa 50 kanyamo, nda kuatiwa luvei umue u ndi lingisa okuti, vepuluvi limue ndi sanjuka, vepuluvi likuavo ndi sumua. Kuli apuluvi amue ndi liyeva okuti, ndi pondola oku yula ovitangi viosi vi pita vomuenyo wange. Pole, vapuluvi akuavo, ndi liyeva okuti omuenyo ka uwako.”

Ndomo Embimbiliya Lia Siata Oku Ndi Kuatisa

“Ulandu umue Wembimbiliya wa siata oku ndi kuatisa, watiamẽla kupostolo Petulu. Eye wa lueya lonjila yimue yo kokela oku sima okuti ka kuete vali esilivilo. Pole, Petulu kamameleko oku kuata ocisimĩlo caco, pole, eye wa sandiliya oku kala pokati kakamba vana vo kapeleko. Eci ndi limbuka okuti, eteke ka li kasi oku enda ciwa omo liuvei wange u ndi lingisa okuti, vepuluvi limue ndi sanjuka, vepuluvi likuavo ndi sumua, ndi lemelẽlua omo liekambo liange lioku lipua kuenje ndi liyeva okuti, si kuete esilivilo. Ndeci Petulu, nda lilongisa oku kala ocipepi lakamba vange vana va yongola oku ndi kuatisa oku amamako lomuenyo wange okuti si liwekapo.

“Ulandu ukuavo Wembimbiliya wa siata oku ndi lembeleka calua, watiamẽla Kusoma Daviti. Eye olonjanja viosi wa enda oku sumua calua, omo liekalo liaye kuenda oku livela omo liekandu a linga kosimbu. Ulandu waco, u ndi longisa momo olonjanja vimue ndi linga, ale ndi popia ovina vimue okuti noke ndi livela. Olondaka via Daviti vi sangiwa Kosamo 51 vi ndi lembeleka. Vocinimbu 3 Vocinimbu, Daviti hati: ‘Nda kũlĩha ciwa akulueya ange kuenda ekandu liange li kasi kovaso yange otembo yosi.’ Olondaka evi, vi situlula ciwa ndomo ndi liyeva eci ndi kuata esumuo lialua kuenje ci tĩla oku sokolola lonjila ya sunguluka catiamẽla kokuange. Pole, ndi kuatisiwavo lolondaka via Daviti vi sangiwa vocinimbu 10 viokuti: ‘A Suku, nyĩhe utima wa lipua kuenda nyĩhe espiritu liokaliye hailio lia pama.’ Nda siata oku tukula olondaka vimuamue ku Suku oco a ndi kuatise oku kuata ovisimĩlo viwa viatimẽla kokuange. Oku sulako ocinimbu 17 ci ndi lembeleka. Oco hati: ‘A Suku, ove ku ka likala utima wa teka haiwo wa samba.’ Ocinimbu eci ci nyĩha ekolelo liokuti Suku o ndi sole.

“Oku tiamisila utima kovolandu Embimbiliya kuenda kovina Suku a siata oku nyĩha, ci ndi kuatisa oku pamisa elavoko liange lio kovaso yoloneke. Olohuminyo via Suku kokuange vi kala ndu okuti via tẽlisiwa ale, kuenje eci ci ndi kuatisa oku amamako lepandi.”